Сыд фэда ябгъэшIыщтыр ыкIи хэта зищыкIагъэр ревакцинациер?

ШтаммыкIэу «Омикрон» зыфиIорэр къежьагъэу загъэунэфым, ревакцинациер ищыкIагъэ зэрэхъугъэр врачхэм нахь къыхагъэщы хъугъэ. Иммуннэ системэр гъэпытэгъэным фэшI коронавирусым пэуцужьырэ антителахэр зыгъэлъэшыщт (бустернэ) прививкэ ищыкIагъ. Штаммхэу «дельта» ыкIи «омикроным» ащ щиухъумэнхэу къаIо. Африкэм къикIыгъэ вирусыкIэу SARS-CoV-2-м ищынэгъуагъэ вирусологхэм зэхафыфэ, зыми емыжэхэу вакцинэр арагъэшIымэ нахьышIоу инфекционистхэм алъытэ. Сыд фэда вакцинэр ара, хэта ыкIи сыдигъуа ар зищыкIагъэр?

Бустернэ прививкэр сыдигъуа зыпшIыщтыр?

— COVID-19-м пэуцужьырэ вакцинэм иммунитетыр зэригъэпытэрэр нэбгырэ пэпчъ зэфэшъхьаф. Прививкэ ашIыгъэхэм ыкIи сымэджагъэхэм залъэплъэхэм, зэрагъэунэфыгъэмкIэ, антителахэр гурытымкIэ илъэс­ныкъорэ пкъынэ-лынэм хэлъых. Нэужым нахь макIэ хъухэу фежьэх. Арышъ, вирусым иштаммыкIэхэр къызэрежьагъэхэр къыдыхэплъытэнхэшъ, антителахэр зэу зэрэуиIэщтым упылъын фае, — къыIуагъ Гамалеи ыцIэ зыхьырэ Гупчэм ипащэу Александр Гинцбург.

«ШIэжь клеткэкIэ» заджэхэрэ Т-иммунитетыр зэпахырэ узхэм ащыщхэм яI. ГущыIэм пае, шъогъазэм пэуцужьырэ вакцинэр цIыфым икIэлэцIыкIугъом халъхьэшъ, къыгъэшIэщтым фэхъу. КоронавирусымкIэ ащ фэдэу хъурэп: тIуи, щи къяузын елъэкIы.

— Эпидемиер щэIэфэ, мэзих тешIэ къэс бустернэ прививкэр ябгъэшIын фаеу Урысыем псауныгъэр къэухъумэгъэнымкIэ и Министерствэ елъытэ. ТапэкIэ эпидемием изытет зыпкъ зиуцокIэ, COVID-19-м пэуцужьырэ прививкэр, гриппым фэдэу, илъэсым зэ зыхябгъалъхьэмэ хъущт, — къыIуагъ псауныгъэр къэухъумэгъэнымкIэ министрэу Михаил Мурашко.

QR-кодыр сыдэущтэу зекIощта?

Унашъо зэрашIыгъэмкIэ, сымэджагъэхэми, вакцинэр зыхязыгъэлъхьагъэхэми QR-кодэу къаратырэм илъэс ипIалъ. Аущтэу зыхъукIэ, ятIонэрэ вакцинациер арагъэ­шIын фаеу зэраIорэм зэщыкIукIынхэр фэхъух. Зэрэхъу­рэмкIэ, егъэзыгъэ Iоф хэмылъэу цIыфым ишIоигъоныгъэкIэ ревакцинациер ышIыщт. ЕтIанэ автомат шIыкIэм тетэу QR-кодыр илъэскIэ лъыкIо­тэщт.

Хэта ревакцинациер зышIын фаер?

Урысыем зэрэщагъэнэфагъэмкIэ, врачым Iизын къызэритыгъэхэм анэмыкIхэм, ныбжь икъу зиIэхэм зэкIэми ревакцинациер ашIынэу щыт. Къэралыгъо зэфэшъхьафхэм прививкэр илъэсныкъо, мэзищ тешIэ къэс ашIынэу ащагъэнэфагъэу къатхы.

Урысыер тштэмэ, иммунитетыр зыгъэпытэрэ (бустернэ) прививкэр мэзи 6 тешIэ къэс арагъэшIымэ нахьышIоу алъытагъ. QR-кодым ипIалъэ зэрэлъагъэ­кIотагъэм къыхэкIыкIэ ревакцинациер зашIыщтыр джы цIыфым ишIоигъоныгъэ елъытыгъэщт. ЩыIэныгъэм къызэрэщынэфагъэмкIэ, нэбгырабэмэ къамышIэу е псынкIэу коронавирусыр апэкIэкIыгъ ыкIи антителахэр яIэхэ хъугъэ. Ащ пае специалистхэм ащыщхэм къызэраIорэмкIэ, антителахэр икъоу цIыфым иIэхэ зыхъу­кIэ, ревакцинацие зыщаригъэшIыщт пIалъэм тыригъашIэ хъущт.

Ау узыр зыпэкIэкIыгъэм е апэрэ вакцинэр зыхязыгъэлъхьагъэм мэзи 6 зытешIэкIэ ревакцинацие ышIыми иягъэ къекIыщтэп.

Сыд вакцинэр ара къыхэпхыщтыр?

Роспотребнадзорым къызэрэщаIуагъэмкIэ, Урысыем щатхыгъэ вакцинэ пстэумкIи ревакцинацие ябгъэшIы хъущт. НахьыбэрэмкIэ «Спутник V-р» апэ зыфашIыгъэхэм е узыр зыпэкIэкIыгъэхэм «Спутник Лайт» зыфиIорэр къыхахынэу араIо. Александр Гинцбург къызэрэхигъэщыгъэмкIэ, «Спутник Лайтыр» анахьэу ревакцинацием фытегъэпсыхьагъ. Джащ фэдэу вакцинэхэр зэблэпхъухэзэ зыхябгъалъхьэхэмэ нахь ишIуагъэ къэкIощтэу ащ елъытэ.

Хэутыгъэ зэфэшъхьафхэр къызфигъэфедэхэзэ къэзыгъэхьазырыгъэр Iэшъынэ Сусан.