ЧъыIэр къэмысызэ

Кавказ заповедникым иIофышIэхэм илъэс псаум мэзхэр, псэушъхьэхэр, зекIо къэкIорэ цIыфхэр къызэрагъэгъунэхэрэм фэдэу ежьхэми зыкъаухъумэжьыныр япшъэрылъхэм ащыщ.

Мыгъэрэ зыгъэпсэфыгъо уахътэр текIыгъ. Бжыхьэм заповедникым къа­кIо­хэрэм япчъагъэ сыдигъуи къыщэ- кIэ. Ощх чъыIэр зэпыурэп, къызщесыгъэ чIыпIэхэр къушъхьэхэм ахэтых.

Гъэмафи кIымафи ямыIэу заповедникым фэсакъырэ инспекторхэм кIымафэм зыфытырагъэпсыхьанэу рагъэ­жьагъ. Заповедникым идиректорэу Сергей Шевелевым бэмышIэу ахэм зэдэгущыIэгъу адыриIагъ.

«Ом изытет къушъхьэм псынкIэу зыкъыщызэблихъун ылъэкIыщт. Ащ къыхэкIэу, кордон чыжьэхэм ащыщ щыIэ инспекторыр къэмыкIожьы­шъоу, ышхыни зызэригъэфэбэни имыIэу, мэфэ заулэрэ макъэ къытигъэIун ымылъэкIэу мы­хъуным пае тхьамэфитIум къы­кIоцI ыгъэфедэщт пстэури чъыIэр къэмысызэ гъэхьазырыгъэн фае», — къыIуагъ С. Шевелевым.

Непэрэ мафэми цIыфхэм ящыкIэгъэ пстэур лъэсэу зынамыгъэсышъущтхэ кордонхэр щыIэх. Умпырь зыцIэр джащ фэд, узэрекIолIэшъущт закъор вертолетыр ары. Метеостанциеу Джуга зыдэщыIэ чIыпIэми кIогъуае. КIымафэр къэмысызэ станцием иоборудование изытет уплъэ­кIугъэн, гъэцэкIэжьын IофшIэнхэр щызэшIохыгъэнхэ фае. СпутниккIэ Iоф зышIэрэ Интернетыр ащ щагъэпсынэу щыт.

Заповедникым иотделхэм япащэхэм кIымафэм изыфэгъэхьазырын зэрэрагъэжьагъэр къаIуагъ. Мазэм ыкIэ нэс IофшIэнхэр зэкIэ къызэраухыщтхэм яцыхьэ телъ.