ЯгушIуагъо зэдагощы

Нэчэрэзые самбэмкIэ иеджапIэ зыщызыгъасэ­щты­гъэ кIалэмэ спортымкIэ гъэхъагъэхэр мы тхьамафэм ашIыгъэх. Ахэм яапэрэ тренерэу Гъомлэшк Алый гущыIэгъу тыфэхъугъ.

«Адыгэ Республикэм изаслуженнэ тренер» зыфиIорэ щытхъу­цIэр джырэблагъэ къыфаусыгъ. Мэфэ заулэкIэ узэкIэIэбэжьмэ А. Гъомлэшкым ыгъэсэрэ Хьа­къуй Амир дунаим иныбжьыкIэхэм самбэмкIэ язэнэкъокъу апэрэ чIыпIэр къыщыдихыгъ.

— ТигушIуагъо къыддэзыгощыхэрэм гъэзетымкIи «тхьашъуе­гъэпсэу» ятIожьы тшIоигъу, — къытиIуагъ Гъомлэшк Алый. —Пщыкъуйхьаблэ къыщыхъугъэ Хьакъуй Амир илъэс 16 — 18 зыныбжьхэм язэнэкъокъоу Грецием щыкIуагъэм хэлэжьагъ. Килограмм 71-м нэс къэзыщэ­чыхэрэм ябэни, дышъэ медалыр къыфагъэшъошагъ.

Нэчэрэзыерэ Пщыкъуйхьаблэрэ якIэлэеджакIохэр Нэчэрэзые щызэдеджэх. КъоджитIур зэпэгъунэгъу, еджапIэр азыфагу ит.

— Хьакъуй Амир Грецием апэрэ чIыпIэр къызыщыдехым, Краснодар тыщыпэгъокIыгъ, — къеIуатэ еджапIэм ипащэу Бэгъ Мае. — ЧылэгъуитIуми адэсхэр, Теуцожь районым щыщхэр, Адыгэ Республикэм итренерхэр Краснодар иаэропорт къызэрэкIуагъэхэм тигъэгушхуагъ.

Адыгэ ансамблэм ипщынао лъэпкъ орэдышъохэр къыригъэIуа­гъэх, зэхахьэм щыуджыгъэх, адыгэ быракъыр щагъэбыбэтагъ.

Нэчэрэзые зыщагъасэ

— Нэчэрэзые еджапIэм бэнэпIэ зыгъэсапIэр къыщызэIутхыгъ, — тизэдэгущыIэгъу лъегъэкIуатэ Гъомлэшк Алый. — Илъэси 7 — 14 зыныбжьхэр самбэм пыщагъэхэу тэпIух.

— ШъуиеджапIэ щезыгъэжьагъэхэм яIэпэIэсэныгъэ Мыекъуа­пэ щыхагъахъо.

— Адыгэ къэралыгъо университетым и Мыекъопэ къэралыгъо гуманитарнэ-техническэ колледж, нэмыкIхэм ащеджэх, республикэм самбэмкIэ ибэнапIэ зыщагъасэ, тренерэу, спортымкIэ дунэе класс зиIэ мастерэу Делэкъо Адамэ япащ.

— АцIэхэр къытфеIоба.

— Хьакъуй Амир Урысыем, дунаим яныбжьыкIэхэм язэнэ­къокъу дышъэр къащихьыгъ. Хэгъэгум и Спартакиадэ джэрзыр къы­щыдихыгъ,

Урысыем спортымкIэ имастер хъугъэ.

Хьакъуй Анзор илъэс 16-м нэс зыныбжьхэм язэнэкъокъу хэлажьи, Урысыем дышъэр къыщыдихыгъ.

Гъомлэшк Анзор Урысыем иныбжьыкIэхэм язэIукIэгъухэм я 2-рэ ыкIи я 3-рэ чIыпIэхэр къащихьыгъ. Зэпахырэ узым къы­хэ­кIэу Европэм изэнэкъокъу хэлэ­жьэ­нэу хъугъэп. Урысыем и Спартакиадэ джэрзыр къыщихьыгъ.

Бэгъ Тимур Къыблэм ящэнэрэ чIыпIэ щиубытыгъ. Мэлгощ Адамэ Урысыем апэрэ ыкIи ящэнэрэ чIыпIэхэр къыщихьыгъэх. ЛIыхъу­рэе Мурат Урысыем ятIонэрэ, Къыблэм апэрэ чIыпIэхэр къащыдихыгъ. Хьакъуй Эльдар Къыблэм апэрэ, Урысыем я 5-рэ чIыпIэхэр къащихьыгъэх.

ЕгъэжьапIэр

Гъомлэшк Алый Нэчэрэзые щеджагъ, еджапIэм ипэщагъэу Бэгъ ЕкъутэкI, физкультурэмкIэ кIэлэегъаджэу Шэуджэн Щайдэт, нэмыкI­хэм лъэшэу афэраз. Адыгэ къэралыгъо университетым физкультурэмрэ дзюдомрэкIэ и Институт зычIахьэм, зэлъашIэрэ тренер-кIэ­лэегъаджэу Кобл Якъубэ ныбжьыкIэхэм Iоф зэрадишIэщтыгъэр А. Гъомлэшкым щыгъупшэрэп, щысэ тырехы.

КIыкI Ахьмэд ары А. Гъомлэшкым иапэрэ тренерыр, Пэнэ­жьыкъуае кIозэ самбэм зыфигъа­сэщтыгъ. Мыекъуапэ щеджэнэу зырегъажьэм, Хьэпэе Арамбый ишIуагъэкIэ самбэм, спортышхом нахь афэщагъэ хъугъэ. Хьасанэкъо Мурат, Делэкъо Адам, нэмыкIхэм ягъусэу самбэм зыфигъасэщтыгъ. Алый къызэриIотэжьырэмкIэ, зэнэкъокъу инхэм медальхэр къа­щихьыгъэп. Тренер сэнэхьатым зызэрэфигъэсэщтым нахь мэхьанэ ритыщтыгъ.

— 1993-рэ илъэсым чылэм згъэзэжьыгъэу Iоф щысэшIэ, — къеIуатэ Гъомлэшк Алый.

— Къыдэхъугъэм уегъэгушхо, — къытиIуагъ Нэчэрэзые еджапIэм ипащэу Бэгъ Мае. — КIэлэ шIагъо­хэр ыгъэсагъэх. Краснодар иаэропорт щыкIогъэ зэхахьэм, ти­еджапIэ щыкIогъэ зэIукIэгъум сахэлэжьэнэу зэрэхъугъэм сигъэ­гушIуагъ, егъашIи сщыгъупшэжьыщтэп.

ГушIогъо нэпсыр нэбгырабэм къызэряхыщтыгъэр Бэгъ Мае ылъэгъугъ, гущыIэ фабэу тренермэ, бэнакIом фаIуагъэр зэхихыгъ.

— Мэшэлахь, Гъомлэшк Алыйрэ Хьакъуй Амиррэ къадэхъугъэр тэркIэ гушIуагъо, — еIо Мае. – Алый спортым зэрэфигъасэхэрэм дакIоу тинарт шъаохэр цIыфышIу­хэу, патриот шъыпкъэхэу епIух.

Адыгэ шэн-зекIуакIэхэм афегъа­сэх, адыгабзэр агъэлъэпIэным фепIух. ЗэкIэ ыгъасэхэрэр чем­пион зэрэмыхъущтхэр тренерым ешIэ, ахэр лъэпкъым, хэгъэгум яцIыф шъыпкъэхэу щытынхэ фаеу елъытэ.

Адыгэ быракъыр зэнэкъокъухэм ащагъэбыбатэ зыхъукIэ ягушъхьэ кIуачIэ къыIэтэу А. Гъомлэшкым елъытэ. Грецием адыгэ быракъыр лъагэу щаIэтыгъ.

Тутыным, шъон пытэхэм акIэ­рычыгъэхэу ныбжьыкIэхэр пIугъэн­хэр, ятарихъ дэгъоу ашIэныр, псауныгъэ пытэ яIэныр Iофыгъо шъхьаIэхэм ахелъытэх.

Зэпхыныгъэхэр

Къуаджэм щезыгъэжьэгъэ кIалэ­хэр Мыекъуапэ зыкIохэкIэ зэреджэщтхэм, спортым зыфагъэсэным ямэхьанэ А. Гъомлэшкым дэгъоу къыгурэIо. Республикэм самбэмкIэ испорт еджапIэ ипащэу Делэкъо Адамэ гъусэныгъэ дишIыгъэу ныбжьыкIэхэм адэлажьэх. Къуаджэмрэ къалэмрэ язэпхыныгъэхэр спортым щагъэпытэх. КIалэхэр самбэмкIи, дзюдомкIи мэбанэх, чемпионхэр къазэрэхэкIыщтхэм щэч хэмылъэу алъытэ.

Афэраз

Хьакъуй Амир Краснодар, къуа­джэм къызэрэщыпэгъокIыгъэхэр зэригъэпшэщтыр ышIэрэп, зэкIэми лъэшэу афэраз.

— Грецием сыщыIэу алырэгъум сыщыбанэзэ лъэшэу сыгумэкIыщтыгъэп, — еIо Хьакъуй Амир. — ЦIыфыбэ къызэрэтфэгушIуагъэм нахь сигъэгумэкIыгъ…

Самбэр спорт къодыеп, ар щыIэныгъэм щыщ, тегъэгушхо, гушIуагъоу къытфихьырэр дунэе къэбар мэхъу.

Шъопсэу, тинарт шъаохэр, тибатырхэр! Шъо шъуигъэхъагъэхэр дунэе спортым итарихъ щыщ хъугъэх.

Гъомлэшк Алый Грецием кIоным фэшI зэхэщэн IофхэмкIэ IэпыIэгъу къыфэхъугъэ Хьабэхъу Аскэр «Тхьауегъэпсэу» реIожьы.

СамбэмкIэ бэнакIоу Хьакъуй Амир, тренерхэу Гъомлэшк Алый, Делэкъо Адамэ афэгушIох Мыекъуа­пэ щыпсэухэрэ ЛIымыщэкъо Рэмэзан, Сулейманов Юныс, Хьакъуй Аслъан, Бастэ Сэлым, нэмыкIхэри. Ягъэхъагъэхэм ахагъэхъонэу афэ­лъаIох.

ЕмтIылъ Нурбый.

Сурэтхэм арытхэр: Нэчэрэзые гурыт еджапIэм щыкIогъэ зэхахьэм хэлэжьагъэхэр.