Адыгеир гупчэхэм ахалъытэ

Урысыем дзюдомкIэ изэнэкъокъу Адыгэ Республикэм Iоныгъом и 22 – 26-м щыкIуагъ.

Адыгэ къэралыгъо университетым испорт Унэшхоу Кобл Якъубэ ыцIэ зыхьырэм Урысыем ишъо­лъыр 61-мэ дзюдомкIэ ябэнакIохэр алырэгъум щызэIукIагъэх. Яонтэгъугъэхэм ялъытыгъэу якупхэм ахэтхэу бзылъфыгъэхэр, хъулъфыгъэхэр медальхэм афэбэна­гъэх.
СпортымкIэ дунэе класс зиIэ мастер 25-рэ, Урысыем спортымкIэ изаслуженнэ мастери 3, спортымкIэ мастер 303-рэ, спортым имастер хъунымкIэ кандидат 20 Мыекъуапэ щызэнэкъокъугъ. Сэнаущыгъэ зыхэлъ ныбжьыкIэхэм яIэпэIэсэныгъэ къагъэлъэ­гъонымкIэ амалышIухэр яIагъэх.

Адыгэ Республикэм ибэнэкIо 31-рэ зэIукIэгъухэм ахэлэжьагъ.

Зэфэхьысыжьхэр

— 2024-рэ илъэсым Олимпиадэ джэгунхэр Париж щыкIощтых, — къытиIуагъ Урысыем дзюдомкIэ ихэшыпыкIыгъэ хъулъфыгъэ командэ итренер шъхьаIэу, Урысыем, Адыгэ Республикэм язаслуженнэ тренерэу Тао Хьасанбый. – Урысыем изэнэкъокъу Мые­къуапэ дэгъоу щыкIуагъэу сэлъы­тэ. Зичэзыу Олимпиадэм хэлэ­жьэщтхэм якъыхэхын джырэ уахътэ тыпылъ. Ныбжь зэфэшъхьаф зиIэ бэнакIохэр Мыекъуапэ щызэнэкъокъугъэх. ХэшыпыкIыгъэ командэм хэтыщтхэм, тызыкIырыплъыщтхэм тынаIэ атетыдзагъ. Урысыем идзюдо хэхъоныгъэ зэришIырэр Мыекъуапэ щытлъэгъугъ.

— Кобл Якъубэ ыцIэ зыхьырэ спорт Унэшхом итеплъэ дахэ, гъэпсыкIэу иIэр шэпхъэ лъагэхэм адештэ, — къытиIуагъ Урысыем изаслуженнэ тренерэу ЕмкIуж Мухьамэд. – Сэ Къэбэртэе-Бэлъкъарым сыкъикIыгъ, Кобл Якъубэ дэгъоу зышIэщтыгъэхэм сащыщ. Тренерхэм, кIэлэегъаджэхэм Iоф зыдашIэн фэе лъэныкъохэр зэ­нэкъокъум къыщыхэщыгъэх.
ЕмкIуж Мухьамэд игупшысэхэр дэзыгощырэ тренерхэм, бэна­кIохэм таIукIагъ.

ЕплъыкIэхэр

— Мыекъуапэ ифэшъуашэу Урысыем изэнэкъокъу щызэха­щагъ, — къытиIуагъ Адыгэ Респуб­ликэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгэ Республикэм иза­служеннэ тренерэу Бастэ Сэлымэ. – Адыгэ Республикэм и ЛIышъхьэу КъумпIыл Мурат, Пра­вительствэм, Парламентым якъу­лыкъушIэхэр, спортым пыщагъэхэр алырэгъум щыкIогъэ бэнэгъухэм яплъыгъэх, тренерхэм, зэхэщакIо­хэм гущы­Iэгъу афэхъугъэх.

Спорт псэолъэшхо Мыекъуапэ щагъэпсынэу, еджэпIэ-зыгъэсапIэ ар ашIынэу, алырэгъум ибэнэпIи 4-мэ а зы уахътэм ащызэнэкъо­къунхэу Кобл Якъубэ мурадхэр иIагъэх. Чыжьэу плъэщтыгъэ тренер-кIэлэегъэджэ цIэрыIом игухэлъхэр щыIэныгъэм щыпхыращыгъэх.
Зэнэкъокъум икъызэIухыгъо мафэ имызакъоу, ти ЛIышъхьэу КъумпIыл Мурат командэхэм язэIукIэгъухэм яплъынэу, зэдэгущыIэгъухэм ахэлэжьэнэу спорт Унэшхом къэкIуагъ.

КъумпIыл Мурат апэу зыIукIагъэхэм ащыщых Кобл Якъубэ ишъхьэгъусэу Джарэтрэ ыпхъоу Светланэрэ. Гуфэбэныгъэ зыхэлъ зэдэгущыIэгъум къы­хэдгъэщыгъэр КъумпIыл Мурат Коблхэм яунагъо зэрэфэра­зэр, Кобл Якъубэ ишIушIагъэ зэригъэлъапIэрэр ары.

Джарэт нэгушIоу, гупшысэ куухэм зэлъаштэу зэрэщысыр тлъэгъущтыгъэ. Ыгу ихъыкIырэр занкIэу къыхимыгъэщыгъэми, «тхьашъуегъэп­сэу» къариIожьыгъ КъумпIыл Мурат, зэдэгущыIэгъум хэлэжьэгъэ тренерхэм, спортсменхэм.

Олимпиадэ джэгунхэм дышъэр къа­щызыхьыгъэ Муд­рэнэ Бислъан, хэ­гъэгум дзюдомкIэ ихэшыпыкIыгъэ ко­ман­дэ итренер шъхьа­Iэу Тао Хьасанбый, фэшъхьафхэм ти ЛIышъхьэ гущыIэгъу афэхъугъ.

— Мыекъуапэ сыщеджагъ, ныбджэгъухэр щысиIэх, телефонкIэ тызэфытео, — къытиIуагъ Санкт-Петербург щыпсэоу, спортымкIэ дунэе класс зиIэ мастерэу Улан Гуртуевым. — Урысыем изэнэкъокъу гъэшIэгъонэу Мые­къуапэ зэрэщыкIуагъэр, тызыхэлэжьэгъэ зэдэгущыIэгъухэр шIукIэ сыгу къэкIыжьыщтых.

Алик Бекузаровыр Темыр Осетием щыщ, Владимир Драчко Татарстан дзюдомкIэ ихэшыпыкIыгъэ командэ итренер шъхьаI, тIури Урысыем изаслуженнэ тренерых. Гъэунэ Анзор Мыекъуа­пэ щеджагъ, Урысыем ихэшыпыкIыгъэ командэ итренер. Виталий Макаровыр спортышхом щыцIэрыIу. Дзюдом, Кобл Якъубэ къатегущыIэхэзэ, Адыгеим испорт псэуалъэхэм хэхъоныгъэ зэрафэ­хъугъэм яеплъыкIэхэр къыраIолIагъэх, республикэм иIэшъхьэтетхэм къащытхъугъэх.

Медальхэр къыдэзыхыгъэхэр

Хъулъфыгъэхэр купи 7-мэ ащызэнэкъокъугъэх. Иркутскэ, Тюмень хэкухэм ябэнакIохэу Рамазан Абдулаевым, кг 60, Алим Балкаровым, кг 66-рэ, апэрэ чIыпIэхэр къыдахыгъэх. Чэчэным щыщхэу Байсангур Багаевыр, кг 73-рэ, Абас Азизовыр, кг 81-рэ, хэгъэгум ичемпионых. Давид Оганисян, кг 90-рэ — Краснодар край, Нияз Билаловым, кг 100 – Татарстан, Давид Бабаян, кг 100-м къехъу, апэрэ чIыпIэхэр ахьыгъэх. Бзылъфыгъэхэри купи 7-мэ ащызэнэ­къокъугъэх.

Адыгэ Республикэм дзюдомкIэ ибэнакIоу Къуижъ Бислъан, кг 73-рэ, ящэнэрэ чIыпIэр къыди­хыгъ, тренерхэр Беданыкъо Рэмэзан, Хьэпэе Асхьад.

Командэхэм язэнэкъокъу

Урысыем ишъолъырхэм якомандэхэм язэнэкъокъу хэушъхьафыкIыгъэу зэхащагъ. Адыгеим ибэнакIохэу Р. ЦIыкIур, А. ПашIор, В. Ингъушыр, нэмыкIхэри Къыблэм ихэшыпыкIыгъэ командэ хэтыгъэх.

Апэрэ чIыпIэр Урал федеральнэ шъолъырым къыдихыгъ. Мос-ква икомандэ ятIонэрэ чIыпIэр ыхьыгъ. Приволжскэ шъолъырым, Санкт-Петербург ящэнэрэ чIыпIэхэр ахьыгъэх.

Къыблэм ятфэнэрэ чIыпIэр къыдихыгъ.

Хэгъэгум изэнэкъокъу кIэухым фэкIуагъ. ЗэхэщакIохэм, тренер­хэм зэфэхьысыжьхэр ашIых. Адыгэ Республикэм ибэнэпIэ-еджа­пIэхэм япащэхэр, агъасэхэрэр егупшысэнхэу, Олимпиадэ джэгунхэм, дунэе зэнэкъокъухэм ахэ­лэжьэнхэм фэшI амалхэр къа­гъотынхэу уахътэ яI.

ЕмтIылъ Нурбый.