Адыгеим гурыт еджэпIи 10 щагъэцэкIэжьыщт

2022 — 2024-рэ илъэсхэм гурыт еджапIэхэм ягъэцэкIэжьынкIэ мылъкоу федеральнэ бюджетым къыщыдэлъытагъэр Урысые Федерацием и Правительствэ шъолъырхэм атыригощагъ.

А гухэлъым пае Адыгэ Рес­публикэм 2022-рэ илъэсым сомэ мин 596309,2-рэ, 2023-рэ илъэ­сым сомэ мин 109674,4-рэ къыIукIэщт. Мылъкур къызэрэхагъэкIыщтым ехьылIэгъэ унашъор Урысыем и Правительствэ зиштагъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары. Адыгэ Республикэм ыцIэкIэ Къэралыгъо Думэм идепутатэу, бюджетымрэ хэбзэIахьхэмрэкIэ коми­тетым хэтэу Владислав Резник ащкIэ IэпыIэгъу къафэхъугъ.

«Урысыем и Президентэу Владимир Путиным «Единэ Россием» изэфэс пшъэрылъ щафишIыгъ гурыт еджапIэхэм ягъэцэкIэжьын тегъэпсыхьэгъэ программэшхор хэгъэгум ишъо­лъырхэм ащыпхыращэу рагъэ­жьэнэу. Джащыгъум Президентым анаIэ тыраригъэдзагъ джырэ шапхъэхэм адиштэу гурыт еджэпIабэ зэтегъэпсы­хьа­жьыгъэн зэрэфаем. НахьыбэрэмкIэ федеральнэ мылъку шъолъырхэм къазэрафыхагъэ­кIыщтыгъэр гурыт еджэпIакIэхэм яшIынкIэ ары. Ахэм ягъэцэ­кIэжьын тегъэпсыхьэгъэ программэр къагъэхьазырыгъах, къихьащт илъэсым ащ Iоф дашIэу ауб­лэщт. 2022 — 2024-рэ илъэс­хэм ателъытэгъэ бюджетым гурыт еджапIэхэм ягъэцэкIэ­жьынкIэ мылъкоу къыщыдэлъытагъэр Урысые Федерацием и Правительствэрэ типарламент комиссиерэ шъо­лъырхэм атырагощагъ», — къыIуагъ Владислав Резник.

Хэгъэгум и Президент пшъэ­рылъэу къафишIыгъэр гъэцэкIэгъэным пае Адыгэ Республикэм и ЛIышъхьэу КъумпIыл Мурат иунашъокIэ республикэм игурыт еджапIэхэм язытет ауплъэкIугъ, ягъэцэкIэжьынкIэ мылъку къызэрэхагъэкIыщт федеральнэ программэм хэхьагъэх. Респуб­ликэм мы программэр зэрэщагъэцакIэрэм Адыгэ Респуб- ликэм и ЛIышъхьи, Урысые политическэ партиеу «Единэ Россием» ишъолъыр къутами гъунэ лъафыщт. А мылъкумкIэ Мыекъуапэ игурыт еджэпIи 7-мэ, Красногвардейскэ, Шэ­у­джэн, Мыекъопэ районхэм арыт гурыт еджэпIи 3-мэ гъэцэ­кIэжьын IофшIэнхэр арашIылIэщтых.

«2022 — 2023-рэ илъэсхэм ателъытэгъэ сомэ миллион 706-у къытфыхагъэкIыгъэмкIэ республикэм игурыт еджэпIи 10-у кIэлэеджэкIо мини 6,3-м ехъу зыщеджэхэрэр агъэцэкIэжьыщтых. Федеральнэ программэм тызэрэхэлажьэ­рэр тапэкIи лъыдгъэкIуатэ тшIоигъу, Адыгеим ыцIэкIэ депутатхэмрэ «Единэ Россием» хэтхэмрэ тиIэпыIэгъухэу республикэм ит нэмыкI гурыт еджапIэхэри псынкIэу гъэцэкIэжьыгъэнхэмкIэ ищыкIэгъэ федеральнэ мылъкур къыхагъэкIыным тишъыпкъэу тыдэ­лэжьэщт», — хигъэунэфыкIыгъ КъумпIыл Мурат.

АР-м и ЛIышъхьэ ипресс-къулыкъу