Адыгеир хэткIи гупсэфыпI

ТхакIоу, усакIоу, зэдзэкIакIоу Валентина Твороговар Литвам ит къалэу Па­невежисе чъэпыогъум и 2-м 1946-рэ илъэсым къыщыхъугъ. Ау 1956-рэ илъэ­сым къыщегъэжьагъэу Краснодар хэкум щыпсэугъ, 1963-рэ илъэсым яунагъокIэ Мыекъуапэ къэкIожьыгъэх.

Валентина Василь ыпхъум Адыгэ къэралыгъо кIэлэегъэджэ институтыр къыухыгъ. Иапэрэ хэутыгъэхэр журналэу «Юность» зыфиIорэм къыдэхьагъэх.

УсэкIо ныбжьыкIэм IофшIэныр Адыгэ хэку исполкомым ирадиокомитет щы­ригъэжьэгъагъ. ТешIэгъэшхо щымыIэу ар Москва еджакIо кIуагъэ ыкIи Литературнэ институтэу М. Горькэм ыцIэкIэ щытым иапшъэрэ литературнэ курс­хэр къыухыхи, тхылъ къыдэгъэкIыпIэхэу «Малыш» ыкIи «Центрполиграф» зыфиIохэрэм редакторэу Iоф ащишIагъ.

В. В. Твороговам иапэрэ поэтическэ тхылъэу «Доверие» зыфиIорэр Краснодар тхылъ тедзапIэм 1969-рэ илъэсым къыщыдэкIыгъ. Ащ къыкIэлъыкIуагъэх «Письма с дороги», «Обычный день» зыфиIорэ тхылъхэр.

1976-рэ илъэсым Советскэ Союзым и ЛIыхъужъэу Андырхъое Хъусен иусэ сборникэу «Считайте меня живым» ыIоу В. В. Твороговам урысыбзэкIэ зэри­дзэкIыгъэр Мыекъуапэ къыщыдэкIыгъ. УрысыбзэкIэ МэщбэшIэ Исхьакъ иусэхэр ыкIи ипоэмэхэр бэу зэридзэкIыгъэх. ЫшъхьэкIэ зыхэсынэу ыкIи дэгъоу ышIэнэу хъугъэ адыгэм ипоэзие игуапэу, шIогъэшIэгъонэу Iоф дишIагъ В. Твороговам, мы произведениехэм апхырыщыгъэ гупшысэр ыкIи ащыгъэфедэгъэ художественнэ амалхэр икъоу зэхишIэу, зэщыкъоныгъэ афэмыхъоу ахэр зэри­дзэкIыгъэх.

1995-рэ илъэсым Адыгэ республикэ тхылъ тедзапIэм Твороговам иусэхэр зыдэт сборникэу «Сумерки», «Созвездие Весов» зыфиIохэрэр къыщытыра­дзагъэх.

Валентина Твороговам иусэхэр журналхэу «Юность», «Кубань», «Дон», «Наш современник», «Советская женщи­на», «Литературная Адыгея» зыфи­Iо­хэрэм бэрэ къыхаутыщтыгъэх, ахэр гум къикIыхэу, щыIэныгъэр нэм къыкIагъэуцоу, гупшысэ куу ахэлъэу щытыгъэх.

В. В. Твороговар тхэкIо ныбжьыкIэхэм яя V-рэ Всесоюзнэ зэIукIэу Москва 1969-рэ илъэсым щыкIуагъэм иделегатыгъ. В. В. Твороговар Урысыем итха­кIохэм я Союз 1970-рэ илъэсым ще­гъэжьагъэу хэт.

ЦIыф лъэпкъ зэфэшъхьафхэм язэрэлъытэ-зэгурыIо, акIочIэ зэхэлъ, ягупшысэ псыхьагъэ мамырныгъэр ыкIи хэгъэгум ылъапсэ зэрагъэпытэрэр нафэ. Ащ иIахьышIу хэлъ усакIоу, зэдзэкIакIоу, цIыф лъэпкъхэр зэфэдэу зыгъэлъапIэу Валентина Твороговами.