Хьасанэкъо Мурат кIэлэцIыкIухэр ыгъэгушIуагъэх

Урысые шIушIэ Iофтхьабзэу «Елка желаний» зыфиIорэм къыдыхэлъытагъэу Урысые Федерацием и Федеральнэ ЗэIукIэ и Къэ­ралыгъо Думэ идепутатэу, Урысые политическэ партиеу «Единэ Россием» ифракцие хэтэу Хьасанэкъо Мурат кIэлэцIыкIу ибэхэр зыщаIыгъырэ Адыгэ республикэ унэм щыIагъ, ащ чIэс кIэлэцIыкIухэм шIухьафтынхэр аритыгъ.

Сабый ибэ, ны-тыхэр зышъхьарымытыжь кIэлэцIыкIу 20 зыщаIыгъырэ Унэм коронавирусым лъэшэу зызыщиушъомбгъурэ лъэхъаным эпидемиологие шапхъэхэр блэкI имыIэу щагъэцакIэх.

Къэралыгъо Думэм идепутат а шапхъэхэр къыдилъы­тэзэ, кIэлэцIыкIухэм аIукIагъэп, ахэм афигъэхьазырыгъэ шIухьафтынхэр сабый ибэхэр зыщаIыгъырэ Унэм иврач шъхьаIэу Ирина Логиновам ритыгъэх.

— ГъэрекIо фэдэу мыгъи ИлъэсыкIэм пае къэгъэлъэгъон цIыкIоу сабыйхэм къагъэхьазырыгъэм сеплъынэу игъо сыфифагъэп. СаIукIэнэу мыхъугъэми, Унэм Iутхэм, сабыйхэм псауныгъэ, насып яIэнэу, 2022-рэ илъэсым ягухэлъхэр къадэхъунэу сафэлъаIо, — къыIуагъ парламентарием.

Джащ фэдэу урысые Iофтхьабзэу «Елка желаний» зыфиIорэм къыдыхэлъытагъэу Къэралыгъо Думэм идепутат ышъхьэкIэ кIэлэцIыкIуи 10-мэ шIухьафтынхэр аритыгъ, псауныгъэ яIэнэу, 2022-рэ илъэсым дэгъоу еджэнхэу афэлъэIуагъ.