«Уджыр» лъэпкъхэм алъэIэсы

Адыгэ музыкальнэ Iэмэ-псымэхэмкIэ Тэхъутэмыкъое районым илъэпкъ ансамблэу «Уджыр» Урысыем ифестиваль-зэнэкъокъухэм ахэлажьэ.

2021-рэ илъэсым федеральнэ Iофтхьабзэу «Творческэ цIыф­хэр» зыфиIорэ фестиваль— зэнэкъокъур лъэпкъ проектэу «Культурэм» диштэу кIуагъэ. КIэщакIо ыкIи зэхэщакIо ащ фэхъугъэх Урысыем культурэмкIэ и Министерствэ, Урысыем лъэпкъ творчествэмкIэ и Къэралыгъо Унэу В. Д. Поленовым ыцIэ зыхьырэр.

Лъэпкъ ансамблэу «Уджыр» фестиваль-зэнэкъокъум лауреат щыхъугъ, шIухьафтынэу сомэ миллиони 2 къыратыгъ. Музыкальнэ Iэмэ-псымэхэр ахъщэмкIэ ащэфыгъэх. Микрофонхэу лъэхъаным диштэхэрэр, лъэпкъ шъуашэхэр, фэшъхьафхэри «Уджым» ищыкIэгъагъэх. Сурэт­хэр тырахынхэмкIэ, нэрылъэгъу IэпыIэгъухэр гъэфедэгъэнхэмкIэ ансамблэм хэкIыпIэхэр къыгъо­тыгъэх.

— 1993-рэ илъэсым лъэпкъ ансамблэу «Уджыр» зэхащагъ, — къеIуатэ Тэхъутэмыкъое рай­оным иадминистрацие культурэмкIэ игъэIорышIапIэ ипащэу, Адыгэ Республикэм искусствэхэмкIэ изаслуженнэ Iофы­шIэшхоу Ацумыжъ Рустам. —Адыгэ Респуб­ликэм икультурэ къэзыгъэдэхэрэ творческэ купыр зыми фэдэп. Музыкальнэ искусствэм хэхъоныгъэ ышIыным фэшI имурадхэр щыIэныгъэм щыпхырещых. Лъэп­къыбэ зыщыпсэурэ Урысыем шIукIэ щашIэ.

«Уджым» ихудожественнэ пащэу, Адыгэ Республикэм изаслуженнэ артистэу Къэлэкъу­тэкъо Инвер музыкальнэ искусствэр шIу зыщалъэгъурэ уна­гъом щапIугъ, исэнэхьат фе­джагъ. ЗэлъашIэрэ пщынаоу, композиторэу Лъэцэрыкъо Кимэ щысэ тырихыщтыгъ, бэрэ уп­чIэжьэгъу ышIыщтыгъ.

Лъэпкъ ансамблэу «Уджым» нэбгыри 10 фэдиз хэт. Музыкальнэ Iэмэ-псымэхэу адыгэ пщынэр, пхъэкIычыр, къамылыр, Iэпэпщынэр, шъонтырыпыр, сырынэр, къамылыр щагъэжъын­чых.

Урысыем икомпозиторхэм я Союз аштэгъэ пщынэо цIэрыIоу, орэдыIоу ыкIи орэдусэу КIыргъ Юрэ шыкIэпщынэм, къамылым, пщынэм, нэмыкIхэм апыщагъ.

— Тиорэдхэр дахэх, уядэIузэ гур къаIэты, — къеIуатэ КIыргъ Юрэ. – Фольклорым къыхэтхыхэрэ ижъырэ орэдхэр, фэшъхьафхэри ансамблэм къырегъаIох. ЦIыфхэм ташIогъэшIэгъон, къытэдэIух.

Лъэпкъ ансамблэр Урысыем и Къэралыгъо быракъ и Мафэ, фестивалэу «Нартхэм ячIына­лъэ» Адыгэ Республикэр илъэс 30 зэрэхъугъэм, нэмыкIхэм ахэлэжьагъ. Нарт орэдхэм къаще­гъэжьагъэу ансамблэм орэдыбэ къыхедзэ, едэIухэрэр ягуапэу дежъыух.

«Уджыр» Тыркуем зыщэIэм, дунэе-фестивальхэм щытхъур къазыщехьым тигъэгушIуагъ. Тыркуем тилъэпкъэгъухэр ансамблэм къызэрэщыпэгъокIыгъэхэр артистхэм ащыгъупшэ­жьырэп. Ныбджэгъуныгъэ бэмэ зэдашIыгъ, телефонкIэ зэфы­теох.

Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ижъы­рэ лъэпкъ орэдхэм псэ къапигъэкIэжьыгъ, Европэм имузыкальнэ искусствэ щызэлъашIагъ, адыгэу дунаим тетхэм алъыIэсыгъ. Композиторэу Нэхэе Аслъан пэсэрэ орэдхэм ятIонэрэ щыIэныгъэр аритызэ, гъашIэм хэмыкIокIэнхэу егъэпсых.

«Уджым» ихудожественнэ пащэу Къэлэкъутэкъо Инвер къызэрэтиIуагъэу, «Ислъамыем», фэшъхьаф лъэпкъ ансамблэхэм «Уджыр» акIырэплъы. Ансамблэм хихыгъэ гъогум зыригъэушъомбгъуныр ипшъэ­рылъ шъхьаIэу елъытэ. Лъэпкъхэм адыгэ музыкальнэ искусствэр нахьышIоу ашIэ зэрэхъу­рэм, адыгэхэм язэлъыIэсыкIэ амалхэр зэрэпытэхэрэм «Уджым» иIахьышIу хэлъ.

ЕмтIылъ Нурбый.