Советскэ Союзым и ЛIыхъужъэу Василий Лозовым Шэуджэн районым ит къутырэу Михайловым мемориальнэ шIэжь къыщыфызэIуахыгъ.
Василий 1916-рэ илъэсым Михайловым къыщыхъугъ, 1942-рэ илъэсым фронтым Iухьагъ. Я 73-рэ гвардейскэ шхончэо дивизием ия 80-рэ гвардейскэ хэушъхьафыкIыгъэ истребительнэ-противотанковэ дивизионым иорудие икомандир 1943-рэ илъэсым хъугъагъэ.
Къалэу Курскэ нэмыц техакIохэр зыщызэхакъутэхэм дивизиеу зыхэтыр белгородскэ-харьковскэ лъэныкъом щыкIорэ заохэм агъэкIогъагъ. Нэужым В. С. Лозовыр псыхъохэу Днепрэ ыкIи Северный Донец ащызэуагъ.
Бородаевскэ лъэгапIэм лIыгъэшхо къызхигъафэзэ пыим зэрэщыпэуцужьыгъэм пае Советскэ Союзым и ЛIыхъужъыцIэр, Лениным иорденрэ «Дышъэ жъуагъу» зыфиIорэ медалымрэ игъусэхэу къыратыгъэх.
Ежь иIашэкIэ ащ нэмыц танки 4-рэ бронемашини 3-рэ ыгъэстыгъ, пулемет 14 зэхикъутагъ, миномети 2 ыгъэфыкъуагъ, нэмыц офицерхэу ыкIи дзэкIолIхэу нэбгырэ 200 фэдиз зэуапIэхэм ащиукIыгъэх.
БэмышIэу Адыгэ Республикэм иветеранхэм я Совет илIыкIо куп организацием итхьаматэу Къоджэ Аслъан япащэу В. С. Лозовыр къызщыхъугъэ къутырэу Михайловым дэт еджапIэм кIогъагъэх. Ахэм мемориальнэ мыжъобгъур еджапIэм идэпкъ тырагъэпкIафэ дзэ оркестрэм къыригъэIуагъ, лIыхъужъым шъхьэкIэфэныгъэ зэрэфашIырэр къыхагъэщэу караулыр щытыгъ.
Мемориалыр къызызэIуахым ыуж ащ хэлэжьагъэхэм къэгъагъэхэр агъэтIысхьагъэх. Гъатхэр къэсымэ, ТекIоныгъэм икъэгъагъэкIэ алъытэрэ сирень куандэм мэфэкIым ехъулIэу зыкъызэIуихыщт. Мемориалым ыпашъхьэ патриотическэ гъэсэныгъэм фэгъэхьыгъэ Iофтхьабзэхэр щызэхащэхэзэ ашIыщт.
Иван Бормотов,
АР-м иветеранхэм я Совет хэт.