Илъэс къэс хэгъэгум щызэхащэрэ фестиваль-зэнэкъокъоу «Новые имена» зыфиIорэр Ростов-на-Дону щыкIуагъ.
Сэнаущыгъэ зыхэлъхэр къыхэгъэщыгъэнхэм, зэнэкъокъухэм ацIэ щыIуным, кIэлэцIыкIухэмрэ ныбжьыкIэхэмрэ язэфыщытыкIэхэр гъэпытэгъэнхэм зэнэкъокъур афэгъэхьыгъ.
Тэхъутэмыкъое районым иансамбли 2 фестивалым хэлэжьагъ. Лъэпкъ къэшъокIо ансамблэу «Адыгэхэм» хэт къэшъокIо купэу «Нэфылъэр», клубхэм яIофшIэн хэлэжьэрэ ансамблэу «Насыпыр» зэнэкъокъухэм къащыхагъэщыгъэх.
«Нэфылъэм» ихудожественнэ пащэу, Адыгэ Республикэм культурэмкIэ изаслуженнэ IофышIэу КIэмыргъой Азэмат искусствэм щызэлъашIэ. Къэрэщэе-Щэрджэсым икъуаджэу Хьабэз къыщыхъугъ. КультурэмкIэ ыкIи искусствэхэмкIэ Къэрэщэе-Щэрджэс къэралыгъо училищэу Даур Аслъан ыцIэ зыхьырэр къыухыгъ. 2013-рэ илъэсым къыщегъэжьагъэу А. КIэмыргъоим Тэхъутэмыкъое районым Iоф щешIэ.
Адыгэ лъэпкъ къэшъокIо ансамблэу «Адыгэхэм» яхудожественнэ пащэу КIэмыргъой Азэмат ыгъэсэрэ ныбжьыкIэхэм тагъэгушIо. 2014-рэ илъэсым къыщыублагъэу хэгъэгу, дунэе зэIукIэгъухэм щытхъуцIэхэр къащыдехых.
Этнопроектэу «Адыгэхэм» А. КIэмыргъоир ипащ. Проектым ирежиссерыр Ацумыжъ Рустам. Лъэпкъ шэн-хабзэхэр, тарихъыр нахьышIоу ашIэным, ныбжьыкIэхэм пIуныгъэ дэгъу ятыгъэным Iофтхьабзэм изэхэщакIохэр пылъых.
Москва, Шъачэ, Краснодар, Налщык, Щэрджэскъалэ, Мыекъуапэ, Тыркуем икъалэхэу Бурсэ, Инигель, нэмыкIхэм лъэпкъ проектэу «Адыгэхэр» къащагъэлъэгъуагъ. Ансамблэм опытэу иIэр зэрагъашIэ ашIоигъоу искусствэм иIофышIэхэр бэмэ къакIэупчIэх.
— Хабзэм икъулыкъушIэхэмрэ ансамблэм хэтхэмрэ зэгурыIоныгъэ азыфагу илъ, IофшIэкIэшIум «Адыгэхэр» лъыхъухэзэ, лъэпкъ шэн-хабзэхэр щыIэныгъэм щыпхыращы. Тэхъутэмыкъое районым, Адыгэ Республикэм лъэпкъыбэ зэращыпсэурэр къыдалъытэзэ, искусствэм ибаиныгъэ концертхэм къащагъэлъагъо, — къытиIуагъ Тэхъутэмыкъое районым иадминистрацие культурэмкIэ и ГъэIорышIапIэ ипащэу, Адыгэ Республикэм искусствэхэмкIэ изаслуженнэ IофышIэшхоу Ацумыжъ Рустам.
ШIухьафтын шъхьаIэхэр
Ростов-на-Дону щыкIогъэ зэнэкъокъум зэхэщакIо фэхъугъэх искусствэм идунай икъызэIухын дэлажьэхэу Дон къэралыгъо техническэ университетыр, театрэм изыгъэсапIэу «Браво ДГТУ» зыфиIоу Урысыем изаслуженнэ артисткэу Анита Цой зипащэр.
Зэнэкъокъум изэхэщэнкIэ IэпыIэгъу къафэхъугъэх Ростов хэкум гъэсэныгъэмкIэ и Министерствэ, Ростов хэкум культурэмкIэ и Министерствэ, къалэу Ростов-на-Дону иадминистрацие.
Тэхъутэмыкъое районым иансамблэу «Адыгэхэм», художественнэ пащэр КIэмыргъой Азэмат, Пэнэхэс къоджэ культурэм щысэ зытырахырэ иансамблэу «Насыпым», художественнэ пащэр Мерэмыкъо Элан, шIухьафтын шъхьаIэу Гран-прир ыкIи апэрэ чIыпIэр къыщыдахыгъэх.
Я VII-рэ Дунэе фестиваль-зэнэкъокъум икIэух 2022-рэ илъэсым гъэтхапэм Москва щыкIощт. Тэхъутэмыкъое районым иансамблитIу Урысыем икъэлэ шъхьаIэу Москва щызэхащэщт кIэух зэхахьэм хэлэжьэщтых.
Лъэпкъ къэшъокIо ансамблэхэу «Адыгэхэм», «Насыпым» тафэгушIо. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм пэгъокIыхэзэ, тиансамблэхэм дунэе зэнэкъокъум гъэхъагъэ щашIынэу, Адыгэ Республикэм ищытхъу искусствэм лъагэу щаIэтынэу афэтэIо.
Сахьидэкъо Нурбый.