ЛIэужхэр зэфещэх
ЗэлъашIэрэ сурэтышI-модельерэу СтIашъу Юрэ ыныбжь илъэс 90-рэ зэрэхъурэм фэгъэхьыгъэ зэIукIэгъухэр Адыгэ Республикэм щэкIох.
КъокIыпIэм щыпсэухэрэ лъэпкъхэм искусствэхэмкIэ я Къэралыгъо музей и Темыр Кавказ къутамэ СтIашъу Юрэ Iоф щешIэ. Ащ итворчествэ фэгъэхьыгъэ къэгъэлъэгъонхэм нэбгырабэ яплъы.
«Нартхэм ячIыналъ» зыфиIорэ фольклор фестивалэу Мыекъуапэ щыкIуагъэм хэлажьэхэрэр музеим зэкIохэм СтIашъу Юрэ IукIагъэх. Адыгэ шъуашэхэр, тхыпхъэхэр, лIэкъо тамыгъэхэр Ю. СтIашъум зэришIыхэрэр узыIэпищэу къафиIотагъ. Саеу «Адыгэ Республикэм», «ЩэIагъэм», шъуашэу «ТекIоныгъэм исаугъэт», нэмыкIхэм яплъыгъэх Дагъыстан, Чэчэным, Къалмыкъым, Краснодар краим, Астрахань хэкум, нэмыкIхэм къарыкIыгъэхэр.
СтIашъу Юрэ искусствэм иамалхэмкIэ лъэпкъхэм язэфыщытыкIэхэр егъэпытэх, лIэужхэр зэрепхых, мамыр щыIакIэм идэхагъэ къеIуатэ.
НэкIубгъор зыгъэхьазырыгъэр
ЕмтIылъ Нурбый.