Ным и Мафэ къызщихьащтым ехъулIэу сабыибэ зыпIурэ ныхэм афэгушIуагъэх. Адыгэ Республикэм и Правительствэ и Унэ сабыитф ыкIи ащ нахьыбэ щытхъу хэлъэу зыпIугъэ ныхэм шIухьафтыни 10-рэ дипломэу «Материнская слава» зыфиIорэмрэ аратыгъэх.
Адыгеим и ЛIышъхьэу КъумпIыл Мурат ахэм афэгушIозэ къызэрэхигъэщыгъэмкIэ, зэгурыIоныгъэ зэрылъ унэгъошхохэр республикэм щыпсэурэ цIыф пстэухэмкIи щысэшIух. Залым чIэс ныхэу сабыибэ зыпIухэрэм унэгъо Iофымрэ хэбзэ IофшIэнымрэ гъэхъагъэ хэлъэу зэдэбгъэцэкIэнхэ зэрэплъэкIыщтыр къагъэлъэгъуагъ.
«Ащ фэдэ IофшIэн, ащ фэдэ пшъэрылъышхо зэшIозыххэрэм лъытэныгъэ ин афэтшIын ыкIи IэпыIэгъу тафэхъун фае. Шъо шъушъхьэкIэ ыкIи шъуиунагъохэмкIэ ухъумагъэу шъузэрэщытыр зэхэшъушIэным, къэралыгъом шъуищыкIэгъэ IэпыIэгъур къышъуитыным, шъутемыщыныхьэу шъуапэкIэ шъуплъэным апае тфэшIэщтыр зэкIэ тшIэным тыпылъ. Ащ фэдэ Iофыгъохэм язэшIохын федеральнэ ыкIи шъолъыр хабзэхэм япащэхэм яIофшIэнкIэ апшъэрэ мэхьанэ араты. НепэкIэ уз щынагъоу зызыушъомбгъугъэр къызщежьагъэм къыщыублагъэу хэгъэгум и Президент унагъохэм IэпыIэгъу ятыгъэным мэхьанэшхо реты, цIыфхэм IэпыIэгъу ятыгъэнымкIи IофтхьэбзакIэхэм ар кIэщакIо афэхъугъ. Тэри тиреспубликэкIэ игъом ахэр дгъэцэкIагъэх», — къы-Iуагъ КъумпIыл Мурат.
КIэлэцIыкIухэр зэрыс унагъохэм, ахэм къахеубытэ лъэпкъ проектэу «Демографиери», социальнэ IэпыIэгъу аратыным пае тиреспублики Iофтхьэбзэ гъэнэфагъэхэр щызэшIуахых. Ахэм ащыщых апэрэ сабыир къызыхъукIэ мазэ къэс аратырэ ахъщэр, ящэнэрэ ыкIи ащ къыкIэлъыкIорэ сабыйхэр къызыхъухэкIэ зэтыгъо сомэ мин 50-у аратырэр.
Илъэсэу икIыгъэм къыщыублагъэу ящэнэрэ ыкIи ащ къыкIэлъыкIорэ кIэлэцIыкIухэр къызыхъухэкIэ урыпсэунымкIэ анахь ахъщэ макIэу агъэнэфагъэр мазэ къэс (сабыим ыныбжь илъэсищ охъуфэ) араты. Илъэсэу икIыгъэм щылэ мазэм и 1-м къыщыублагъэу илъэси 3-м къыщегъэжьагъэу илъэси 7-м нэс зыныбжь кIэлэцIыкIухэм мазэ къэс ахъщэ IэпыIэгъу аратызэ ашIы.
Сабыибэ зэрыс унагъохэм апае хэушъхьафыкIыгъэ Iофтхьабзэхэри щыIэх, гущыIэм пае, ыпкIэ хэмылъэу чIыгу Iахьхэр аратых.
Республикэм сабыибэ зэрыс унагъохэм япчъагъэ илъэс къэс нахьыбэ щэхъу: илъэсэу икIыгъэм ахэр унэгъо 7145-рэ хъущтыгъэмэ, непэ — унэгъо 7610-рэ.
«Iофтхьабзэхэр зэкIэ цIыфхэм ящыIакIэ нахьышIу хъуным фытегъэпсыхьагъэх. ФэгъэкIотэныгъэхэмрэ ахъщэ IэпыIэгъухэмрэ япхыгъэ тхылъхэм ягъэпсын амал зэриIэкIэ нахь къызэрыкIоу ыкIи Iэрыфэгъоу шIыгъэным анаIэ тырагъэты. ТапэкIи бзылъфыгъэхэм кIэлэцIыкIухэм япIун дакIоу ежьхэми Iоф гъэнэфагъэ ашIэным иамал яIэным пае тфэлъэкIыщтыр зэкIэ зэшIотхыщт. Ащ пае кIэлэцIыкIу IыгъыпIэхэр, еджапIэхэр, культурэм иунэхэр, спорт комплексхэр тэшIых, бзылъфыгъэм сэнэхьат гъэнэфагъэм тегъэпсыхьагъэу иамалхэр ыгъэфедэнхэм иIофыгъохэр зэшIотэхых. Хэтрэ ны-ти зыфаер исабый щыIэкIэшIу иIэныр ары. Тэ типшъэрылъыр — яцыхьэ зытелъыжьынымкIэ цIыфхэм амал гъэнэфагъэхэр ядгъэгъотынхэр ары», — къыхигъэщыгъ Адыгеим и ЛIышъхьэ.
Республикэм и ЛIышъхьэ игущыIэ къызщиухыщтым зэкIэ къэзэрэугъоигъэхэм ным ипшъэрылъ дэгъоу зэрагъэцакIэрэм, кIэлэцIыкIухэм зэрищыкIагъэм тетэу анаIэ зэратырагъэтырэм, унагъом игъэпытэн яIахьышхо зэрэхашIыхьэрэм апае зэрафэразэр къыIуагъ.
Ащ нэужым шIухьафтынхэр аратыжьыгъэх. Дипломэу «Материнская слава» зыфиIорэмрэ сомэ мини 100 хъурэ шIухьафтынхэмрэ къыкIэлъыкIохэрэм аратыгъэх: Кощхьэблэ районымкIэ сабыи 9 зыпIурэ Псэунэ Нурьят; Шэуджэн районымкIэ сабыи 6 зыпIурэ Къатмэс Саидэ; къалэу МыекъуапэкIэ сабыи 5 зыпIурэ Аксенова Галинэ; Теуцожь районымкIэ сабыи 5 зыпIурэ Хъот Светланэ; къалэу МыекъуапэкIэ сабыи 5 зыпIурэ ЛIэхъусэжъ Седхъан; Мыекъопэ районымкIэ сабыи 5 зыпIурэ Агеева Наталье; къалэу МыекъуапэкIэ сабыи 5 зыпIурэ Пашкова Ольгэ; Джэджэ районымкIэ сабыи 5 зыпIурэ Бригидина Наталье; Тэхъутэмыкъое районымкIэ сабыи 5 зыпIурэ ШъэуапцIэкъо Заремэ; АдыгэкъалэкIэ сабыи 5 зыпIурэ ШъонтIыжъ Зарэ.
Ащ нэужым къекIолIагъэхэм яшIоигъоныгъэхэр къаIуагъэх. Унэгъо Iужъухэм анаIэ зэратыригъэтырэм ыкIи IэпыIэгъу зэрафэхъурэм апае республикэм и ЛIышъхьэ зэрэфэразэхэр шIухьафтын зэратыгъэхэм къаIуагъ, ягъэхъагъэхэмрэ ягухэлъхэмрэ ар ащагъэгъозагъ.
КIэлэцIыкIухэр еджапIэхэм зэращагъашхэхэрэм, кIэлэцIыкIу IыгъыпIэхэм ясабыйхэр аратынхэмкIэ, гъэсэныгъэ тедзэ языгъэгъотырэ учреждениехэм ачIагъэхьанхэмкIэ амалэу яIэхэм республикэм и ЛIышъхьэ защигъэгъозагъ. Джащ фэдэу республикэм ипсэупIэхэм тапэкIи хэхъоныгъэу ашIыщтым иIофыгъохэр къаIэтыгъэх.
КъумпIыл Мурат зэдэгущыIэгъум икIэуххэр зэфихьысыжьхэзэ къызэрэхигъэщыгъэмкIэ, республикэм щыпсэурэ пстэуми, анахьэу сабыйхэр зэрыс унагъохэм, ящыIакIэ нахьышIу шIыгъэныр республикэм ихэбзэ къулыкъу пстэуми яIофшIэнкIэ анахь шъхьаIэу къэнэжьы.
АР-м и ЛIышъхьэ ипресс-къулыкъу