Хэгъэгум имедали 5

Урысыем иныбжьыкIэхэм атлетикэ онтэгъумкIэ язэнэкъокъу шэкIогъум и 1 — 10-м къалэу Грознэм щыкIуагъ.

Хэгъэгум ишъолъыр 50 фэдизмэ къарыкIыгъэхэр Чэчэным икъэлэ шъхьаIэ щызэIукIагъэх. Спортсмен 470-м нахьыбэ зэнэ­къокъум хэлэжьагъ. Илъэс 15 – 18 ыкIи илъэс 19 – 20 зыныбжьхэр куп зэфэшъхьафхэм ахэтхэу текIоныгъэм фэбэнагъэх.

Адыгэ Республикэм щыщ нэбгырэ 11 щылычым икъэIэтын яIэпэIэсэныгъэ къыщагъэлъэ­гъуагъ.

Инэм зыщызыгъэсэрэ Артем Горловым, кг 81-рэ, апэрэ чIыпIэр гъогогъуи 3 къыдихыгъ. ШIыкIэу рывокым кг 150-рэ, толчокым кг 170-рэ, тIоштэгъукIэ кг 320-рэ къыIэти, дышъэ медалищ къыфагъэшъошагъ. Тренерхэу Александр Горловымрэ, ар ышнахьыжъ, Роман Казаковымрэ батырыр агъасэ.

Мыекъуапэ щыщэу Давид Саядян, илъэс 15 – 18 зыныбжьхэм якуп, рывоккIэ кг 122-рэ къыIэтыгъ, ятIонэрэ чIыпIэр кг 73-рэ къэзыщэчыхэрэм язэнэкъокъу къыщихьыгъ.

Сихъу Аслъан ипащэу Д. Саядян атлетикэ онтэгъум зыфегъасэ.

Хьатыгъужъыкъуае щапIугъэ Хьабый Хъусен кг 89-рэ къэзыщэчыхэрэм янэкъокъугъ. Илъэс 19 – 20 зыныбжьхэм якуп хэтэу шIыкIэу рывокыр ыгъэцэкIагъ. Килограмми 141-рэ къыIэти, джэрзыр къыфагъэшъошагъ.

Адыгэ Республикэм атлетикэ онтэгъумкIэ испорт еджапIэу Чыр­жьын Мухьарбый ыцIэ зыхьырэм итренерхэу Сихъу Аслъан, Чэмбэхъу Анзор, Сихъу Рэмэзан, Алексей Красновыр, Александр Горловыр тиспортсменхэм ягъусэхэу зэнэкъокъум хэлэжьагъэх, зэхэщэн Iофыгъохэр агъэцэкIа­гъэх.

— Зэнэкъокъур тыгу рихьыгъ, — къытиIуагъ республикэм атлетикэ онтэгъумкIэ испорт еджапIэу М. Чыржьыным ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Мыекъуапэ, Джамбэчые, Инэм, Хьатыгъужъыкъуае защызыгъэсэрэ тиныбжьыкIэхэр хэгъэгум изэ­IукIэгъухэм ахэлэжьагъэх, медальхэр къахьыгъэх. Къоджэ спортым зыкъегъэIэтыгъэным тапэкIи тыпылъыщт. Физкультурэм, спортым зядгъэушъомбгъузэ, псауныгъэм игъэпытэн, батыр цIэрыIохэр гъэ­сэгъэнхэм Iоф адэтшIэщт.

Сурэтым итхэр: апэрэ чIыпIэр Урысыем къыщыдэзыхыгъэ Артем Горловым, нэмыкIхэм афэгушIох.