Руслан Пановыр: «Зэпахырэ узхэм тащызыухъумэщтыр вакцинациер ары»

Адыгеим имызакъоу, коронавирусыр къызэутэкIыгъэмэ япчъагъэ тыдэкIи лъэшэу щыхахъоу зэриублэжьыгъэр гумэкIыгъошхоу къэуцухэрэм ащыщ.

«Коронавирусым пэуцужьырэ прививкэр зыхалъхьэгъахэм мэфэ 30 зытешIэкIэ гриппым пэуцужьырэ вакцинэр аригъэшIын ылъэ­кIыщт».

COVID-19-кIэ зэджагъэхэм ящэнэрэу къытыригъэзэжьыгъэу зеушъомбгъу. Тишъолъыр пштэмэ, чэщ-зымафэм ар нэбгырэ 50-м ехъумэ къяутэкIы­гъэу къызыщыхэкIыгъэ мафэхэр агъэунэфыгъэх.

Коронавирусыр къызэуалIэ­хэрэм япчъагъэ зэрэхэхъожьырэм ыгъэгумэкIэу цIыфхэм за­фегъазэ Шэуджэн район сымэджэщым иврач шъхьаIэу Руслан Пановым.

— ХэткIи шъэфэп, илъэс­рэ ныкъорэм ехъугъ зэпахырэ узы­кIэу коронавирусым тызыпэуцужьырэр. Ар къызежьакIэм тызэребэныщт ыкIи тызэреIэ­зэщт шIыкIэхэр тымышIэхэу къиныгъохэм тахэтыгъ. Джы вакцинацием тыфежьагъ, унэм исхэу, сымэджэщым чIэлъхэу тяIэзэным иамалхэр зэдгъэшIагъэх. Шъыпкъэ, къиныгъо зэфэшъхьафхэр къэуцух. Ахэм зэу ащыщ мы уахътэм сымэджэныгъэм лъэшэу зыкъызэриIэты­гъэр. Мэзи 8 хъугъэ «коллективнэ иммунитет» зыфаIорэр щыIэ хъуным пае коронавирусым пэуцужьырэ вакцинэр игъом цIыфхэм зыхарагъэлъхьанэу тызялъэ­Iурэр, — къы­Iуагъ ащ.

ТигущыIэгъу къызэрэхигъэщыгъэмкIэ, ыпэкIэ щыIэгъэ планым тетэу Шэуджэн районым щыпсэурэ нэбгырэ 7428-мэ вакцинэр афашIынэу щытыгъ, джы «коллективнэ иммунитетым» къы­фэкIонхэм пае а пчъагъэр мини 9-м нагъэсыгъ. Непэрэ мафэм ехъулIэу прививкэр зыхалъхьагъэр нэбгырэ 3440-рэ (процент 50) мэхъу. Ар макIэ.

Мы илъэсым къэуцугъэ гумэкIыгъохэм ащыщэу врач шъхьа­Iэм хигъэунэфыкIыгъэр бжы­хьэ-кIымэфэ лъэхъаным къекIокIырэ гриппыр цIыфхэм къызэряузырэр ары.

— Джащ пае цIыфхэм зафэ­сэгъазэ охътабэ тырамыгъашIэу вакцинациер ашIынэу, — еIо Руслан. — Коронавирусым пэуцужьырэ прививкэр зыхалъхьэгъахэм мэфэ 30 зытешIэкIэ гриппым пэуцужьырэ вакцинэр аригъэшIын ылъэ­кIыщт. Вакцинэхэр икъоу щыIэх. «Совигрипп» ыкIи «Ультрикс» зыфаIохэрэм афэдэу зэхэлъхьагъу 1920-рэ къытатыгъ, нэужыми къытфыхагъэхъуагъ. Ныбжь зиIэ нэбгырэ 2075-мэ, кIэлэцIыкIуи 180-мэ гриппым пэуцужьырэ прививкэр афашIыгъ.

Мы уахътэм ехъулIэу Шэуджэн районым щыпсэурэ нэбгырэ 86-мэ коронавирусыр къахагъэ­щыгъэу яунэхэм ащяIазэх, ахэм ащыщэу нэбгырэ 22-р кIэлэцIыкIух. Нэбгыри 8 сымэджэщым чIэлъ.

Врач шъхьаIэм къызэрэхи­гъэщыгъэмкIэ, унэм исхэу ежь-ежьырэу зэIэзэжьхэзэ, узыр бэмэ хагъэужъыныхьэ.

— Уз мэхъаджэу къежьагъэм тызэрэпэуцужьыщт закъор тызэкъотмэ ары, — къеIуатэ Руслан Пановым. — Зэпахырэ узым инэшанэхэр шъуиIэхэ зэ­рэхъугъэм тетэу врачым зыфэ­жъугъаз! Эпидемием изытет, тэри, тыкъэзыуцухьэхэрэми япсауныгъэ щынэгъончъагъэм иамалхэр зэрэдгъэцакIэхэрэм ялъытыгъ. Коронавирусым къыз­дихьын ылъэкIыщт тхьамыкIагъохэр, нэбгырэ пэпчъ пшъэ­дэкIыжьэу ыхьырэр зыщыдгъэгъупшэхэ хъущтэп, зэкIэми узыр псынкIэу апэкIэкIырэп. Анахь ыгъэфыкъохэрэр зыныбжь хэкIотагъэхэр ыкIи уз гъэтIылъыгъэ зиIэхэр ары. Ау ныбжьыкIэхэми къафэкъинэу бэрэ къыхэкIы. Уз мэхъаджэм тыщызыухъумэщтыр вакцинациер арышъ, Iэпэдэлэл ар шъумышIы!

Iэшъынэ Сусан.