Хабзэ зэрэхъугъэу, щылэ мазэм и 12-р Урысые Федерацием ипрокуратурэ иIофышIэ и Мафэу хагъэунэфыкIы. Сыд фэдэрэ лъэныкъокIи мэхьанэшхо зиIэ структурэр загъэпсыгъэр мы мафэм илъэс 300 хъугъэ.
1996-рэ илъэсым щегъэжьагъэу УФ-м и Президент иунашъокIэ Урысые прокуратурэм и Мафэ хагъэунэфыкIы.1722-рэ илъэсым щылэ мазэм и 12-м пачъыхьэу Петр иунашъокIэ Генерал-прокурор зыфиIорэ IэнатIэр апэдэдэ агъэнэфэгъагъ. Унашъом къыдыхэлъытагъэу Генерал-прокурорым ипшъэрылъ шъхьаIэхэр ыкIи фитыныгъэу иIэхэр гъэнэфагъэхэ хъугъэ. Ащ ыуж прокурорхэм яинститут хэхъоныгъэхэр ышIыхэзэ титарихъ пытэу къыхэуцуагъ.
Адыгэ автоном хэкум гъэIорышIэнымкIэ иструктурэ прокуратурэм икъулыкъухэр къызыхэхьагъэр 1922-рэ илъэсым шышъхьэIум и 10-р ары. Мы илъэсым къыщегъэжьагъэу джырэ уахътэм нэс Адыгеим ипрокуратурэ пэщэныгъэ дызэрахьагъ ыкIи непи чанэу Iоф ашIэ опытышхо зыIэкIэлъ, зисэнэхьат хэшIыкIышхо фызиIэ прокурорхэр.
Урысыем ипрокуратурэ иаужырэ юбилей зыхигъэунэфыкIыгъэм ыуж илъэси 5 тешIагъ. КъулыкъушIэхэм япшъэрылъхэр зэрифэшъуашэу агъэцэкIэнхэмкIэ, шIуагъэ къытэу IофшIэныр зэшIуахынымкIэ амалышIухэр аIэкIэлъых. Прокурорхэм яIофшIэнкIэ анахь шъхьаIэр зекIокIэ-шIыкIэ тэрэз ахэлъыныр, ренэу яшIэныгъэхэм ахагъэхъоныр, япшъэрылъхэм язэшIохынкIэ шIыкIакIэу щыIэхэр къызфагъэфедэнхэр ары.
2021-рэ илъэсым АР-м ипрокуратурэ икъулыкъушIэхэр лъыплъэн IофшIэным ылъэныкъокIэ хэбзэгъэуцугъэм игъэцэкIэн чанэу дэлэжьагъэх, шIокI имыIэу хабзэр ыкIи хэбзэ рэхьатныгъэм иеплъыкIэхэр къаухъумагъэх.
Тикъэралыгъо ипащэ ыкIи Урысыем и Генеральнэ прокурор прокуратурэм ылъэныкъокIэ пшъэрылъхэр къагъэуцугъэх – хэбзэухъумэкIо къулыкъухэм азыфагу бзэджашIэхэм ыкIи къолъхьэ тын-Iыхыным ябэныгъэнхэмкIэ зэдэштэныгъэ яIэным мэхьанэшхо етыгъэныр, ащ нэмыкIэу цIыфхэм ясоциальнэ ыкIи IофшIэн фитыныгъэхэр, предпринимательхэм яшIоигъоныгъэхэр къэухъумэгъэнхэр, джащ фэдэу хэбзэгъэуцугъэр амыукъоу лъэпкъ проектхэм ягъэцэкIэн анаIэ тырагъэтыныр.
Адыгэ Республикэм ипрокуратурэ иIофышIэхэм шъыпкъагъэ, гуетыныгъэ ыкIи IэпэIэсэныгъэ ин ахэлъэу япшъэрылъхэр зэрагъэцакIэрэм фэшI инэу сафэраз.
Урысые прокуратурэм ыныбжь илъэс 300 зэрэхъурэм фэшI сигуапэу сышъуфэгушIо! Анахьэу тиветеран лъапIэхэм шъхьэкIэфэныгъэ ин афэсэшIы. Прокуратурэм игъэпсын ыкIи коллективым изэтегъэуцон ветеранхэм яIахьышхо хэлъ. ШIушIагъэу шъо шъуиIэм ихьатыркIэ непэ прокуратурэм IэпэIэсэныгъэ ин зыхэлъ ыкIи шъыпкъагъэр зигъогогъу прокурорхэр иIэх, ащ тырэгушхо.
ШъуигукIуачIэ къыщымыкIэу, псауныгъэ пытэ шъуиIэу, шъуиунагъохэм хъярыр къябэкIэу, шIоу щыIэр къыжъудэхъоу шъущыIэнэу шъуфэсэIо!
АР-м ипрокурорэу, юстициемкIэ я 2-рэ класс зиIэ къэралыгъо
советникэу И.С. Шевченкэр.