Адыгеим ращыгъэхэм уасэ къафашIыгъ

Я XXIII-рэ Урысые агропромышленнэ къэгъэлъэгъонэу «Дышъэ бжыхь-2021-рэ» зыфиIорэр чъэпыогъум и 5-м къыщегъэжьагъэу и 8-м нэс Москва щыкIуагъ. Республикэм игъомылэпхъэшI, икъыдэгъэкIыжьын промышленность ипредприятие 30-м ехъумэ япродукцие ащ рахьылIагъ.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу республикэм илIыкIо куп пэщэныгъэ дызезыхьагъэр Адыгэ Республикэм ивице-премьерэу, Адыгэ Респуб­ликэм иофициальнэ лIыкIоу Урысые Федерацием и Президент дэжь щыIэ ТхьакIущынэ Мурат ары.

Адыгеим гъомылэпхъэ лъэпкъыбэ Iофтхьабзэм къыщигъэлъэгъуагъ. Республикэм иэкспозицие нафэ къышIыгъ мэкъумэщ лъэныкъом инвестициехэр къыхалъхьанхэмкIэ амалышхохэр зэриIэр, мэкъу-мэщым хэхъоныгъэ егъэшIыгъэным фытегъэ­псыхьэгъэ къэралыгъо программэм ипхырыщынкIэ гъэхъагъэхэр зэрэщыIэхэр.

Къэгъэлъэгъоным хэлэжьагъэ­хэм тиреспубликэ къыфэгъэзэгъэ чIыпIэм адыгэ къуаер, гъэщ лъэпкъ зэфэшъхьафхэр, былымылым, чэтылым, пцэжъыем ахэ­шIыкIыгъэ гъомылэпхъэ зэфэшъхьафхэр, тыгъэгъэзэ дагъэр, тхьацухэкIхэр, хэтэ­рыкIхэр, адыгэ щаир, шъоур, пхъэшъхьэ-мышъхьэ, цумпэ лъэпкъ зэфэшъхьафхэр щалъэгъунхэу амал яIагъ.

Урысые агропромышленнэ къэгъэлъэгъонэу «Дышъэ бжыхь- 2021-рэ» зыфиIорэм икъызэIухын хэлэжьагъэх Урысые Федерацием ивице-премьерэу Виктория Абрамченкэмрэ УФ-м мэкъу-мэщымкIэ иминистрэу Дмитрий Патрушевымрэ.

Лъэныкъоу «Грант къызэратыгъэу зиIоф шIуагъэ къытэу зэхэзыщэрэр» зыфиIорэмкIэ мэкъумэщышIэ-фермер хъызмэт­шIапIэм ипащэу Дэрбэ Азэмат къэгъэлъэгъоным идышъэ медаль къыратыгъ. Мы лъэныкъо дэдэмкIэ тыжьын, джэрз медальхэр къафагъэшъошагъэх мэкъумэщышIэ-фермер хъызмэтшIапIэхэм япащэхэу Валентина Бухаровам­рэ Болэкъо СултIанрэ. «Осетрэ­хэм яхъун» зыфиIорэ лъэныкъом­кIэ мэкъумэщышIэ-фермер хъыз­­мэтшIапIэм ипащэу Шэуджэн Мирэ дышъэ медаль къыхьыгъ.

Къуаджэхэм хэхъоныгъэ ягъэ­шIы­­гъэнымкIэ гъэхъэгъэшхохэр зэрашIыгъэхэм фэшI Мыекъопэ районым иадминистрацие дышъэ медаль, Красногвардейскэ рай­оным иадминистрацие джэрз ме­даль зэнэкъокъум къыщахьыгъэх.

Мэкъумэщ артелэу «Восход» зыфиIорэм имеханизаторэу Сергей Подберезкинымрэ СПК-у «Штурбино» зыфиIорэм имеханизаторэу Сергей Леоновымрэ щытхъуцIэу «Урысые Федерацием мэкъу-мэщымкIэ изаслуженнэ IофышI» зыфиIорэр къафагъэ­шъошагъ.

«Республикэм имэкъу­мэщ-къыдэгъэкIыжьын комплекс иIофышIэхэм агропромышленнэ къэгъэлъэ­гъонэу «Дышъэ бжыхь- 2021-рэ» зыфиIорэм идиплом­хэмрэ имедальхэмрэ къазэращыратыгъэр лъэшэу тигуап. Ахэм гъэ­хъагъэу ашIыгъэхэр нахьыбэрэмкIэ къызыкIэкIуагъэр лъэпкъ проектхэмрэ мэ­къу-мэщым хэхъоныгъэ егъэшIыгъэным фыте­гъэпсыхьэгъэ къэралыгъо программэхэмрэ зэрагъэцакIэхэрэр ары. Мэкъумэщ илъэсыр гъэхъагъэ хэлъэу зэраухыгъэм фэшI тилэжьакIохэм сафэгушIо, псауныгъэ пытэ яIэнэу, яIофшIэн мыпсынкIэ тапэкIи гъэ­хъагъэхэр щашIынэу сафэлъаIо», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу