Икъашъо мамыр тамыгъ

Адыгэ Республикэм и Къэралыгъо академическэ къэшъокIо лъэпкъ ансамблэу «Налмэсыр» зызэхащагъэр мыгъэ илъэс 85-рэ хъугъэ.

Дунаим щызэлъашIэрэ «Налмэ­сым» имэфэкI пчыхьэзэхахьэхэр Къыблэм, Темыр Кавказым ащыкIуагъэх. Къырым тикъэшъуакIо­хэр щыIагъэх.

Кощхьэблэ, Шэуджэн, Красногвардейскэ, Теуцожь районхэм, нэмыкIхэм «Налмэсым» шIушIэ концертхэр къащитыгъэх.

— ШIушIэ концертхэр Адыгэ Республикэм щылъытэгъэкIуатэх, — къытиIуагъ «Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгэ Республикэм инароднэ артистэу Хъоджэе Ас­лъан. – Ансамблэм иблэкIыгъэ уахътэ, инепэрэ щыIакIэ афэгъэ­хьыгъэ пчыхьэзэхахьэхэр, илъэс зэфэшъхьафхэм «Налмэсым» хэ­тыгъэхэм афэгъэхьыгъэ зэIукIэгъухэр цIыфхэм ашIогъэшIэгъоных. Ащ фэгъэхьыгъэ концертыр Iоныгъом и 30-м Мыекъуапэ щыкIощт.

Хэгъэгум лъэпкъхэу исхэм язэфыщытыкIэхэр гъэпытэгъэнхэмкIэ Пшызэ и Къэралыгъо академическэ къэзэкъ хор икъэшъуакIохэмрэ «Налмэсымрэ» зэгъусэхэу «Урысыем икунакхэр» зыфиIорэ концертхэр Краснодар ыкIи Мыекъуапэ къащатыгъэх.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ипэгъокIэу «Зы бзэ, зы хабзэ, зы лъэпкъ» зыфиIорэ концерт программэр Мыекъуапэ, Налщык къащагъэлъэгъуагъ. Ащ Къэбэртэе-Бэлъкъарым иансамблэ цIэрыIоу «Кабардинкэмрэ» «Налмэсымрэ» хэлэжьагъэх.

Искусствэр зышIогъэшIэгъонхэм зэхахьэр лъэшэу агу рихьыгъ, чъэпыогъум и 7-м икIэрыкIэу Мыекъуапэ къыщатыщт.

«Налмэсыр» искусствэм лъэпсэ пытэ щызышIыгъэ куп цIэрыIу. Адыгэ Республикэм ищытхъу дунаим щиIэтызэ, IэкIыб къэралыгъо пчъагъэхэм, Москва, Санкт-Петербург, фэшъхьафхэм концертхэр къащитыгъэх. Адыгеим имэфэкIхэм, фестивальхэм ахэлажьэзэ, республикэ гупсэм икъэралыгъо гъэпсыкIэ егъэпытэ.

Сурэтым итыр: «Налмэсыр» къэшъо.