СССР-м изаслуженнэ тренерэу, я ХХ-рэ лIэшIэгъум Урысыем дзюдомкIэ итренер анахь дэгъоу Кобл Якъубэ фэгъэхьыгъэ шIэжь зэнэкъокъу ПсышIуапэ щыкIуагъ.
Краснодар краим икъалэхэм, Къэрэщэе-Щэрджэсым, Адыгэ Республикэм дзюдомкIэ ябэнэкIо 200 фэдиз алырэгъум щызэIукIагъ. Зэнэкъокъум икъызэIухын фэгъэхьыгъэ зэхахьэм къыщыгущыIагъэх Урысыем дзюдомкIэ ихэшыпыкIыгъэ хъулъфыгъэ командэ итренер шъхьаIэу, Урысыем, Адыгеим язаслуженнэ тренерэу Тао Хьасанбый, Олимпиадэ джэгунхэм дышъэр къащызыхьыгъэ Мудрэнэ Бислъан, нэмыкIхэри.
Зэхахэм хэлэжьагъэх ПсышIопэ районым физкультурэмкIэ ыкIи спортымкIэ и Комитет итхьаматэу, Мыекъопэ бэнэпIэ еджапIэм щапIугъэу Галина Нестеревар, Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу Бастэ Сэлымэ.
Яонтэгъугъэхэм ялъытыгъэу ныбжьыкIэхэр купхэм ащызэнэкъокъугъэх. Адыгэ Республикэм ибэнакIоу Максим Гонскэм, кг 73-м къехъу, апэрэ чIыпIэр къыдихыгъ. Батырыр тренерэу Шъынэхъо Мурат егъасэ.
Къушъхьэ Самир, кг 50, Цэй Алый кг 42-рэ, ятIонэрэ чIыпIэхэр къахьыгъэх. БэнакIохэм япащэх тренерхэу Хьакурынэ Дамир ыкIи Джармэкъо Рустам.
Байкъулэ Аслъан, кг 46-рэ, ШъэуапцIэкъо Ибрахьим, кг 46-рэ, ящэнэрэ чIыпIэхэр къафагъэшъошагъэх. КIалэхэм япащэх тренерхэу Шъынэхъо Муратрэ Джармэкъо Рустамрэ.