ТIури зэдэпшIыхэ хъущт

Коронавирусым ыкIи гриппым апэуцужьырэ вакцинэхэр зэдыхаплъхьэхэ хъущтэу УФ-м псауныгъэр къэухъумэгъэнымкIэ и Министерствэ ылъытагъ.

Мы зэхъокIыныгъэу ашIыгъэр «Спутник V» зыфиIорэм инструкциеу кIыгъум хатхагъ. Мыщ ыпаIокIэ прививкэхэм азыфагу мэфэ 30 къыдэфэн фаеу щытыгъ.


Вакцинэ заулэ зэдэшIыгъэныр иммунологием къыхэфэ. ГущыIэм пае, кIэлэцIыкIухэм зэхалъхьэу афашIырэ КДС-р (коклюш – дифтерия – столбняк). Мы уахътэм зэпахырэ уз зэфэшъхьафхэм уащызыухъумэрэ (поливалентнэ) препаратхэр нахь къыдагъэкIыхэ хъугъэ.

— Мы екIолIакIэр нахьыбэрэмкIэ щынэгъончъэу, шIуагъэ къытэу алъы­тагъ ыкIи прививкэхэм я Лъэпкъ мэфэпчъи щатхыгъ. Вакцинэ заулэ цIыфым зэхалъхьэу фашIы мыхъущтэу тыди къыщаIорэп. Мыщ къыхимыубытэрэр жъэгъэузым пэуцужьырэ вакцинэ закъор ары —БЦЖ-р зыми дыхаплъхьэ хъущтэп, —къыщаIуагъ УФ-м и Роспотребнадзор.

Джащ фэдэу ведомствэм къызэри­тырэмкIэ, цIыфым ыпкъынэ-лынэ антигеныбэмэ арихьылIэзэ зыкъеухъумэжьышъ, вакцинэ зэфэшъхьаф заулэ хаплъхьэми иягъэ къэ­кIощтэп.

Ащ дакIоу, IэкIыб къэ­ралыгъохэм ыкIи Урысыем яшIэныгъэлэжьхэм комбивакцинэхэм Iоф адашIэ — гриппым иштамм заулэ ыкIи ко­ро­навирусым апэуцу­жьырэ генхэр зы бэшэрэб цIыкIум итыщтых. «Ростехым» ипащэу Сергей Чемезовым къы­зэриIуагъэмкIэ, 2021-рэ илъэсым ыкIэхэм е 2022-рэ илъэсым икъи­хьагъу ехъулIэу ащ фэдэ вакцинэ щыIэщт. Гриппыр зыщаушэтырэ научнэ институтэу Смородинцевым ыцIэ зыхьырэми «зэхэт вакцинэхэм» Iоф щадашIэ, шIоигъоныгъэ зиIэхэм бжыхьэм ар аушэтын алъэкIыщт. Н.Ф. Гамалея ыцIэ зыхьырэ ушэтын гупчэм ипащэу Александр Гинцбург зэрилъытэрэмкIэ, «зэхэт вакцинэхэм» тикъэкIощт уахътэ япхыгъ ыкIи гриппымрэ «коронэмрэ» апэуцужьырэ вакцинэхэр зэхалъхьэу шIэхэу зыхатлъхьэхэу хъущт.

— Гриппыр нахь къызыщежьэрэ бжыхьэ-кIымэфэ лъэхъаным ковидыр зыхэхьажькIэ, къыздихьын ылъэкIыщт тхьамыкIагъохэм врачхэр агъэгумэкIых. Ары мы уахътэм вакцинэхэр зыхяб­гъэлъхьанхэм мэхьанэ зыкIиIэр. Мы вакцинэхэр зэдыхаплъхьэхэ хъущт, ар ащ пае къяхьылъэкIырэп. Къэзыгъэшъып­къэжьыгъэхэм ащыщ вакцинэхэу Moder­na, Pfizer ыкIи Jonson&Jonson зыфиIо­хэрэм гриппым пэуцужьырэ вакцинэр США-м зэращызэдаушэтыгъэр. Джы бэмышIэу Урысыем коронавирусым пэуцужьырэ вакцинэу «Спутник V» зыфиIорэмрэ гриппым пэуцужьырэмрэ алъэныкъокIэ ушэтынхэр зэрахьагъэх ыкIи ахэр къызэкIухэу алъытагъ, — къы­Iуагъ УФ-м изаслуженнэ врачэу, пэIудзы­гъэ медицинэ егъэджэным исервисэу Vrachu.ru зыфиIорэм иредакторэу Михаил Каган.

Къэбарыр «Российская газета» зыфиIорэм къитхыгъ.