ЛIыхъужъым ыцIэкIэ

Советскэ Союзым и ЛIыхъужъэу Андырхъое Хъусен а цIэ лъапIэр къыфагъэшъошэным лъапсэ фэхъугъэ лIыхъужъныгъэр зызэрихьагъэр илъэс 80 зэрэхъугъэм фэшI ащ ыцIэкIэ конверт къыдагъэкIыгъ.

Пшызэ шъолъыр щызэлъашIэрэ сурэтышIэу Александр Чечиным ЛIыхъужъым фэгъэхьыгъэ картинэу ышIыгъэм техыгъэ сурэткIэ ар гъэкIэрэкIагъ. ПстэумкIи экземпляр 250000-рэ къыдагъэкIыгъ, ащ щыщэу 50000-р почтэм иотделениеу Адыгеим итхэм атырагощагъ.

Андырхъое Хъусен журналист, политрук, Советскэ Союзым и ЛIыхъужъ. Ар къуаджэу Хьакурынэхьаблэ къыщыхъугъ. 1939-рэ илъэсым къыщыублагъэу хэку гъэзетэу «Социалистическэ Адыгеим» икорреспондентыгъ. ЛIыхъужъныгъэу заом щызэрихьагъэм ыцIэ пытэу тарихъым хигъэуцуагъ.

1941-рэ илъэсым ишэкIогъу мазэ и 8-м Андыр­хъуаер зыхэт ротэр пыим къыдзыхьагъ. Политрукым дзэкIолIэу игъусэхэм зэкIэкIонхэу унашъо афишIи, ежь пыир къызэтыригъэуцуагъ. Гранатэр къыгъауи нэмыц дзэкIолIхэр ригъэукIыгъэх, ежьыри хэкIодагъ.

Андырхъое Хъусен къызщыхъугъэ къуаджэу Хьакурынэхьаблэ саугъэт щыфагъэуцугъ, джы мары ащ ыцIэкIэ конверт къыдагъэкIыгъ. Ащ дэлъэу письмэхэр, открыткэхэр цIыфхэм агъэхьыщтых, къаIукIэщт, тихэгъэгу ичIыпIэ зэфэшъхьафхэм къащырахьакIыщтых. Конверт пэпчъ лIыхъужъныгъэу ащ зэрихьагъэм инэпэеплъ.

Ар къызIэкIэзыгъахьэмэ зышIоигъохэм зэкIэми почтэм иотделениехэм ащыщ къыщащэфын алъэкIыщт.