Тхылъ тедзапIэу «О.Г.И.» зыфиIорэм Урысыем ис лъэпкъхэм яджырэ литературэ и Антологие иятфэнэрэ том къыдигъэкIыгъ.
Ар художественнэ публицистикэм фэгъэхьыгъ. Тихэгъэгу ис лъэпкъ зэфэшъхьафхэм абзэ 45-кIэ автори 134-мэ атхыгъэ публицистическэ произведениехэу урысыбзэм рагъэкIужьыгъэхэр мыщ къыдэхьагъэх. ТхакIохэм яныдэлъфыбзэкIэ атхыгъэ очеркхэр, портретхэр, эссехэр, зарисовкэхэр, фельетонхэр ыкIи нэмыкIхэр тхылъым дэжъугъотэщтых.
«Урысыем щыпсэурэ лъэпкъхэм яджырэ литературэ» зыфиIорэ антологием ипроект 2016-рэ илъэсым рагъэжьагъ. 2017 — 2018-рэ илъэсхэм а серием щыщэу тхылъищ къыдэкIыгъ: поэзием и Антологие, кIэлэцIыкIу литературэм и Антологие, прозэм и Антологие. Тиреспубликэ щыщ усэкIуитIумэ — Къуикъо Шыхьамбыйрэ Дэрбэ Тимуррэ ятхыгъэхэр джащыгъум сборникым къыдэхьэгъагъэх. Шъолъыр советым ахэм ятхыгъэхэр игъо ылъэгъугъагъэх, редактор купми ахэр къыхахыгъагъэх. НыдэлъфыбзэкIэ тхыгъэ заул къыхахыгъагъэр, урысыбзэм ралъхьагъэхэри тхылъым къыдэхьагъэх. Къуикъо Шыхьамбый иусэ заулэ, Дэрбэ Тимур ипоэмэу Тыгъужъыкъо Къызбэч фэгъэхьыгъэр ыкIи исатыриплI заулэ адыгабзэкIи урысыбзэкIи а тхылъым къыдэхьэгъагъэх. ТомыкIэм джыри Дэрбэ Тимур итхыгъэу лIыгъэм фэгъэхьыгъэр дэжъугъотэщт.
«Урысыем щыпсэухэрэм ялъэпкъ литературэ» зыфиIорэ проектым иредактор шъхьаIэу Максим Амелиным Адыгеим ис публицистым иIофшIагъэ осэшхо къыфишIыгъ. Интеллектуальнэ литературэм икъэгъэлъэгъон-ермэлыкъэу Non/fiction зыфиIоу 2021-рэ илъэсым тыгъэгъазэм и 2-м къыщегъэжьагъэу тыгъэгъазэм и 6-м нэс щыIагъэм тхылъыр ащ къыщигъэлъэгъуагъ.
ГущыIэм пае, Максим Амелиныр материалым иугъоинкIэ, текстхэм язэдзэкIынкIэ Iофэу ашIагъэм, лъэпкъ публицистхэр зыгъэгумэкIырэ Iофыгъо шъхьаIэхэм къатегущыIагъ. Ахэм зэу ащыщых шэн-хэбзэ дахэхэу къушъхьэчIэсхэм ахэлъхэр мыукъогъэнхэр. «Ащ фэдэ хабзэхэм цIыфыр зэрыгъозэн фэе цIыфыгъэ шапхъэхэр къагъэнафэх, ахэм адиштэу ищыIэныгъи егъэпсы», — къыIуагъ Максим Амелиным. Ащ зэрэхигъэунэфыкIыгъэмкIэ, авторыбэмэ ятхыгъэхэм къушъхьэчIэсхэр зэрыгъозэрэ хэбзэ шIагъохэр ащыпхыращых. ГущыIэм пае, Адыгеим ипублицистэу Дэрбэ Тимур итхыгъэу лIыхъужъныгъэм фэгъэхьыгъэр гъэшIэгъон дэдэу гъэпсыгъэ.
«ЩыIэныгъэм къыхэхыгъэ щысэхэмкIэ, Адыгеим итарихъкIэ лIыгъэ зыхэлъ цIыфхэр авторым къегъэлъагъох. Заом лIыхъужъныгъэ щызезыхьагъэхэм, тинепэрэ мафэ зышъхьэ зылъытэжьэу, цIыфыгъэ шапхъэхэм атетэу зекIохэрэм, лIыгъэ къызыхафэхэрэм ар къатегущыIэ», — къыIуагъ Максим Амелиным.
Шъугу къэтэгъэкIыжьы лъэпкъ зэфыщытыкIэхэмкIэ Советэу Президентым дэжь щызэхэщагъэм изэхэсыгъоу 2021-рэ илъэсым гъэтхапэм и 30-м щыIагъэм Владимир Путиныр джырэ литературэм и Антологие зэхэзыгъэуцуагъэхэу Максим Амелиным, Владимир Григорьевым, Дмитрий Ицкович зэращыфэгушIуагъэр Урысыем ис лъэпкъхэм языкIыныгъэ игъэпытэн яIахь 2020-рэ илъэсым зэрэхашIыхьагъэм фэшI шIухьафтын къазэрафагъэшъошагъэмкIэ. «Ахэм проектыкIэ гъэшIэгъон къыхахыгъ — Урысыем щыпсэурэ лъэпкъ зэфэшъхьафхэм яджырэ литературэ иантологие зэхагъэуцуагъ, Урысыем ис лъэпкъхэм языкIыныгъэ игъэпытэн яIахь зэрэхашIыхьэрэм фэшI шIухьафтын къафагъэшъошагъ», — хигъэунэфыкIыгъ Президентым.