Тыгъэгъазэм и 20-м шъолъыр проектэу «Культура» зыфиIорэм ишапхъэ илъэу, лъэпкъ проектэу «Культурная среда» къыдыхэлъытагъэу, Тэхъутэмыкъое районым ит къуаджэу Пэнэхэс мэфэкI шIыкIэм тетэу апэрэ модельнэ тхылъеджапIэр къыщызэIуахыгъ.
Iофтхьабзэм хэлэжьагъэх: Адыгэ Республикэм культурэмкIэ иминистрэ игуадзэу Кушъу Светланэ, муниципальнэ гъэпсыкIэ зиIэ «Тэхъутэмыкъое районым» ипащэ игуадзэу Бэгъ Саидэ, шъолъыр проект офисым иIэшъхьэтетэу, АР-м и Лъэпкъ тхылъеджапIэ ипащэу Къыкъ Бэлэ, Адыгеим икъэралыгъо ыкIи муниципальнэ тхылъеджапIэхэм япащэхэр.
Модельнэ тхылъеджапIэхэр пшъэрылъыбэ зэшIозыхырэ чIыпIэ, уахътэм диштэрэ псэуалъэ ыкIи тхылъеджэпIэ Iэмэ-псымакIэхэмкIэ ушъэгъэ гупчэ хъугъэ. ГъэцэкIэжьын IофшIэнышхоу щыкIуагъэхэм ауж зэрагъэфедэщтымкIэ мэхьанэ зиIэ чIыпIэхэр яIэ хъугъэх, тхылъеджапIэм ифонд тхылъ 2209-рэ къыхэхъуагъ:
— Теплъэ дахэ зиIэ унэу тхылъыр къызщаратырэр агъэпсыгъ, цIыфхэм гъэпсэфыпIэ-IофшIапIэ планшетыр ыкIи ноутбукыр хэтэу агъотыгъ. Мы унэшхом гъэзетхэр ыкIи журналхэр щызэгъэкIугъэх.
Джащ фэдэу Iофтхьэбзэ зэфэшъхьафхэмкIэ агъэфедэрэ интерактивнэ панелыр — лъэныкъуабэкIэ зишIуагъэ къакIорэр унэм ит; зэIукIэгъухэр, Iэнэ хъураехэр, темэ гъэшIэгъонхэмкIэ конференциехэр, цIыф гъэсагъэхэр къарагъэблагъэзэ зэхащэнхэ амал джы яI. ТхылъеджэпIакIэм технологиякIэхэм чIыпIэ щыряI: компьютерхэм, Интернетым яшIуагъэкIэ джы лъэпкъ электроннэ тхылъеджапIэм зырапхын алъэкIыщт. «Консультант плюс» зыфаIорэм Урысыем исправочнэ правовой системэ лъыIэсынхэ амал къареты. Анахь тхылъеджэкIо цIыкIухэм апае залыкIэ «Детский мегаполис» ыIоу, тхылъеджапIэм чIыпIэу ыубытырэм зэрэхагъэхъуагъэм ишIуагъэкIэ, къыщызэIуахыгъ.
Анахь узыгъэгушIорэр кIэлэцIыкIу шъолъырым мультистудие зэриIэр ары — ар творческэ студиеу щыт, ащ ихьатыркIэ кIэлэцIыкIухэм ежь-ежьырэу яапэрэ мультфильмэхэр зэхагъэуцонхэ, якIэсэ пшысэ геройхэр къагъэгущыIэнхэ алъэкIыщт. КIэлэцIыкIухэм атегъэпсыхьэгъэ интерактивнэ джэхашъор ыкIи глобусыр, шлемыр лъэшэу тхылъеджэ цIыкIухэм къашъхьэпэщтых зыфэдэ щымыIэ зекIохэр тхылъеджапIэр къамыбгынэу, виртуальнэ шIыкIэм тетэу ашIынхэмкIэ.
ДжырэкIэ модельнэ тхылъеджапIэр зэрэщытэу агъэкIэжьыгъэ чIыпIэ ин, ащ IэпкIэ-лъапкIэу классическэ тхылъеджапIэм ишапхъэхэр ыкIи цифрэхэм кIэу япхыгъэхэр щызэращэлIагъэх.
Темрыкъо Зарем.
Къоджэ тхылъеджапIэм ипащ.