Лъэпкъ пэпчъ анахь къахэзыгъэщэу, зыгъэдахэу иIэх ежь икъашъохэр. Тэри, адыгэхэм, ащ фэдэу тилъэпкъ къашъохэм ижъыкIэ къыщегъэжьагъэу тигъашIэ къыддагъашIэ, тигъогогъух тагъэгушхоу.
Къашъом цIыфым ыпкъышъолкIэ шIогъабэ къехьы. Ипсауныгъэ егъэпытэ, сабыим ыпкъ занкIэу ыIыгъыным регъасэ, ащ фэIорышIэ. ИцIыкIугъом къыщегъэжьагъэу кIэлэцIыкIур къашъом фэщагъэу пIугъэным мэхьанэшхо иI. ЕтIани ыгукIэ ащ фаблэу, адыгэхэм «лъым хэлъэу къэхъугъ» зыфаIорэм фэдэу щытмэ, сабыир ащ фэбгъэсэныр нахь IэшIэх.
Мыекъопэ гурыт еджапIэу N 22-м чIэс кIэлэцIыкIухэр къашъом фэсэгъасэх. ТикIэлэцIыкIухэм къашъом имэхьанэ, тилъэпкъ культурэ, тишъуашэхэм ядэхагъэ зэхашIэу пIугъэнхэм лъэшэу сынаIэ тет, ар сипшъэрылъэу сэлъытэ. ТикъэшъокIо куп ыцIэр «Сэлам».
Сэ сшъхьэкIэ къашъор сищыIэныгъ сIомэ, сыхэукъонэп, сыда пIомэ ар сэнэхьатэу сицIыкIугъом къыхэсхыгъ, илъэсыбэрэ ащ сырылэжьагъ. Джы непи сыгукIэ сызыфэщэгъэ а IофшIэныр лъысэгъэкIуатэ. Сыд фэдэрэ культури къашъом къегъэбаи. ЦIыфым ишэни ащ зызэблырегъэхъу. Гушхо иIэу цIыфхэм къахэхьанышъ, сабыим ыгу щыхъэрэр, ар къызэригушIукIырэр къыгъэлъэгъонэу, иIэпэIэсэныгъэ пчэгум къырилъхьанэу амал къашъом ащ къыреты.
ЦIыфхэм аIо угукIэ пшIэрэ Iофым гухахъо хэбгъуатэу щытмэ, ар къызэрэбдэхъущтым щэч хэмылъэу, лъэбэкъушIухэр пшIыхэзэ ыпэкIэ улъыкIотэщтэу. Арэущтэу тэри тиIоф тызэрэпылъыр ары къызхэкIыгъэр зэнэкъокъубэу тызхэлэжьагъэхэм хагъэунэфыкIырэ чIыпIэхэр къащытфагъэшъошэнхэр ыкIи щытхъу тхылъыбэхэмкIэ такъыхагъэщыныр.
СиIофшIэн, сисэнэхьат шIулъэгъоу афысиIэм кIуачIэ къысхелъхьэ, ар зэрэлъызгъэкIотэщтым, къашъом идэхагъэ, ащ имэхьанэ тиныбжьыкIэхэм зэхашIэу пIугъэнхэм нахь гъэшIэгъонэу зызэрезгъэушъомбгъущтым, лъэбэкъушIухэр зэрэтшIыщтхэм тыпылъ. А мурад дахэм тапэкIи сыфэлэжьэн гухэлъ сиI. Тилъэпкъ культурэ ибаиныгъэ уасэ фэтшIын фае, ныбжьыкIэхэми а зэхашIэр ахэтлъхьаныр типшъэрылъ.
Адыгэ Республикэм изаслуженнэ артистэу Теуцожь Алый.