Зыми къызIэкIигъэхьан ылъэкIыщтэп

Урысые кIэтхыкIыжьыныр  шэкIогъум и 14-м аухыщт. Къэралыгъо статистикэмкIэ Федеральнэ къулыкъум Краснодар краимкIэ ыкIи Адыгэ РеспубликэмкIэ и ГъэIорышIапIэ къызэрэщытаIуагъэмкIэ, Адыгеим ар зэрифэшъуашэу щызэхащэ. Республикэм щыпсэухэрэр зэкIэ кIэтхыкIыжьыгъэныр ары пшъэрылъ шъхьаIэу яIэр. МыщкIэ шIыкIэ заулэ щыI. Апэрэр ыкIи цIыфхэр нахь зэсагъэхэр —  кIэтхыкIыжьакIохэр унэм къыIухьанхэшъ, упчIэхэр къаратхэзэ яджэуапхэр араIожьыныр ары. Ащ нэмыкIэу лъэныкъуабэ къызэлъызыубытырэ гупчэхэми (МФЦ) хэушъхьэфыкIыгъэ чIыпIэхэр щагъэпсыгъэх, джащ фэдэу, кIэтхыкIыжьыным фэгъэзэгъэ пунктэу республикэм къащызэIуахыгъэхэми якIолIэнхэ амал яI. КъэIогъэн фае, пандемием илъэхьан бгъэфедэнкIэ нахь щынэгъончъэр электроннэ шIыкIэр ары. Мы илъэсым ар  къызыфагъэфедэн амал яIэ хъугъэ. Къэралыгъо фэIо-фашIэхэмкIэ порталым  ишIуагъэкIэ кIэтхыкIыжьыныр зэшIопхын плъэкIыщт.

Къыхэгъэщыгъэн фае, кIэтхыкIыжьакIохэм аугъоирэ къэбарыр зэрэухъумэщтыр, зыми къызIэкIигъэхьан зэримылъэкIыщтыр.

Шифрэхэр ахэтхэу зэфэшIыгъэ каналымкIэ ахэр зэфагъэхьыжьых. КIэтхыкIыжьыным икIэух нэбгырэ пэпчъ ихэушъхьэфыкIыгъэ даннэхэр ауплъэкIухэрэп. КIэтхыкIыжьакIом цIыфым къыIорэр ары ытхырэр, ар къэзыушыхьатырэ тхьапэр къыригъэштэн фитэп. Къэралыгъо фэIо-фашIэхэмкIэ порталым анкетэу узэрытхэрэр къинэжьырэп, ар Росстатым цIэ лъэкъуацIэхэр хэмытэу фэкIожьых. Технологичнэу ыкIи программнэу ар къэухъумагъ, цIыфым джэуапэу ритхагъэхэр къэпшIэнхэ, джащ фэдэу зыщыпсэурэ чIыпIэмкIи зэбгъэшIэн плъэкIыщтхээп. Планшетыми тет даннэхэр къытепхынхэ амал щыIэп, ар  зэтепхэу, жесткий дискыр къыдэпхыгъэми, ащ тет къэбарым уеплъын плъэкIыщтэп, ащ шифрэ тет.

Мы мафэхэм, пандемием ыпкъ къикIыкIэ  IофшIапIэхэр зэфашIыгъэхэми, кIэтхыкIыжьакIохэм яIофшIэн зэпыурэп. Унэм цIыфхэр нахь исыхэ хъумэ, кIэтхыкIыжьыным къыхэлажьэхэрэм япчъагъэ нахь хэхъонэу алъытэ. Къэралыгъо фэIо-фашIэхэмкIэ порталымкIэ зыкIэзытхыкIыжьыгъэхэм яIоф нахь псынкIэщт, кIэтхыкIыжьакIом и QR код ригъэлъэгъумэ такъикъ заулэкIэ ипланшет дигъэхьанышъ IукIыжьыщт.

ДЕЛЭКЪО Анет.