ПроектыкIэм илъэтегъэуцу

УФ-м и Правительствэ къыдигъэкIырэ гъэзетэу «Российская газета» зыфиIорэм проектыкIэу «Отдых и туризм в России» зыцIэм игъэцэкIэн регъажьэ. Ащ шъолъырхэр зэкIэ хагъэлэжьэщтых, зэхъокIыныгъэу, хэхъоныгъэу зекIоным ышIыхэрэр гъэзетым къыхиутыщтых.

Редакцием икъутамэхэу гъэзетыр къызщытыра­дзэхэрэ къалэхэм проектым илъэтегъэуцо ащы­кIуагъ, ахэм Краснодари ащыщыгъ. Урысыем и Къыблэ лъэныкъо хэхьэрэ субъектхэм зекIонымкIэ яэкспертхэр, специалистхэр, нэмыкI IофышIэхэр лъэтегъэуцом хэлэжьагъэх.

Санкциеу тихэгъэгу къытыралъхьагъэхэм ковидыр къакIэлъыкIуи зекIоным илъэныкъо иIофхэр хэпшIыкIэу зэтеуцуагъэх. Хэгъэгу кIоцI зекIонми зэрэщыгугъыгъэхэу гъэхъагъэхэр ышIынхэ ылъэкIыгъэп. Арэу щытми, грантхэр къыдэзыхыхэрэм афагощынэу Правительствэм и Тхьаматэу М. Мишустиным иунашъокIэ сомэ миллиардым ехъу мы илъэсым джыри зекIоным къыфыхагъэкIыщт.
ЗекIоным фэгъэхьыгъэ проект зэфэшъхьафхэу, мы илъэсым атIупщыгъэхэу лажьэрэр макIэп, ау хэгъэгу кIоцI зекIоным ипшъэрылъхэр егъэцакIэхэу ыкIи зыкъиIэтыгъэу зэрэщымытыр тинэрылъэгъу.

Джары проектыкIэу аштагъэм игъэцэкIэн фэгъэхьыгъэ лъэтегъэуцом хэлэжьагъэхэр зекIон Iофыр зэхэмызыным пае къызэрэзэтебгъэнэн плъэкIыщт амалхэмрэ хэкIыпIэхэмрэ яшъыпкъэу зыкIатегущыIагъэхэр.

Лъэтегъэуцом хэлэжьагъэх Адыгэ Республикэм зекIонымрэ зыгъэпсэфыпIэхэмрэкIэ и Комитет ипащэ игуадзэу Джарымэ Беллэ, Къэбэртэе-Бэлъкъарым зыгъэпсэфыпIэхэмрэ зекIонымрэкIэ иминистрэу ШэуджэнцIыкIу Мурат, Ставропольем, «Роза Хутор» зыфиIорэ зыгъэпсэфыпIэм, Шъачэ ихьакIэщэу «Жемчужинам», нэмыкI шъолъырхэм къарыкIыгъэ лIыкIохэр.

Краснодар краим илъэс псаум зэрэщыфабэм къы­хэкIэу хьакIэхэр къебгъэблэгъэ зэпытынхэу амал щыI. Ар краим зыгъэпсэфыпIэхэмрэ зекIонымрэкIэ иминистрэу Мария Золотухинам ипсалъэ къыщыхигъэ­щыгъ.

— ЗекIохэм ашIогъэшIэгъоныщт чIыпIэхэр, чIыопсым исаугъэтхэр, исп унэхэр зэрарагъэлъэгъухэрэм дакIоу хьакIэхэм лъэпкъ шхынхэр, псыкъечъэххэр, къушъхьэ ­къечъэхыпIэхэр, нэмыкIхэри агу рихьыщтых. Щысэу къыхьыгъ зыгъэпсэфыпIэу «Роза Хуторыр». Ащ илъэс псаум зэпимыгъэоу Iоф ешIэ. Къушъхьэхэм къызэрячъэхыхэрэм фэшъхьафэу кIымафэрэ кIэшIэгъэ кIэпсэ гъогум икабинэхэм арысхэу къушъхьэм дэкIуаех, къушъхьэ тIуакIэхэм ядэхагъэ алъэгъу, загъэпсэфы.

Шъыпкъэр пIощтмэ, тэ тикъушъхьэхэри зыгъэпсэфыкIэ амал зэфэшъхьафхэм атегъэпсыхьагъэх. Шыхэм уатесэу къащыпкIухьэшъущт, къуашъом уисэу къушъхьэ тIуакIэхэм адэчъырэ псыхъом зыребгъэхьыхыщт, хьэхэр Iажэм кIэшIагъэхэу укъыращэкIыщт. Адыгэ къуаеу осэшхо зыфашIырэр зэрэрахырэр, адыгэ къужъэу мыкIодэу илъэсырэ щылъырэр, кушъэхапхэр, лъэтегъэуцор, нэмыкIхэри тичIыналъэ щыплъэгъущтых. Мары республикэм зекIоным фэгъэхьыгъэ проект инитIу щагъэцэкIэнэу джыри щырагъэжьагъ. Лэгъо- Накъэ чIыгу гектар минрэ ныкъорэ къызэлъиубытэу зыгъэпсэфыпIэ тырашIыхьащт, «Даховская поляна» зыцIэ чIыпIэ дахэм зыгъэпсэфыпIэ щагъэпсышт.

ПроектыкIэу «Отдых и туризм в России» зыфиIорэм илъэтегъэуцо окIофэкIэ «РГ» ижурналистхэми, зекIоным испециалистхэми зыгъэпсэфыпIэ чIыпIакIэхэр агъэнэфагъэх. Зэгъусэхэу Iофтхьэбзэ зэфэшъхьафхэр зэхащэщтых. Чыжьэу умыкIоми, IэкIыб хэгъэгу умыбыбыми тикъэралыгъошхо икъыб­лэ шъолъырхэм ащыплъэгъуни, ащыбгъэшIэгъони, умылъэгъугъэ чIыпIэ хьалэмэтхэри зэрэщыIэхэр къатхыщтых, цIыфхэм арагъэшIэщтых.

Шъаукъо Аслъангуащ.