Дышъэр къэзыхьырэм узылъещэ

Къыблэм самбэмкIэ изэнэкъокъу шэкIогъум и 5 — 6-м Мыекъуапэ щыкIуагъ.

Адыгэ къэралыгъо университетым физкультурэмрэ дзюдомрэкIэ и Институт 2004 – 2006-рэ илъэс­хэм къэхъугъэхэр щызэбэныгъэх. Краснодар краим, Волгоград, Астрахань, Ростов хэкухэм, Къы­рым, Къалмыкъым, Адыгэ Респуб­ликэм защызыгъэсэрэ кIалэхэр, пшъашъэхэр яонтэгъугъэхэм ялъы­тыгъэу зэнэкъокъугъэх. Адыгэ Республикэм иныбжьыкIэхэм хагъэунэфыкIырэ чIыпIэ 13 къыдахыгъ.
Тыгъужъ Тимур, кг 49-рэ, апэрэ чIыпIэр къыхьыгъ. Тренерхэу Делэкъо Адамрэ Хьабэхъу Адамрэ агъасэ. Адыгэ къэралыгъо университетым и Мыекъопэ къэралыгъо гуманитарнэ-техническэ колледж щеджэ. Нарт шъаор тибэнэкIо анахь IэпэIасэхэм ащыщ.

Мэлгощ Адам, кг 53-рэ, самбэм шIукIэ щашIэ. 2020-рэ илъэсым Урысыем иныбжьыкIэхэм язэнэ­къокъу дышъэр къыщихьыгъ. Тренерхэу Делэкъо Адамрэ Гъом­лэшк Алыйрэ ипащэх. Къыблэм изэнэкъокъу апэрэ чIыпIэр къыщыдихыгъ.

ДыдыкI Айтэч, кг 88-рэ, апэрэ чIыпIэр къыхьыгъ, тренерэу ГуIэтыжь Хъалидэ егъасэ. Екатерина Соловьевам, кг 80-м къехъу, апэрэ чIыпIэр къыфа­гъэшъошагъ, тренерэу Нэныжъ Байзэт ипащ.

ЯтIонэрэ чIыпIэхэр Кобл Рэмэзанрэ, кг 53-рэ, КушпIэ Къэп­лъанрэ, кг 58-рэ, къыдахыгъэх. Тренерхэу Джарымэкъо Рустам, Джарымэкъо Азэмат япащэх. Едыдж Разыет, кг 80-м къехъу, тыжьыныр къыхьыгъ, тренерыр Нэныжъ Байзэт.

Ящэнэрэ чIыпIэхэр къыдэзыхыгъэхэр: ЛIыхъурэе Мурат, кг 53-рэ, СтIашъу Эльдар, кг 58-рэ, СтIашъу ТIахьир, кг 64-рэ, Хьа­къуй Ислъам, кг 71-рэ, София Колосова, кг 50, ХьакIэко Дан, кг 54-рэ. Тренерхэу А. Делэкъор, А. Хьабэхъур, Р. Джарымэкъор, А. Чэтыжъыр, А. Гъомлэшкыр, И. Аксеновыр, С. Мерэмыр ныбжьыкIэхэм япащэх.

Зэфэхьысыжьхэр

— Апэрэ чIыпIищыр къыдэзыхыгъэхэр Урысыем икIэух зэнэкъокъоу 2022-рэ илъэсым, щылэ мазэм Саратов хэкум икъа­лэу Болаково щыкIощтым хэлэжьэщтых. Къыблэм изэIукIэгъухэм Адыгеим ибэнакIохэм ухьазырыныгъэ дэгъу къыщагъэлъэгъуагъэу тэлъытэ. БэнэкIо 300 фэдиз зыхэлэжьэгъэ зэнэкъокъум медаль 13 тиныбжьыкIэхэм къызэрэщахьыгъэм тигъэгушIуагъ, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ имастерэу Делэкъо Адам.

ТибэнакIохэр еджэх, колледж­хэм ачIэхьагъэхэу яшIэныгъэхэм ахагъахъо. Физкультурэм, спортым апыщагъэхэу япсауныгъэ агъэпытэ, щыIэныгъэм зыфагъасэ.

— Дунаим иныбжьыкIэхэм язэнэкъокъу джырэблагъэ Грецием щыкIуагъ. Адыеим ща­пIугъэ Хьакъуй Амир зэIукIэ­гъухэм дышъэ медалыр къащихьыгъ, — тизэдэгущыIэгъу лъегъэкIуатэ Делэкъо Адам. — Хьакъуй Амир спортышхом гъэхъагъэу щишIыгъэмкIэ тиныбжьыкIэхэм щысэшIу афэ­хъугъ. Европэм, дунаим язэIукIэгъухэм ахэлэжьэнхэу мурад зышIыгъэ кIалэхэм, пшъа­шъэхэм ягухэлъышIухэр къадэхъунхэу афэтэIо.

Сурэтым итхэр: Делэкъо Адам апэрэу щыт, дышъэр Къыблэм изэнэкъокъу къыщызыхьыгъэ Тыгъужъ Тимур агузэгу ит.