ХэшыпыкIыгъэ командэм аштагъэр

Хэгъэгум дзюдомкIэ изэнэ­къокъу шэкIогъум и 20 — 26-м Екатеринбург щыкIуагъ.

Илъэс 21-м нэс зыныбжь кIалэхэр, пшъа­шъэхэр алырэгъум щызэIукIагъэх. Урысыем ишъолъыр 58-мэ бэнэкIо 622-рэ къары­кIыгъагъ. Ащ фэдиз спортсмен зэнэкъокъум хэлажьэу зыкIи къыхэкIыгъэп.

Адыгэ Республикэм ихэшыпыкIыгъэ коман­дэ хэтэу Татьяна Шаталовар килограмм 52-м нэс къэзыщэчыхэрэм янэкъокъугъ. Купым пшъэшъэ 37-рэ щызэIукIагъ.

Татьяна Шаталовам ящэнэрэ чIыпIэр къы­дихи, джэрз медалыр къыфагъэшъошагъ. Адыгэ Республикэм изаслуженнэ тренерэу Нэпсэу Бислъан ипащэу илъэс 17-м ит пшъа­шъэм хэгъэгум изэнэкъокъу зыфигъэхьа­зырыгъ.

Адыгэ къэралыгъо университетым и Мые­къопэ къэралыгъо гуманитарнэ-техническэ колледж Татьяна Шаталовар щеджэ. Урысыем и Спартакиадэу Ермэлхьаблэ щы­кIуагъэм зыхэлажьэм, ятIонэрэ чIыпIэр къы­щыдихыгъ, Урысые Федерацием спортымкIэ имастер хъугъэ.

— Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм Тать­яна Шаталовар ибэнакIу, Адыгэ къэралыгъо университетым изыгъэсапIэ иIэпэIэ­сэныгъэ щыхегъахъо, — къытиIуагъ тренер-кIэ­лэегъаджэу Нэпсэу Бислъан.

Татьяна Шаталовар Урысыем дзюдомкIэ ихэшыпыкIыгъэ ныбжьыкIэ командэ аштагъ, дунэе зэIукIэгъухэм ахэлэжьэщтхэм ащыщ.

Екатеринбург щыкIогъэ зэнэкъокъум Бэгъ Аслъан щыбэнагъ. Нарт шъаом кг 100 къэзыщэчыхэрэм якуп я 5-рэ чIыпIэр къыщыдихыгъ. Адыгэ къэралыгъо университетым А. Бэгъыр щеджэ, тренерхэу Роман Оробцовыр, Беданыкъо Рэмэзан ипащэх.

— Бэгъ Аслъан Екатеринбург медаль къыщыдимыхыгъэми, иIэпэIэсэныгъэ зэрэхигъахъорэр къыдалъыти, Урысыем ихэшыпыкIыгъэ ныбжьыкIэ командэ хагъэхьагъ, — къытиIуагъ дзюдомкIэ спорт еджапIэм ипащэу, Адыгеим изаслуженнэ тренерэу Бастэ Сэлым.

Сурэтым итхэр: Татьяна Шаталовар джабгъумкIэ апэрэу щыт.