Яхэгъэгу шIу алъэгъуным фэIорышIэ

Урысыем гъэсэныгъэмрэ шIэныгъэмрэкIэ и Министерствэ ыкIи Ростов хэкум и Правительствэ яIэпыIэгъукIэ студентхэм я Урысые дзэ-пат­рио­тическэ джэгунэу «Зарницэм» икIэух зэнэкъокъу шэкIогъум и 18-м къыщегъэжьагъэу и 21-м нэс къалэу Ростов-на-Дону щыкIуагъ.

Зэнэкъокъум хэлэжьагъэх Урысыем ишъолъыр 45-мэ текIоныгъэ къащыдэзыхыгъэ нэбгырэ 500 фэдиз.

2014-рэ илъэсым къыщегъэ­жьагъэу Урысыем иныбжьыкIэхэм я Союз икIэщакIоу сту­дентхэм я Урысые дзэ-пат­риотическэ джэгунэу «Зар­ницэр» рагъэкIокIы. Мы Iоф­тхьабзэмкIэ зэхэщакIохэм пшъэ­рылъэу яIэр ныбжьыкIэхэм яхэгъэгу шIу алъэгъоу къэ­тэджынхэр ары. Илъэс къэс шъолъыр проектым нэбгырэ мини 4 фэдиз хэлажьэ.

Урысые кIэух зэнэкъокъур едзыгъуи 10-кIэ зэтеу-тыгъагъ: «Егъэджэн гупчэр», «Спец­наз», «Къэгъэ­нэ­жьакIу», «ЛIыхъужъ! ЛIыблэ­нагъэ! Щытхъу!» «Марш­-бросок», «Кибер-атака» «Парашютист» «Зэнэкъокъу», «Твор­ческий» ыкIи едзыгъоу «Хэгъэгум итарихъ инэкIубгъохэр».

ЗэкIэ ушэтынхэр зыфэгъэ­хьыгъагъэр ошIэ-дэмышIэ ыкIи гузэжъогъу Iоф къэхъумэ зэрэзекIощтхэр ашIэмэ уплъэкIу­гъэныр, дзэ къулыкъум ныб­жьыкIэхэр фэгъэхьазырыгъэнхэр, цIыфым ищыIэныгъэ щынэгъончъэу щытыным ылъэныкъо­кIэ шIэныгъэу ыкIи шIыкIэу аIэкIэлъыр ушэтыгъэныр, нэ­мыкIхэри. Джащ фэдэу ныбжьыкIэхэм япатриотическэ зэхашIэ гъэпытэгъэным, псауныгъэм зэрар езыхырэ шIыкIэхэр щыгъэзыегъэнхэм, гражданскэ еплъыкIэу яIэм хэгъэхъогъэным проектыр фэIорышIэ.

«Активистхэр ыкIи сообществэм щыщхэр тарихъыр кIатхыкIыжьыным, ащ моральнэ уасэу иIэр тэрэзыджэу къа­гъэлъэгъоным ыуж итых. Ащ фэдэхэм шIэныгъэ тэрэз зэра­IэкIэмылъыр игъом къыхэгъэщыгъэн ыкIи ныбжьыкIэхэр гъогу пхэндж тезыщэ зышIоигъо­хэм ащыухъумэгъэнхэ фае. «Зарницэм» мурад шъхьаIэу иIэр шъыпкъагъэ хэлъэу тари­хъыр ныбжьыкIэхэм ягъэшIэ­гъэныр, Хэгъэгум и ЛIыхъужъхэм, иухъумакIохэм уасэ афа­шIэу пIугъэнхэр, Урысыем ицIы­фэу зэрэщытхэм рыгушхо­хэу къэгъэтэджыгъэнхэр ары, — къыIуагъ УФ-м и Общест­веннэ палатэ хэтэу, ныбжьыкIэхэм я Урысые Союз итхьаматэу П. Красноруцкэм.

2014-рэ илъэсым къыще­гъэжьагъэу апшъэрэ гъэсэныгъэ зыщызэрагъэгъотырэ органи­зации 100-мэ якомандэ 200 фэдиз проектым хэлэжьагъ. НыбжьыкIэхэм ядзэ-патриотическэ пIуныгъэ епхыгъэ Iоф­шIэныр гъэлъэшыгъэныр ыкIи пIуныгъэ мэхьанэ зиIэ ныбжьыкIэ объединениехэм зягъэу­шъомбгъугъэныр ары мурад шъхьаIэу яIагъэр.

Шъугу къэдгъэкIыжьын, рес­публикэ дзэ-патриотическэ джэгунэу «Зарницэр» Мые­къопэ районым ит къутырэу Шэнтыкъо щыкIуагъ. ТекIоныгъэм фэбэнагъэх Адыгеим ирайон зэфэшъхьафхэм къарыкIыгъэ патриот ныбжьыкIэхэу илъэс 14-м къыщегъэжьагъэу илъэс 17-м нэс зыныбжьхэр.

БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Рес­публикэм щыIэм ипатриот клу­бэу «Вертикаль» зыфиIорэм республикэ дзэ-спорт джэгунэу «Зарницэм» текIоныгъэ къыщыдихыгъ ыкIи кIэух зэнэ­къокъоу Ростов-на-­Дону щыкIуагъэм Адыгеир къы­щигъэлъэ­гъуагъ.

ГъэIорышIапIэм къызэрэща­IуагъэмкIэ, илъэс пчъагъэ хъугъэу спецназым иофицерхэр япащэу клубэу «Вертикалым» икурсантхэм республикэ едзыгъом текIоныгъэ къыщыдахы.

— Клубым къычIигъэкIыгъэ­хэм ащыщых непэ бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и Академие икурсантхэр, зыкъэухъумэжьынымкIэ Министерствэм иапшъэрэ еджапIэ чIэсхэр ыкIи Урысыем и МВД, ведомствэ зэфэшъхьаф­хэм Iоф ащызышIэхэрэр. КIэлэцIыкIухэм ыкIи пшъэшъэ­жъыехэм ухьазырыныгъэ дэгъу яIэнымкIэ джэгунэу «Зарницэр» егъэжьэпIэшIоу щыт, хэбзэу­хъумэкIо къулыкъухэм Iоф аща­шIэнымкIэ IэпыIэгъушIу къафэ­хъу, — къыIуагъ клубым иинструктор.

КIАРЭ Фатим.