Экспертхэм яеплъыкIэхэр

Коронавирусым пэшIуекIорэ вакцинациер жъугъэу Урысыем зы­щы­рагъэжьагъэр мэзипшI хъугъэ. Прививкэ зязыгъэшIыгъэхэр непэ анахьэу зыгъэгумэкIыхэрэ Iофыгъохэм ащыщ икIэрыкIэу зыхябгъалъ­хьэмэ хъущт вакцинэм икъыхэхын.ЫпэкIэ зыхалъхьэгъэ вакцинэр агъэфедэщта, хьауми ар зэблахъумэ нахьышIуа? Мы упчIэм специалистхэм­ джэуап къыратыжьы.

УФ-м псауныгъэр къэухъумэгъэнымкIэ и Министерствэ зэрилъытэрэмкIэ, анахь шъхьаIэр прививкэ зябгъэшIыныр ары. Ведомствэм иштат хэмыт терапевт шъхьаIэу Оксана Драпкинам къызэрэхигъэщыгъэмкIэ, ревакцинацием пае къэралы­гъом щатхыгъэ вакцинэхэр зэ-
кIэ бгъэфедэнхэ плъэкIыщт.

Ау ащ иеплъыкIэ бэхэм дырагъаштэрэп. ГущыIэм пае, медицинэ шIэныгъэхэмкIэ докторэу, вирусологэу Анатолий Альтштейн зэрилъытэрэмкIэ, вакцинэхэу «Спутник V» ыкIи «Спутник Лайт» зыфиIохэрэр мыщ дэжьым бгъэфедэнхэр нахьышIу.

Иммунологэу Николай Крючковым ащ фэдэ екIолIакIэр нахь тэрэзэу елъытэ. Экспертым къызэриIуагъэмкIэ, апэ прививкэ зы вакцинэмкIэ зябгъэшIэу, ревакцинациер нэ­мыкIымкIэ пшIымэ зи гумэ­кIыгъо къыпыкIыщтэп. Ау на­хьыбэхэм «Спутник Лайтыр», джащ фэдэу зыныбжь хэкIотагъэхэм, зииммунитет къеIыхыгъэхэм «Спутник V-р» нахь къя­кIунэу специалистым хегъэу­нэфыкIы.

УФ-м псауныгъэр къэухъу­мэгъэнымкIэ иминистрэу Михаил Мурашко зэрилъытэрэмкIэ, илъэс 18 — 60 зыныбжьхэм ревакцинациер «Спутник Лайт» зыфиIорэмкIэ, нахь зыныбжь хэкIотагъэхэм «Спутник V-мкIэ» ашIымэ ишIуагъэ къэкIощт.