QR-кодхэр тищыIэныгъэ пытэу къыхэуцощтха?

УФ-м и Правительствэ хэбзэгъэуцугъэхэм япроектитIоу Къэралыгъо Думэм щыхэплъэнхэу къыхилъхьагъэхэм эпидемием илъэхъан тищыIэ­ны­гъэ зэхъокIыныгъэ инхэр фашIыщтых.

Ахэм къызэрадэлъытагъэмкIэ, цIыфхэр бэу зыщызэхэхьэрэ чIыпIэ укIощтмэ, мэшIокум е самолетым уитIысхьащтмэ коронавирусым пэшIуекIорэ вакцинэр зэрэзыхябгъэлъхьа­гъэр е узэрэсымэджагъэр къэзыушыхьатырэ QR-кодыр пIыгъын фае.

Сыда мы зэ­хъо­кIыныгъэхэм ямэхьанэр?

Законыр заштэ­кIэ, ар кIыхьэ-лыхьэ зэрамышIыщтыр нафэ, тучанхэм, шхапIэхэм, культурэм иучрежениехэм, спор­тым зыщыпылъхэ гупчэхэм ачIэхьан зылъэкIыщтхэр, мэ­шIокум, самолетым арагъэтIыс­хьащтхэр QR-кодыр къэзыгъэлъагъохэрэр ары. Ар нэпцIэу къы­чIэмыкIыным е нэмыкI го­рэм икод ямыгъэлъэгъуным пае паспорт­ри игъусэн фаеу хэбзэгъэуцугъэм къыщеIо.

КIуачIэ иIэ зыхъущтыр

Урысыем исубъектхэм ащыщыбэхэм яучреждениехэм QR-кодыр умыIыгъэу уачIагъа­хьэрэп. Хэбзэгъэуцугъэр заштэрэм ыуж хэзыгъэ имыIэу тыдэкIи а шапхъэр щагъэцэкIэн фаеу хъущт.

Къихьащт 2022-рэ илъэсым имэзае и 1-м нэс код уимыIэми, коронавирусыр къызэ­рэомыолIагъэр къэзыушыхьа­тырэ тхылъыр пIыгъыми хъущт. Ащ ыужым, мэкъуогъум и 1-м нэс, QR-кодым нэмыкI зыпари пхырыкIыжьыщтэп.

Мы шапхъэхэр илъэс 18-м зыныбжь шIокIыгъэхэр ары зынэсыхэрэр.

Къэлэ кIоцI ­общественнэ транспортыр адэ?

Автобусэу къалэ­хэр зэзыпхыхэрэмрэ къэлэ кIоцIым цIыф­хэр щызезыщэрэ транспортымрэ ягугъу хэбзэгъэуцугъэм ипроект къыщышIыгъэп. Ахэм непэ щыIэ шапхъэхэр ащагъэцэкIэнхэ фай, ау къэлэ пащэхэм зэхъокIыныгъэхэр ащ фа­шIынхэ фитых.

QR-кодыр тыдэ къипхыщта?

ЦIыфым вакцинэр зыхалъхьэкIэ, ар къэзыушыхьатырэ сертификат къыраты. Джащ фэдэу къэбарыр коронавирусымкIэ федеральнэ регистрэм IэкIахьэ. «COVID-19-р» къызэолIагъэхэм якъэбари ащ ма­кIо. Нэужым ахэр зэкIэ къэралыгъо фэIо-фашIэхэм япортал рагъахьэшъ, нэбгырэ пэпчъ «иунэе кабинет» электроннэ шIыкIэм тетэу серти­фикатыр щыгъэпсыгъэ мэхъу. Ащ ит QR-кодри. Къэралыгъо фэIо-фашIэхэм япортал зыщызымыгъэунэфыгъэхэр МФЦ-м екIуа­лIэхэмэ сертификатыр къа­ратыщт.

ЦIыфым вакцинэр зэрэзыхилъхьагъэр къэзыушыхьатырэ тхылъым прививкэм иятIонэрэ Iахь ыуж зы илъэсрэ кIуачIэ еIэ. Ау сымэджагъэм ар къэзыушыхьатырэ сертификатэу къыратыгъэм илъэсныкъу пIалъэу пIылъыр. Коронавирусыр къызэремыолIагъэр къэзыушыхьатырэ QR-кодым мэфищ ныIэп кIуачIэ зэриIэрэр.

Урысыем къыщыдагъэкIыгъэ вакцинэхэм ащыщ языгъэшIыгъэ пстэумэ сертификатыр къараты. IэкIыб къэрал щыIэу ащ къыщыдагъэкIыгъэр зыхязыгъэлъхьагъэр къыхиубытэрэп.

«COVID-19-р» къеолIэгъагъэу, ау медицинэ учреждением зызэрэфимыгъэзагъэм къыхэкIыкIэ сымэджагъэхэм яреестрэ хэмытым сыда ышIэщэтыр?

Мыщ иджэуап гъэнэфагъэу джыри щыIэгоп. Шъолъырхэм, яIофхэм язытет къыпкъырыкIыхэзэ, шапхъэхэр агъэнафэх. АР-м псауныгъэм икъэу­хъумэнкIэ и Министерствэ мы упчIэр фэдгъэзагъ. Ащ къызэ­рэщытаIуагъэмкIэ, сымэджагъэу, ау поликлиникэм зыфэзымы­гъэзагъэу, сымэджэщым чIэмылъыгъэм антителахэр иIэкIэ QR-кодыр фашIыщтэп. Коронавирусыр къызэреолIагъэр къэзыушыхьатырэ анализыр (ПЦР) ытынышъ, ащ къыгъэ­лъэгъон е компьютернэ томографиер ыкIунышъ, «ковиднэ пневмоние» зэриIагъэмкIэ тхылъ къыратын фае. ЗэрэхъурэмкIэ, вирусыр къыоолIагъэу уегуца­фэмэ, медицинэм иучреждение зыфэбгъазэмэ нахьышIу.

Мы зэпстэумэ эпидемиер къэуцужьынымкIэ яшIуагъэ къэ­кIощта?

УФ-м и Вице-премьерэу Татьяна Голиковар QR-кодхэм афэгъэхьыгъэу рахъухьагъэхэм къатегущыIэзэ къызэрэ­хигъэщыгъэмкIэ, вакцинэр зыхарагъэлъхьаным цIыфхэр фэгъэчэфыгъэнхэр, прививкэр зы­шIыгъэхэм япчъагъэ процент 80-м нагъэсыныр ары пшъэрылъ шъхьаIэр. Коронавирусым зызэриушъомбгъурэр къызэтезыгъэуцощт хэкIыпIэу щыIэр а зыр ары.

Эпидемиологхэмрэ вакци­нологхэмрэ ащ дырагъаштэ. Прививкэр зымышIыгъэхэм япчъагъэ зышIыгъэхэм анахьыбэ зыхъукIэ, вирусым зызэ­блихъузэ зиушъомбгъуным, нахь пхъашэу цIыфхэм иягъэ ари­гъэкIыным ищынагъо щыIэу ары къызэраIорэр.

Специалистхэм къыхагъэщы, прививкэр зышIыгъэхэми коронавирусыр къахэхьэ ыкIи зэрахьэ. Ахэм апкъышъол нахь «гъэпхъэшэгъэ», нахь «жъалы­мэ» штаммыкIэ хэлъын ылъэ­кIыщт. Прививкэр язымыгъэшIыгъэм ар зыратыкIэ хьылъэ ышIынкIэ е екIодылIэнкIэ щынагъо.

Хэутыным фэзыгъэхьазырыгъэр ХЪУТ Нэфсэт.