IофшIэнми фытегъэпсыхьагъэх

«Дышъэ кIэн» зыцIэ кIэлэцIыкIу къэшъокIо ансамблэу къуаджэу Агуяпэ щызэхэщагъэм цIэ лъапIэу «образцовый» зыфиIорэр къыфаусыгъ.

КъэшъокIо цIыкIухэм яхореографэу Нэгъуцу Сурэ ягъэхъагъэхэмкIэ джыри агъэгушIуагъ. ЯшIу­хьафтынхэм апэрэ шъуашэ зиIэ дипломэу дунэе зэнэ­къокъоу «Витражи осени» зыцIэу къалэу Волгоград щыкIуагъэм къыщыдахыгъэр къахэхъуагъ. Зэнэ­къокъур онлайн шIыкIэм тетэу рагъэкIокIыгъ. Джащ фэдэ Диплом дунэе фес­тиваль-зэнэкъокъоу «Грани таланта» зыцIэрэми къыщахьыгъ, ар Санкт-Петербург щыкIуагъ.

КъэшъокIо коллективым ижъырэ адыгэ къашъохэр дахэу къышIыгъэх, анахь шIухьафтын лъапIэхэр къы­ратыгъэх.

Артист ныбжьыкIэхэр бэмышIэу экологическэ Iофтхьабзэм, Агуй-Шапсыгъэ иIэгъо-благъоу шхъомч чъыгхэр къызщыкIырэ мэз чIэгъхэр къаукъэбзыгъэх.

— Мэзым щыщэу къэдгъэкъэбзэгъэ шъолъырыр мыиныгъэми, пыдзафэу къэтыугъоигъэр макIэп, — къыIотагъ Сурэ. — КIэ­лэцIыкIухэми нахьыжъхэми мэзхэм ямыщыкIэ­гъэжьхэу е зыфэмыежьхэу цIыфхэм къаханэрэр зэрэбэр агъэшIэгъуагъ. Мафэр фэбагъэ, Iофэу ашIэрэм емылъытыгъэу сабыйхэр чэфыгъэх, жьы къабзэм хэтыгъэх. Ахэм зэкIэми ыкIи ныхэу Светлана Ровневам, Юлия Судьинам къызэрэдды­рагъэштагъэмкIэ тафэраз. ТикIалэхэр къызэрэшъо­хэрэм фэдэу IофшIэнми зэрэфэхьазырхэр къагъэлъэгъуагъ.

Ныбэ Анзор.