«Налмэсыр» Налщык щэуджы

Адыгеим и Къэралыгъо академическэ къэшъокIо ансамблэу «Налмэсым» иконцертхэр тыгъэгъазэм и 14 – 15-м Налщык щыкIощтых.

«Налмэсыр» зызэхащагъэр илъэс 85-рэ хъугъэ. Ащ фэгъэ­хьыгъэ концертхэр зэфэшъхьаф едзыгъуитIу хъухэу апэрэу Налщык къыщитыщтых.

Дунаим щыпсэурэ адыгэхэм лъэшэу агу рихьырэ «Налмэсым» лIэужхэр зэфещэх, лъэпкъ­хэм языкIыныгъэ егъэпытэ. Къашъоу къыгъэлъагъохэрэмкIэ лъэпкъым итарихъ, искусствэ баеу иIэр цIыфхэм къафеIуатэ. БлэкIыгъэ уахътэм зыфигъэзэжьызэ, неущрэ мафэм фэкIо.

«Зы бзэ, зы хабзэ, зы лъэпкъ» зыфиIорэ концертыр «Налмэсымрэ» Къэбэртэе- Бэлъкъарым иансамблэ цIэрыIоу «Кабардинкэмрэ» зэгъусэхэу Мыекъуапэ, Налщык къащатыгъэх. Зэлъэпкъэгъухэм яискусствэ хэхъоныгъэу ышIырэр зэ­хахьэхэм ащытэлъэгъу.

Адыгэ Республикэм щытхъур къыфэзыхьырэ «Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджае Аслъан къытиIуагъ зэкъош рес­публикэхэм яансамблэхэм язэхэт концертхэр тапэкIи зэрэзэхащэщтхэр. Лъэпкъхэр зэфэзыщэрэ искусствэм зырагъэушъомбгъущт.

ЕмтIылъ Нурбый.