ЗекIо лъагъохэр зэфашIыжьых

Чэщырэ хэпшIыкIэу къызэрэучъыIырэм, къушъхьэхэм къызэращигъэщтырэм къахэкIэу зыгъэпсэфакIохэр зэрыкIощтыгъэ лъагъохэм ащыщхэр нахьыжьэу зэфашIыжьхэу рагъэжьагъ.

Чъэпыогъум и 4-м къыщегъэ­жьагъэу турмаршрутхэу NN 8-м, 8а-м цIыфхэр атырагъэхьажьхэрэп. Мазэм и 15-м нэс гъэ­мэфэ зыгъэпсэфыгъом хьакIэхэр зыщызекIощтыгъэхэ лъагъохэри зэфашIыщтых.

Маршрутхэу NN 9-р, 12-р, 13-р, 30В-р, 30Г-р къэкIорэ илъэсым нэс зэфэшIыгъэщтых. Лъагъохэу 30А-мрэ 30Б-мрэ Лэгъо-Накъэ къыщегъэжьа­гъэу ятIонэрэ зыплъыхьэпIэ чIыпIэм нэс экскурсиехэр щызэхащэхэзэ ашIыщт.

Ом изытет Iоныгъом къыщегъэжьагъэу зыкъызэблихъоу зэ­рэригъэжьагъэм пай мыгъэ турмашрутхэр нахьыжьэу зэфа­шIыжьынхэу зыкIэхъугъэр. ИкIыгъэ мазэм метрэ 1800-рэ зилъэ­гэгъэ къушъхьэхэм осыр къатырилъхьэгъагъ. Ое-ос зэхэтым ыпкъ къикIыкIэ къушъхьэм хэ­хьэ­гъэ цIыфхэр тэрэзэу щызекIонхэ алъэкIыщтыгъэп, ар хэткIи щынэгъуагъэ.

Мыгъэ Кавказ заповедникым итурмашрутхэм мэкъуогъум и 10-м Iоф ашIэнэу рагъэжьэ­гъагъ. Маршрут зэфэшъхьафи 9-мэ къащакIухьэзэ заповедникым идэхагъэрэ ибаиныгъэрэ цIыф­хэм зэрагъэшIагъ, загъэпсэ­фыгъ.