«2020-рэ илъэсым икIэлэегъэджэ анахь дэгъу» зыфиIорэ зэнэкъокъум изэфэхьысыжьхэр мэзаем и 2-м къалэу Волгоград щашIыгъэх. Мы Iофтхьабзэр зызэхащэрэм къыщегъэжьагъэу тикIэлэегъаджэ апэрэу финалым ихьагъ ыкIи анахь дэгъоу зыкъэзыгъэлъэгъогъэ нэбгыритфымэ ащыщ хъугъэ Мыекъопэ гурыт еджапIэу N 7-м икIэлэегъаджэу Сергей Левченкэр.
2021-рэ илъэсым ипэублэ УФ-м и Правительствэ и Тхьаматэу Михаил Мишустиныр Адыгеим щыIагъ ыкIи АР-м и ЛIышъхьэу КъумпIыл Мурат зэIукIэгъу дыриIагъ. Шъолъырым непэ иIофыгъо шъхьаIэхэм, социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ программэу 2024-рэ илъэсым нэс телъытагъэр пхырыщыгъэ зэрэхъурэм лъэныкъохэр тегущыIагъэх.
Мы программэм ишIуагъэкIэ реабилитационнэ Гупчэ ыкIи цэхэм зыщяIэзэхэрэ поликлиникэ Мыекъуапэ щашIыгъэх, нэмыкI Iофтхьабзэхэр щызэшIуахыгъэх.
Адыгеим социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ Унэе программэр энергетикэм иинфраструктурэ гъэпсыгъэным, инвестиционнэ проектхэр пхырыщыгъэнхэм, мэкъумэщ хъызмэтым ыкIи зекIоным зягъэушъомбгъугъэным, бизнес цIыкIум ыкIи гурытым хэхъоныгъэхэр ягъэшIыгъэнхэм афэIорышIэ.
КIэлэцIыкIу IыгъыпIэу N 7-м икъутамэу Кобл Якъубэ ыцIэ зыхьырэ урамым къыщызэIуахыгъэм иIофшIэн ригъэжьагъ. Псэуалъэм ишIын, Iэмэ-псымэхэм ящэфын сомэ миллион 719-рэ пэIуагъэхьагъ. Мылъкур федеральнэ ыкIи шъолъыр бюджетхэм къахагъэкIыгъ.
УФ-м ФедерациемкIэ и Совет исенаторхэм ащыщхэр Адыгеим щыIагъэх ыкIи республикэм щашIыгъэ медицинэ псэуалъэхэр къаплъыхьагъэх.
Урысыем и Президентэу Владимир Путиныр УФ-м и Федеральнэ ЗэIукIэ илъэс къэс фигъэхьырэ Джэпсалъэм мэлылъфэгъум и 21-м къеджагъ.
Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ республикэм игъогухэр агъэцэкIэжьых, агъэкIэжьых ыкIи зэтырагъэпсыхьэх. Мы проектыр анахь дэгъоу зыгъэцэкIэрэ шъолъырхэм Адыгеир ащыщ. УФ-м и Правительствэ ышIыгъэ унашъом диштэу ащ иIэпэчIэгъэнэ фонд къыхэхыгъэ сомэ миллиард 1,4-рэ Адыгеим къыIукIэнэу агъэнэфагъ. Мыекъуапэ къэзыухьэрэ гъогум ишIын ар пэIуагъэхьащт.
Псыхъоу Шъхьэгуащэ инэпкъхэу Мыекъопэ паркым дэжь щыIэхэм ыкIи ахэм къапэIулъ чIыпIэхэм язэтегъэпсыхьан фежьагъэх.
ГъэпсэфыпIэу «Лэгъонакъэ» игъэпсын епхыгъэ проект иныр пхырыщыгъэным пае ащ игъунапкъэхэр, чIыпIэу ыубытыщтыр агъэнэфагъэх. Илъэс псаум зэпымыоу Iоф зышIэщт ащ фэдэ экокурортэу «Лэгъонакъэ» ишIынкIэ анахь Iофыгъо шъхьаIэу къэуцурэр тыкъэзыуцухьэрэ дунаим зэрар емыхыгъэныр, чIыопс баиныгъэхэр къэухъумэгъэнхэр ары.
Адыгеим и ЛIышъхьэ зипэщэ лIыкIо купыр Санкт-Петербург щыкIогъэ Дунэе экономическэ форумым хэлэжьагъ. Шъолъырым социальнэ-экономикэ хэхъоныгъэхэр ышIынхэмкIэ мэхьанэшхо зиIэ зэзэгъыныгъэхэм республикэр акIэтхагъ.
2020-рэ илъэсым щегъэжьагъэу Адыгэ Республикэм и Лъэпкъ музей игъэкIотыгъэ гъэцэкIэжьынхэр щэкIох. ЗэрагъэнэфагъэмкIэ, къихьащт илъэсым IофшIэнхэр аухыщтых. Псэуалъэр аужырэ шапхъэхэм адиштэу зэтегъэпсыхьагъэ хъущт.
ШIэныгъэм и Мафэ ехъулIэу къызэIуахыгъэх республикэм щашIыгъэ гурыт еджапIэхэм ащыщхэр.
Мы илъэсымкIэ мэхьанэшхо зиIэгъэ Iофтхьабзэхэм ащыщ мэфищым къыкIоцI кIогъэ хэдзынхэр. Урысые Федерацием и Къэралыгъо Думэрэ Адыгэ Республикэм и Къэралыгъо Совет – Хасэмрэ ядепутатхэр шъолъырым щыхадзыгъэх. ЦIыфхэм анахьыбэу амакъэ зыфатыгъэр партиеу «Единэ Россиер» ары.
ДзюдомкIэ Урысыем ичемпионат Iоныгъом Адыгеим щыкIуагъ. УФ-м ишъолъыр 61-мэ къарыкIыгъэ спортсмен шъитфым ехъу ащ хэлэжьагъ.
Мы мэзэ дэдэм Урысыем и Президентэу Владимир Путиным видеоконференцие шIыкIэм тетэу Адыгеим и ЛIышъхьэу КъумпIыл Мурат зэдэгущыIэгъу дыриIагъ. Шъолъырым исоциальнэ-экономикэ Iофхэм язытет, лъэпкъ проектхэр, федеральнэ ыкIи шъолъыр программэхэр республикэм зэригъэцакIэхэрэм атегущыIагъэх.
Республикэр зызэхащагъэр илъэс 30 зэрэхъугъэм фэгъэхьгъэ мэфэкI Iофтхьабзэхэр чъэпыогъум и 5-м рагъэкIокIыгъэх. Джы Адыгеир загъэпсыгъэр илъэси 100 зэрэхъущтым ихэгъэунэфыкIын зыфагъэхьазыры.
Владимир Путиным и УказкIэ Адыгэ Республикэм и ЛIышъхьэу КъумпIыл Мурат Щытхъум иорден къыфагъэшъошагъ. Шъолъырымрэ Урысыемрэ хэхъоныгъэ ягъэшIыгъэнымкIэ республикэм ипащэ Iофышхоу ышIэрэм а тын лъапIэр къыкIэлъыкIуагъ.
Адыгэ Республикэм Теуцожь районымкIэ икъуаджэу Пэнэжьыкъуае дэт гурыт еджапIэу N 1-м ия 8-рэ класс ис пшъэшъэжъыеу Хьахъужъэкъо Марианнэ лIыхъужъныгъэу зэрихьагъэр цIыфхэм зэлъашIагъ. МашIом ышыпхъухэр щиухъумагъэх, ащ къыкIэлъыкIоу ФедерациемкIэ Советым имедалэу «ЛIыхъужъныгъэ зэрэзэрихьагъэм пае» зыфиIорэр къыфагъэшъошагъ.
Адыгеим и ЛIышъхьэу КъумпIыл Мурат пшъэшъэжъыем фэгушIуагъ, къыфагъэшъошэгъэ медалыр ритыжьыгъ. РеспубликэмкIэ ащ фэдэ тын апэрэу зэратыгъэр Хьахъужъэкъо Марианн ары.
Урысые Федерацием и Президентэу Владимир Путиным тикъэралыгъо ыкIи IэкIыбым Iоф ащызышIэрэ къэбарлъыгъэIэс амалхэм ялIыкIохэм зыфагъэзэн амал яIагъ. Къэралыгъом ипащэ зыхэлэжьэрэ мыщ фэдэ пресс-конференциер я 17-рэу мы илъэсым зэхащагъ, ар сыхьатиплI фэдизрэ кIуагъэ, журналист 507-рэ ащ хэлэжьагъ.
Стратегическэ инициативэхэмкIэ Агентствэм урысые шъолъырхэм щыIэкIэ-псэукIэу яIэмкIэ рейтинг зэхигъэуцуагъ. Адыгеир къэралыгъом ишъолъыр анахь дэгъу 20-мэ ахалъытагъ, я 19-рэ чIыпIэр щиубытыгъ.
УФ-м и Президентэу Владимир Путиным иунашъокIэ урыпсэунымкIэ ахъщэ анахь макIэу ыкIи лэжьэпкIэ анахь макIэу къэралыгъом щыгъэнэфагъэхэм 2022-рэ илъэсым къахэхъощт. Мы унашъор Урысыем щыпсэурэ нэбгырэ миллион пчъагъэмэ алъыIэсыщт. Джащ фэдэу мы илъэсымкIэ щыIэгъэ инфляцием ипроцент фэдиз пенсиехэм къахэхъонэу ары.
Тхьаркъохъо Адам.