Чъыгхэр хэбзэнчъэу ишъумыупкIых!

ИлъэсыкIэ мэфэкIхэр къызыщыблагъэхэрэм ехъулIэу нэрат (хвое) чъыг­хэр хэбзэнчъэу раупкIых. Ащ пэшIуекIогъэным пае хэушъхьафы­кIыгъэ Iофтхьабзэхэр илъэс къэс зэхащэх.

Адыгэ Республикэм мэзхэмкIэ и ГъэIорышIапIэ а мэфэкIхэм ялъэхъан нэратхэм якъэу­хъумэн гъэлъэшыгъэным фэ­гъэхьыгъэ унашъо Адыгэ Рес­публикэм мэзхэмкIэ и ГъэIорышIапIэ иин­спекторхэм хэгъэгу кIоцI Iоф­хэмкIэ Минис­терствэм икъулыкъушIэхэр ягъусэхэу оперативнэ-пэ­шIо­­ры­гъэшъ Iофтхьа­бзэхэр зэхащэх. Хэбзэнчъэу чъыгхэр изыупкIыхэрэр гъэунэфыгъэным ыуж итых. Тыгъэгъа­зэм и 31-м нэс гъэлъэшыгъэ шIыкIэм тетэу Iоф ашIэщт.

Адыгэ Республикэм мэзхэмкIэ и ГъэIорышIапIэ къызэрэщытаIуагъэмкIэ, илъэс къэс псэупIэ зэфэшъхьафхэм ямэз­хэм ыкIи гъогу гъунэхэм нэрат чъыг цIыкIухэр — кавказ пихтар зыдэщытыгъэ тэкъэжъыехэр къащэлъагъох. Ащ къеушыхьаты илъэсыкIэ чъыг цIыкIухэр хэ­бзэнчъэу зэрэраупкIыгъэхэр.

Шъугу къэдгъэкIыжьын, илъэ­сыкIэр къызыщыблагъэрэм ехъу­лIэу чъыгхэр, нэрат чъыг­хэри ахэм зэрахэтхэу, хэбзэнчъэу изыупкIыхэрэм Урысые Федерацием и Уголовнэ ко-декс ия 260-рэ статья диштэу административнэ е уголовнэ пшъэдэкIыжь арагъэхьыщт. Административнэ тазырыр сомэ мини 4-м къыщегъэжьагъэу мин 400-м нэсы. Чъыгыр раупкIы зэхъум техникэ зэфэшъхьафхэр агъэфедагъэмэ, административнэ тазырыр сомэ мин 500-м нэсыщт.

Хэбзэнчъэу зекIуагъэм тазырыр зэритыщтым имызакъоу, мэз хъызмэтым чIэнагъэу фи­шIыгъэр ыпщыныжьыщт. Ар минитфым къыщегъэжьагъ.

ДЕЛЭКЪО Анет.