Адыгеир къыхагъэщыгъ

Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм дэжь щызэхэщэгъэ Советым изэхэсы­гъоу тыгъуасэ щыIагъэм Владимир Устиновым тхьамэтагъор щызэри­хьагъ. Видеоконференцие шIыкIэм тетэу Iофтхьабзэр зэхащагъ, Адыге­им ыцIэкIэ республикэм и ЛIышъхьэу КъумпIыл Мурат ащ хэлэжьагъ.

Джащ фэдэу республикэм ыцIэкIэ зэхэсыгъом хэлэжьа­гъэх Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм иаппарат Адыгэ Респуб­ликэмкIэ ифедеральнэ инспектор шъхьаIэу Сергей Дрокиныр, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, министерствэ­хэмрэ хэбзэухъумэкIо къулы­къухэмрэ япащэхэр.

Лъэпкъ, федеральнэ проектхэр Къыблэ федеральнэ шъо­лъырым зэрэщагъэцакIэхэрэм шIуагъэу къытырэм мыщ щытегущыIагъэх.

«Хэгъэгум социальнэ политикэу Къыблэ федеральнэ шъо­лъырым щызэрихьэрэм щыщ социальнэ мэхьанэ зиIэ, цIыф­хэм ящыIэкIэ-псэукIэ зыкъезыгъэIэтыщт лъэпкъ проектхэу «Демографиер», «Гъэсэныгъэр», «Псауныгъэм икъэухъу­мэн», «Экологиер», «ПсэупIэмрэ къэлэ щыIакIэмрэ» зыфи­Iохэрэм ягъэцэкIэн. Мы илъэсым а лъэпкъ проектхэм апае Къыблэ федеральнэ шъолъырым сомэ миллиарди 125-рэ фэдиз къыIэкIэхьанэу къыра­дзэ», — къыIуагъ Владимир Устиновым зэхэсыгъор къызэ­Iуихызэ.

Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм къызэрэхигъэщы­гъэмкIэ, илъэсэу итым иапэрэ мэзибгъу сомэ миллиард 63-м ехъу къызфагъэфедэгъах, пстэумкIи къаIэкIэхьанэу щыт мылъкум ипроцент 51-рэ ар мэхъу. Лъэпкъ проектхэм япхырыщынкIэ анахьэу гъэхъагъэ зышIыгъэхэр Адыгеимрэ (процент 64-рэ) Волгоград хэкумрэ (процент 62-рэ).

Владимир Устиновым зэри­лъы­тэрэмкIэ, лъэпкъ проектхэр Къыблэ федеральнэ шъо­лъырым щыпхырыщыгъэнхэмкIэ анахьэу пэрыохъу къафэ­хъухэрэр зэ­зэгъыныгъэхэм ягъэцэкIэнкIэ пIалъэхэр зэраукъохэрэр, зытемылъытэгъэ IофхэмкIэ мылъкур зэрагъэ­кIодырэр, товархэр къащэф зыхъукIэ хэбзэгъэуцугъэр зэ­раукъорэр ары.

Лъэпкъ, федеральнэ проектхэр Къыблэ федеральнэ шъо­лъырым зыщыпхыращыхэрэ лъэхъаным хэбзэукъоныгъэхэр амышIынхэм тегъэпсыхьэгъэ Iофтхьабзэу зэрахьэхэрэм шIуа­гъэу къатырэм хэбзэухъумэкIо къулыкъухэм ялIыкIохэр къатегущыIагъэх. Лъэпкъ проектхэр зэрагъэцакIэхэрэм шъолъырхэм япащэхэр къащыуцугъэх.

Шъугу къэтэгъэкIыжьы ­лъэпкъ проект 11-мэ адиштэу Адыгеим шъолъыр проект 43-рэ зэрэ­щыпхыращырэр. Ащ нэмыкIэу лъэпкъ проектэу «ЗекIонымрэ хьакIэхэм дахэу апэгъокIыгъэнымрэ» зыфиIорэм къыдыхэ­лъытагъэу республикэм зекIонымкIэ иинфраструктури зеу­-шъомбгъу. Лъэпкъ проектхэм къащыдэлъытэгъэ Iофтхьабзэхэм апае мыгъэ сомэ миллиарди 5,76-рэ къатIупщыгъ, ащ щыщэу сомэ миллиарди 4,58-р къызфагъэфедэгъах.

АР-м и ЛIышъхьэ ипресс-къулыкъу