Джыри зы федэкъэкIуапI

Адыгеим и ЛIышъхьэу КъумпIыл Мурат пхъэшъхьэ-мышъхьэ-хэтэрыкI гъэщтыгъэхэр къызыщыдагъэкIырэ заводэу Тэхъутэмыкъое районым итым щыIагъ.

Предприятием Iоф зэришIэ­рэм нэIуасэ зыфашIыгъ Адыгэ Республикэм иофициальнэ лIыкIоу Краснодар краим иадминистрацие ипащэ дэжь щыIэ Александр Наролиным, Адыгэ Республикэм мэкъу-мэщымкIэ иминистрэу Къуанэ Анзаур, Тэхъутэмыкъое районым ипащэу Шъхьэлэхъо Азмэт.

Инвесторым цеххэр ежь- ежьырэу ыгъэпсыгъэх, коммуникациехэр рищагъэх, IэкIыб къэралыгъохэм къащашIыгъэ оборудованиер къыщэфыгъ. ПстэумкIи заводым квадрат метрэ мини 9,5-рэ зэлъеубыты. Сомэ миллион 650-рэ фэдиз ащ халъхьэгъах. Предприятием зы сыхьаткIэ продукцие тонни 4 – 5 е нэмыкIэу къэпIон хъумэ, илъэсым къыкIоцI продукцие тонн мин 14 фэдиз къыдегъэкIы. ГъэучъыIалъэм гъомылэпхъэ тонн мини 4-м нэс дэфэ.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Альянс» зыфиIорэм ипащэу Хъурмэ Вячеслав къызэриIотагъэмкIэ, заводым Iоф­шIэпIэ чIыпIи 145-рэ щызэхэщагъ, нэбгырэ 50-мэ ренэу ащ Iоф щашIэ. НахьыбэрэмкIэ мыщ щылажьэхэрэр Тэхъутэмыкъое, Теуцожь районхэм ащыпсэухэ­рэр ары.

2022-рэ илъэсым имэкъуогъу къыщегъэжьагъэу 2023-рэ илъэ­сым игъэтхапэ нэс предприятием ия 2-рэ чэзыу атIупщынэу рахъухьэ. Джыри Iахьтедзэу сомэ миллион 350-рэ хъурэ инвестициехэр къаIэкIэхьащтых. Ащ амал къаритыщт илъэсым къыкIоцI тонн мин 25-м нэсэу продукцие къыдагъэкIынэу, мыщ щылажьэхэрэм япчъагъэ нэбгырэ 210-м нагъэсынэу.

Республикэм ипащэ предприятием иIофхэм язытет зызщегъэ­гъозэ нэуж хэтэрыкIлэжьыным республикэм зызэрэщырагъэу­шъомбгъущтым, чIыпIэм къы­ща­хьыжьырэ хэтэрыкIхэмрэ пхъэшъхьэ-мышъхьэхэмрэ заводым къызэрэIэкIагъэхьащтхэм афэ­гъэхьыгъэ зэIукIэгъур зэрищагъ.

КъумпIыл Мурат зэрэхигъэунэфыкIыгъэмкIэ, хэтэрыкIхэм федэшхо къахьы, мэкъу-мэщым изы лъэныкъо шъхьаIэу къэралыгъо IэпыIэгъу къазыфыратыхэрэм ар ащыщ.

Мэкъу-мэщымкIэ Министерствэм пшъэрылъ фашIыгъ къэралыгъо программэхэм япхырыщын фэгъэхьыгъэ къэбархэр икъоу чIыгулэжьхэм аIэкIигъэ­хьанэу, фышъхьэ лэжьыгъэхэр бэу зэрашIэщтыгъэм текIын­хэшъ, пхъэшъхьэ-мышъхьэхэу, цумпэхэу, хэтэрыкIхэу нахь федабэ къызыкIакIохэрэм ялэ­жьын пыхьанхэу зэрэрахъу­хьагъэр лъигъэкIотэнэу.

«АщкIэ ищыкIэгъэ амалхэр зэкIэ республикэм иIэх. ХэтэрыкIхэм якъэгъэкIынкIэ, псыр зэрэкIагъахъорэм зегъэ­ушъомбгъугъэнымкIэ мылъкоу агъэкIодырэм щыщ къафи­зыгъэкъу­жьыщт программэхэр агъэфедэх. Федеральнэ гупчэм иIэпыIэгъу нахь шIуагъэ къы­тэу къызфагъэфедэн фае, япродукцие зэрэ­Iуа­гъэ­кIы­щтым чIыгулэжьхэр тапэкIэ ыгъэгумэкIыжьыщтхэп, заводыкIэм ар аIихыщт», — къы­Iуагъ Адыгэ Республикэм и ЛIышъхьэ.

ЗэIукIэгъум ыуж Адыгеим и ЛIышъхьэрэ предприятием ипащэхэмрэ заводым ищагу чъыг заулэ дагъэтIысхьагъ.