Урысые Федерацием и Президент и Полномочнэ лIыкIоу КъФШъ-м щыIэм дэжь щызэхэщэгъэ Советым изэхэсыгъоу Владимир Устиновым тхьамэтагъо зыщызэрихьагъэм Адыгеим и ЛIышъхьэу КъумпIыл Мурат хэлэжьагъ. Видеоконференцие шIыкIэм тетэу кIогъэ Iофтхьабзэр «Къэлэ щынэгъончъ» зыфиIорэ программэр КъФШъ-м зэрэщагъэцакIэрэм, мэшIогъэкIосэ къулыкъухэм яIофшIэн зэрэзэхащэрэм афэгъэхьыгъагъ.
Владимир Устиновым ипэублэ гущыIэ зэрэщыхигъэунэфыкIыгъэмкIэ, бэдзэогъумрэ шышъхьэIумрэ лъэшэу зэрэфэбагъэм, бэу къызэрещхыгъэм, псыр къызэриугъэм афэшI цIыфхэм ящынэгъончъагъэ нахь пхъашэу анаIэ зэрэтетын фаер агу къыгъэкIыжьыгъ.
«ЧIыопсым изытет зызэрэзэрихъокIыгъэм къыхэкIэу тхьамыкIагъохэр къэхъунхэ зэрилъэкIыщтым сыдигъокIи фэхьазырынхэ фае. КъФШъ-м хэхьэрэ шъолъыр пстэухэмкIи ащ мэхьанэ иIэу щыт. Урысые Федерацием ишъолъырыбэмэ япсэуалъэхэм, ящагухэм къапэIулъ чIыпIэхэм, социальнэ-экономическэ инфраструктурэм ипсэолъэ мин пчъагъэмэ псыр къакIэуагъ», — къыIуагъ УФ-м и Президент и Полномочнэ лIыкIо.
МашIом зыкъиштэным ищынагъо джыри шъолъырхэм ашъхьарыт. Владимир Устиновым ошIэ-дэмышIэ тхьамыкIагъор зыпкъ къикIыгъэр зэрагъэшIэн, ащкIэ пшъэдэкIыжь зыхьыхэрэм яIофшIэн уасэ ратын фаеу ылъытагъ.
Урысые Федерацием ишъолъырыбэмэ япсэуалъэхэм граждан оборонэмкIэ, ошIэ-дэмышIэ IофхэмкIэ, чIыопс тхьамыкIагъохэм къыздахьыхэрэм ядэгъэзыжьынкIэ иминистрэ ипшъэрылъхэр зыгъэцэкIэрэ Александр Чуприян аппарат-программэ комплексхэу «Къэлэ щынэгъончъ» зыфиIохэрэр нахь шIуагъэ къатэу агъэфедэнхэмкIэ, оперативнэ къулыкъухэм номер зыкIэу «112-мкIэ» афытеонхэмкIэ амалэу зэрахьэхэрэм афэгъэхьыгъэу къыIотагъ.
Системэу «Къэлэ щынэгъончъ» зыфиIорэм ифедеральнэ оператор зыкI зэхащэнэу зэрэрахъухьэрэр, мы лъэныкъомкIэ зэфэдэ шапхъэхэр зэрагъэфедэщтхэр ащ къыIуагъ.
Адыгеим и ЛIышъхьэу КъумпIыл Мурат мэшIогъэкIуасэхэм яIофшIэн нахьышIоу зэрэзэхащэщт шIыкIэм фэгъэхьыгъэ докладыр зэIукIэгъум къыщишIыгъ.
Нэбгырэ 544-рэ зыхэхьэрэ федеральнэ мэшIогъэкIосэ къулыкъум иподразделение 17 республикэм щызэхэщагъ. Адыгэ Республикэм имэшIогъэкIосэ къулыкъу иподразделении 2-мэ нэбгырэ 43-рэ ахэхьэ. Унэе подразделении 2-у нэбгырэ 19 зыхахьэрэри, ведомственнэ мэшIогъэкIосэ къулыкъум иподразделении 4-у нэбгырэ 87-рэ зыхахьэрэри машIом игъэкIосэжьын хэлажьэх. Джащ фэдэу нэбгырэ 903-рэ зыхэхьэрэ добровольческэ объединение 63-мэ, добровольнэ мэшIогъэкIосэ команди 7-мэ ахэт нэбгырэ 55-мэ Iоф ашIэ.
Нэбгырэ мин 12,4-рэ зыщыпсэурэ псэупIэ 22-рэ мэшIогъэкIосэ къулыкъухэм къаухъумэхэрэп.
«Адыгэ Республикэм щыпсэухэрэм якъэухъумэнкIэ мэшIогъэкIосэ подразделениехэм зызэрэрагъэушъомбгъущт планыр къыхахыгъ. Къихьащт илъэсым ыгузэгу нэс поселкэу Яблоновскэм мэшIогъэкIосэ депом ишIын щаухыщт. Урысыем и МЧС Адыгэ РеспубликэмкIэ и ГъэIорышIэпIэ шъхьаI ары кадрэхэр, техникэр ыкIи нэмыкIхэр ащ къыфэзыгъотыщтхэр. Ащ ишIуагъэкIэ нэбгырэ мини 8-р ухъумагъэ хъущт. Станицэу Дондуковскэм дэт мэшIогъэкIосэ частым пае мыгъэ техникэр къэтщэфыщт, Нэбгырэ мин 1,6-мэ ар алъыIэсыщт. Мыгъэ псэупIэу Вольнэми мэшIогъэкIосэ депо къыщызэIутхыщт», — къыIуагъ Адыгэ Республикэм и ЛIышъхьэ.
Экокурортэу «Лэгъонакъ» зыфиIорэ проектыр зэрэпхыращырэм къыдыхэлъытагъэу къушъхьэлъэ чIыпIэхэр машIом щыухъумагъэ хъущтых.
Адыгеим и ЛIышъхьэ зэIукIэгъум икIэух зэрэщыкIигъэтхъыгъэмкIэ, республикэм имэшIогъэкIосэ къулыкъу зегъэушъомбгъугъэнымкIэ нэмыкI шъолъырхэм опытэу яIэр къызфагъэфедэщт. ГущыIэм пае, добровольческэ объединениехэм фэгъэкIотэныгъакIэхэр афашIынэу рахъухьэ.
Адыгэ Республикэм и ЛIышъхьэ ипресс-къулыкъу