«Спутник V» ыкIи «Спутник Лайт» — сыда зэрэзэтекIыхэрэр?

Мы уахътэм Адыгэ Республикэм коронавирусым пэуцужьырэ вакцинэхэу анахьэу къыщекIокIыхэрэр «Спутник V» ыкIи «Спутник Лайт» зыфиIохэрэр ары. Аужырэр цIыфыбэм къыхахы, сыда пIомэ ар зэ нахь къыпхалъхьэрэп.

Сыда зэрэзэтекIыхэрэр?

ВакцинитIуми алъапсэр а зы аденовирусыр ары – пэтхъу-Iутхъур цIыфым къыфэзыгъэтэджырэр. ЗэрэхъурэмкIэ, «Лайтыр» адрэ вакцинэм иапэрэ Iахьэу аденовирус Ad26-рэ зыфиIорэр ары.

«Спутник V» зыфиIорэм аденовируситIу Ad26-рэ ыкIи Ad25-рэ хэхьэх, чэзыу-чэзыоу ахалъхьэ. ТIо хэлъхьагъум цIыфым ыпкъышъол нахь еухъумэ. Вакцинациер зыфашIыщтхэм япчъагъэ нахь зырагъэу­шъомбгъуным фэшI зэ хэлъхьагъу хъурэ «Лайтыр» къаугупшысыгъ.
Шъугу къэдгъэкIыжьын, препаратитIури агъэхьазырыхэ зэхъум язэхэлъыкIэ зэхъокIыныгъэ заулэхэр фашIыгъэх. АпэрэмкIэ, пкъынэ-лынэм щахэхъон амал ямыIэ ашIыгъ, арышъ, вакцинациер окIофэ пэтхъу-Iутхъур къыппыхьащтэп. ЯтIо­нэрэмкIэ, коронавирусым иген S-белокыр аденовирусым хагъэхьагъэшъ, ащ ишIуа­гъэкIэ антителахэр пкъышъолым иIэхэ мэхъу.

«Спутник Лайтым» ишIуагъэ нахь макIа?

ИгъэкIотыгъэ вакцинацием ипрограммэ изэфэхьысыжьхэм къызэрагъэлъэгъуа­гъэмкIэ, процент 79,4-м фэдизэу «Спутник Лайтым» ишIуагъэ къэкIо. Ар ба хьауми макIа? ТIо хэлъхьагъу ашIырэ вакцинэхэм шIуагъэу къатырэ процент 80 фэдизыр «Лайтым» иIэу вакцинэр къэзыугупшысыгъэхэм аIо. Н.Ф. Гамалея ыцIэ зыхьырэ научнэ институтым щашIыгъэ лабораторнэ уплъэкIунхэм къызэрагъэлъэгъуагъэмкIэ, коронавирусым иштаммыкIэ пстэуми мы вакцинэр апэу­цужьын елъэкIы. «Спутник V» зыфиIорэр процент 91,4-м фэдизэу коронавирусым пэуцужьы.

ЖъоныгъуакIэм къежьэгъэ вакцинакIэр къызыпхалъхьэрэм ыуж мэфэ 28-рэ зытешIэкIэ антителахэр гъэпсыгъэхэ хъунхэу регъажьэ. Ау пкъышъолым ахэр зэрэхэлъыщтхэ пIалъэр джыри агъэунэфыгъэп.

Хэта зыхалъхьэ мыхъущтыр?

«Спутник V» зыфиIорэм фэмыдэу, зыныбжь илъэс 60-м ехъугъэхэм «Спутник Лайтыр» ахалъхьэрэп. Джащ фэдэу мы вакцинэр уз гъэтIылъыгъэ, зэпахырэ узхэр зиIэхэм, аллергие зэфэшъхьафхэр къызыхагъэщыгъэхэм ахалъхьэ хъущтэп.

COVID-19-р къызэузыгъэхэм мы вакцинэр ахалъхьэ хъущта?

Врач-инфекционистхэм зэрэхагъэунэфыкIырэмкIэ, коронавирусыр зыпэкIэкIыгъэхэм илъэсныкъо зытешIэкIэ ыкIи ревакцинацие зышIы зышIоигъохэм «Спутник Лайтыр» агъэфедэмэ дэгъу. Ежь иммунитетэу яIэ хъугъэм а вакцинэр зыхалъхьэрэм мэфи 10 зытешIэкIэ IgG-антителам фэдэ 40-кIэ хэхъо.

Вакцинациер зыкIу зышIоигъохэм мы къэбарыр къашъхьэпэнэу тыщэгугъы. Коронавирусым тыщызыухъумэщт иммунитетыр тиIэным иамалыр прививкэр зыхядгъэлъхьаныр ары.

Хэутыным фэзыгъэхьазырыгъэр Iэшъынэ Сусан.