ШIокI имыIэу зэрашIыгъэм щэгугъых

Зэпахырэ узхэм зызэраушъомбгъурэм еп­хы­гъэу зыныбжь икъугъэхэр шIокI имы­Iэу прививкэ шIыгъэным ехьылIэгъэ уна­шъоу Адыгеим исанитарнэ врач шъхьаIэ къыдигъэкIыгъэм фэгъэхьыгъэу иеп­лъы­кIэ къыриIотыкIыгъ АР-м псауныгъэр къэу­хъу­мэгъэнымкIэ иминистрэу Мэрэтыкъо Рустем.

Ащ къызэриIуагъэмкIэ, медицинэ Iофтхьабзэхэу зэхащэрэ закъохэмкIэ пандемием уебэнын плъэкIыщтэп, ащ къулыкъу пстэуми акIуачIэ зэхэлъэу упэуцужьын фае.

— Санитарнэ врач шъхьа­Iэм ышIыгъэ унашъор игъо шъып­къэу сэлъытэ, — еIо министрэм. — Мыщ кIуачIэ иIэ зэрэхъугъэм ишIуа­гъэкIэ вакцинэр зыхязыгъэлъ­хьащтхэм япчъагъэ хэхъонэу тыщэгугъы. Ащ пае Iофы­шIэ купхэу нэбгырэ 50 фэдиз прививкэр языгъэшIы зышIоигъохэу зы­къытфэзыгъазэхэрэм япредприятие тыкIоным тыфэхьазыр. Арэущтэу зымыхъукIэ, коронавирусым пэуцужьырэ вакцинэр зыщахалъхьэрэ чIыпIэ 32-мэ Iоф ашIэ, мобильнэ пунктыр культурэм и Унэу «Гигантым» чIэт.

Джащ фэдэу Мэрэтыкъо Рус­тем гумэкIыгъоу къыхигъэщыгъэ­хэм ащыщ ковидыр ныбжьыкIэхэм нахь къяузы зэрэхъугъэр. Анахьэу сымаджэхэрэр илъэс 18-м къыщегъэжьагъэу илъэс 49-м нэс зыныбжьхэу общественнэ чIыпIэхэм ащыIэхэ, общественнэ транспортыр къызфэзгъэ­федэхэрэр ары (процент 44,2-рэ). Джащ фэдэу нахьыбэрэ сымаджэхэрэр илъэс 18-м къы­ще­­­гъэжьагъэу илъэс 64-м нэс зыныбжьхэр ары (процент 67,5-рэ).

— Вакцинэм ущыщынэнэу щытэп. Рес­публикэмкIэ ар зыхалъхьэгъэ нэбгырэ мини 100-м ехъурэм ащыщ идунай ыхъожьыгъэу дгъэунэфыгъэп. Ары пакIошъ, прививкэр зыфа­шIыгъэхэм япроценти 2-р ары сымаджэ хъугъэр, ахэм узыр псынкIэу апэкIэкIы е нахьыбэрэмкIэ унэм исхэу яIазэх. Статистикэм къызэригъэлъагъорэмкIэ, ковидым пэуцужьырэ вакцинэр зыхэмылъхэм узыр лъэшэу къяхьылъэкIы, бэ зидунай зыхъожьырэр, — хигъэунэфыкIыгъ псауныгъэр къэухъумэгъэнымкIэ министрэм.

Мэрэтыкъо Рустем къызэрэхигъэщыгъэмкIэ, мы уахътэм пандемием тыпэуцужьынымкIэ амалэу щыIэ закъор вакцинациер ары. Джащ фэдэу коронавирусым пэуцужьырэ вакцинэхэр икъоу зэрэщыIэхэр ащ къыIуагъ. Непэ вакцинэ лъэпкъищ аIэкIэлъыр: «Спутник V», «Спутник Лайт», «ЭпиВакКорона».

Iэшъынэ Сусан.