Пащэр хадзыгъ

Урысыем футболымкIэ и Премьер-лигэ ипрезидентэу Ашот Хачатурянц хадзыгъ.

Хэгъэгум футболымкIэ и Союз щыкIогъэ зэхахьэм хэлэжьагъэхэм зыкIыныгъэ ахэлъэу Ашот Хачатурянц президентэу зыхадзым, IофшIэным зэхъокIыныгъэу фишIыщтхэм къатегущыIагъ.

Командэхэм ешIэгъу пчъагъэу хэгъэгум изэнэкъокъу щыряIэщтхэр нахьыбэ шIыгъэнхэ фаеу А. Хачатурянц къыIуагъ. IэкIыб къэралхэм къарыкIырэ ешIакIохэу командэхэм ахэтыщтхэм япчъагъэ ехьылIагъэу хэушъхьафыкIыгъэ унашъохэр аштэщтых.

Урысыем ифутбол шэпхъэ лъагэхэм адиштэу къэIэтыгъэным, футболым зегъэушъомбгъугъэным, нэмыкI Iофыгъохэу агъэцэкIэщтхэм игъэкIотыгъэу А. Хачатурянц къатегущыIэнэу зегъэхьазыры.