Адыгеим и ЛIышъхьэу КъумпIыл Мурат Урысые Iофтхьабзэу «#МЫ ВМЕСТЕ» зыфиIорэм хэлажьэхэрэм тыгъуасэ аIукIагъ.
Урысые Iофтхьабзэу «#МЫ ВМЕСТЕ» зыфиIорэм республикэм щыщ нэбгырэ мин 1,2-м ехъу хэлэжьагъ. Медицинэ колледжым ыкIи институтым ястудентхэм ковиднэ госпитальхэм, IэпыIэгъу псынкIэм Iоф ащашIагъ. Партиеу «Единэ Россием» игъусэхэу волонтерхэм гъомылапхъэхэр зэрылъ Iалъмэкъхэр агъэпсыгъэх, ахэр зыныбжь хэкIотагъэхэм алъагъэIэсыгъэх.
Республикэм ипащэ дэгущыIэнхэу къеблэгъагъэх Урысые общественнэ движениеу «Волонтеры — медики» зыфиIорэм иреспубликэ организацие, гуфитхэм яресурснэ гупчэу «Адыгеим иволонтерхэр», Урысыем иныбжьыкIэхэм я Союз ишъолъыр организацие», гупчэу «Адыгеим иныбжьыкIэхэр», Адыгэ къэралыгъо университетым истудентхэм ыкIи иаспирантхэм я Союз ялIыкIохэр.
Iофтхьабзэм хэлэжьагъэх АР-м псауныгъэр къэухъумэгъэнымкIэ иминистрэу Мэрэтыкъо Рустем, Адыгеим гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевыр, республикэм и Къэралыгъо Совет – Хасэм и Комитет итхьаматэу Наталья Широковар, Адыгэ къэралыгъо университетым ыкIи Мыекъопэ къэралыгъо технологическэ университетым яректорхэр, партиеу «Единэ Россием» ишъолъыр гъэцэкIэкIо комитет ипащэ, нэмыкIхэри.
Пандемием илъэхъан республикэм щыпсэухэрэм IэпыIэгъу афэхъухэрэ волонтерхэм Адыгеим и ЛIышъхьэ афэрэзагъ.
— Пандемием ылъэныкъокIэ Iофхэм язытет джыри къины, ащ къыхэкIыкIэ шъо шъуиIэпыIэгъу лъэшэу тищыкIагъ. Коронавирусым иштаммыкIэу «омикроныр» къызэрежьагъэм къыкIэлъыкIоу узыр къызпыхьагъэхэм япчъагъэ нахьыбэ хъуным ищынагъо щыI, — къыIуагъ КъумпIыл Мурат волонтерхэм закъыфигъазэзэ.
Зэпахырэ узым зиушъомбгъун зэрилъэкIыщтым псауныгъэр къэухъумэгъэным исистемэ зэрэфагъэхьазырырэр республикэм ипащэ хигъэунэфыкIыгъ. Медицинэ учреждениехэм пшъэрылъ шъхьаIэу апашъхьэ щытыр Iэзэгъу уцхэмкIэ ыкIи укъэзыухъумэрэ пкъыгъохэмкIэ IэпэчIэгъэнэ тедзэхэр яIэнхэм фэхьазырынхэр.
Джащ фэдэу колл-гупчэм Iоф щызышIэхэрэм япчъагъэ хэгъэхъогъэн фаеу КъумпIыл Мурат пшъэрылъ къыгъэуцугъ. Мыщ дэжьым анахьэу анаIэ зытырагъэтын фаер волонтер-медикхэм яегъэджэн епхыгъэ Iофыгъохэр ары.
«Единэ Россием» ылъэныкъокIи волонтерхэм IэпыIэгъу агъотын зэралъэкIыщтыр Адыгеим ипащэ къыхигъэщыгъ. Партием ишъолъыр гъэцэкIэкIо комитет ипащэхэм къызэратыгъэмкIэ, колл-гупчэм Iутхэм тапэкIи шхыныгъо стырхэр аIэкIагъэхьащт.
Республикэм игуфит организациехэм, колл-гупчэм яIофшIэн нахьышIу шIыгъэнымкIэ, язэпхыныгъэ джыри нахь гъэпытэгъэнымкIэ волонтерхэм предложениехэр къахьыгъэх.
— Шъо опыт гъэнэфагъэ шъуIэкIэлъ, арышъ непэ шъуиIэпыIэгъу тищыкIагъ. Тызэгъусэмэ ары тицIыфхэм япсауныгъи, ящыIэныгъи къэтыухъумэнхэ зытлъэкIыщтыр, — къыIуагъ КъумпIыл Мурат.
Шъугу къэдгъэкIыжьын, Урысые Iофтхьабзэу «#МЫ ВМЕСТЕ» зыфиIорэм республикэм щыщ нэбгырэ мини 1,2-м ехъу хэлэжьагъ. Медицинэ колледжым ыкIи институтым ястудентхэм ковиднэ госпитальхэм, IэпыIэгъу псынкIэм Iоф ащашIагъ. Партиеу «Единэ Россием» игъусэхэу волонтерхэм гъомылапхъэхэр зэрылъ Iалъмэкъхэр агъэпсыгъэх, ахэр зыныбжь хэкIотагъэхэм алъагъэIэсыгъэх.
Адыгеим и ЛIышъхьэ ипресс-къулыкъу