РеспубликэмкIэ мэхьанэшхо зиIэ проект

Адыгеим щыпхыращырэ инвестиционнэ проектэу ООО-у «Мирный-Адыгея» зыцIэр илъэс къэс зэхащэрэ Урысые агропромышленнэ къэгъэлъэгъонэу «Золотая осень» зыфиIорэм къыпкъырыкIыгъэхэм ащыщ. РеспубликэмкIэ мэхьанэшхо зиIэ проектэу щыт.

Тишъолъыр ар зэрэщыпхыращыщтым АР-м и ЛIышъхьэу КъумпIыл Муратрэ «Агрохол- динг Мирный» зыфиIорэ компаниеу проектым кIэщакIо фэхъугъэм ипащэу Елена Гангалорэ 2019-рэ илъэсыр ары зыкIэтхагъэхэр.

Пчэнышъхьэ мин тIурытIумэ ателъытагъэу фермэ 12 агъэ­псынэу, пчэныщэм хэшIыкIыгъэ гъомылапхъэхэр къыщыдагъэ­кIынхэу завод цIыкIу ашIынэу, былымхэм арагъэшхыщтыр ежьхэм къагъэкIынэу проектым къыщыдэлъытагъ. 2019-рэ илъэ­сэу зыкIэтхагъэхэм апэрэ чэзы­ум къыдыхэлъытагъэхэм яшIын Мыекъопэ районым ит поселкэу Трехречнэм щырагъэжьагъ. Зэрэрахъухьагъэуи пIалъэхэм адиштэу ар ашIыгъ.

Комплексым шъхьэ мини 2 зыщаIыгъыщт фермэ, ахэм арагъэшхыщтыр зыщашIыщт цех ыкIи Италием къыращыгъэ оборудованиекIэ зэтырагъэпсыхьагъэу пчэныщэм хэшIыкIыгъэ гъомылапхъэхэр къызщыдагъэ­кIыщт завод хэт. Щэ литрэ мини 6-м къыщымыкIэу зы сменэм агъэфедэн алъэкIыщт. БлэкIыгъэ 2020-рэ илъэсым, зэпа­-хырэ узэу дунаир зэлъызыкIугъэр къемыжьэзэ, ахэр мэфэкI шIыкIэм тетэу къызэIуахыгъэх.

Фермэм ишIын заухым Нидерланды къыращыгъэу «за­аненскэ» зыфаIорэ пчэн лъэпкъэу шъхьэ 1000-м ехъу а уахътэм ащ чIэтыгъ. Нэужыми, ягухэлъхэм къызэрадыхэлъытагъэм тетэу, фермэхэр ашIыхи, пчэнышъхьэхэм мызэу, мытIоу ахагъэхъуагъ. Мары джырэблагъи шъхьэ 868-рэ къащагъ. ПстэумкIи мы уахътэм ащ пчэн мини 4,8-рэ чIэт.

Комплексыр къызызэIуахым ООО-у «Агрохолдинг Мирный» зыфиIорэм ипащэу Елена Гангало мэфэкI Iофтхьабзэм къызыщэгущыIэм адыгэ къуаем Адыгеим ыцIэ чыжьэу зэригъэ­Iугъэр къыхигъэщызэ, пчэныщэм хэшIыкIыгъэу ашIыщтыр чэмыщэм хэшIыкIыгъэм нахь дэи мыхъунэу, лъэныкъо горэхэмкIэ ыпэ рагъэшъынэуи зэрэгугъэ­хэрэр къыIогъагъ. Медицинэ учреждениехэм акIегъахьэ пIоми хъунэу къэбзэныгъэм лъэшэу зыщыпылъхэ фермэу «зэщы­лъэгъу» щыгъынхэр пщымыгъэу узчIамыгъахьэрэм щаIыгъ пчэн гъэшIогъэ фыжь цIыкIухэм гугъапIэу арапхыхэрэр къагъэ­шъып­къэжьыныр а чIыпIэм пшIошъ гъэхъугъоягъ. Уахътэм нэмыкI къыгъэлъэгъуагъэр.

АР-м мэкъу-мэщымкIэ и Министерствэ къызэрэщаIуагъэмкIэ, пчэнхэм икIыгъэ илъэсым игъэмафэ, къызызэIуахыгъэм ыуж илъэсныкъо нахьыбэ темышIэзэ, щэ къатынэу рагъэ­жьагъ. Зы шъхьэм чэщ-зымафэм, гурытымкIэ лъытагъэу, литри 3 — 4 къыкIахы. Ащ хэшIыкIыгъэ продукциер къэзышIыщт завод цIыкIоу атIупщыгъэм адыгэ къуае, нэмыкI къое зэфэшъхьафхэр, кIэлэцIыкIухэм апае шхынхэр къыщыдагъэкIых. Япродукцие къалэхэу Москва, Санкт-Петербург, Рес­публикэу Къырым, Краснодар краим ащыIуагъэкIы. IэкIыб къэ­рал бэдзэршIыпIэхэми ары­хьанхэу гухэлъ яI.

ПстэумкIи сомэ миллион 694-рэ инвестициеу республикэм иэкономикэ къыхалъхьанэу мы проектым къыщыдэлъытагъ. Нахьыбэу федэ къыхьыным пае къэралыгъо IэпыIэгъуи ащ къы­раты. 2020-рэ илъэсым къыщегъэжьагъэу 2022-м ыкIэм нэс сомэ миллиони 120-м ехъу субсидиеу къыфэкIонэу щыт. Ащ щыщэу миллион 19,8-р фе­деральнэ бюджетым къыхэхыгъэщт, миллиони 100,6-р респуб­ликэм иахъщэщт. Джащ фэдэу проектым ипхырыщын пае инвестиционнэ кредитэу сомэ миллион 466-рэ «Сбербанкым» къыритыгъ. ХэбзэIахьхэм ятын­кIи хъызмэтшIапIэм фэгъэкIотэнхэр фашIыгъэх.

ООО-у «Мирный-Адыгея» зыфиIорэм щэу республикэм къыщаугъоирэм ыкIи ащ хэшIыкIыгъэ гъомылапхъэу къыщыдагъэкIырэм зэрахигъэхъощтым имызакъоу, IофшIэпIэ чIыпIэхэри къытыгъэх.

ХЪУТ Нэфсэт.