Уфэмыхьазырэу утекIощтэп

«АГУ-Адыиф» Мыекъуапэ – «Луч» Москва – 27:34 (13:I9).

Iоныгъом и 11-м Мые­къуапэ щызэдешIагъэх.


«Адыиф»: КъэлэпчъэIутхэр: Скнарь, Баскакова; ешIакIохэр: Клименко – 5, Кириллова – 1, Морозова – 4, Богданова – 7, Куцевалова – 3, Казиханова – 2, Дмитриева – 4, Кобл – 1, Краснокутская, Колодяжная, Краснова, Мещерякова.

2021 – 2022-рэ илъэс зэнэкъо­къур «Адыифым» ригъэжьагъ. Апэрэ зэIукIэгъум тиешIакIохэр икъоу фэмыхьазырхэу къычIэ­кIыгъ. ЦСКА-м иешIэкIо ныбжьыкIэхэу Ю. Баевар, В. Юрченковар, А. Федоровар, нэмыкIхэри бэджэндэу «Лучым» ритыгъэх, Урысыем ихэшыпыкIыгъэ ныбжьыкIэ командэ хэтых. Пшъашъэхэм зэнэкъо­къум щысэшIу къыщагъэлъагъо.

Ю. Баевар Мыекъуапэ щыщ. «Адыифым» щешIэзэ Урысыем икIэлэеджакIохэм яспартакиадэ зыхэлажьэм, тиклуб апэрэ чIыпIэр къыдихыгъ. А лъэхъаным Ю. Бае­вар «Астраханочкэм» рагъэблэгъагъ, ащ ыуж ЦСКА-м аштагъ. «Адыифыр» «Лучым» зыдешIэм Ю. Баевам гъогогъу 11 тикомандэ икъэлапчъэ Iэгуаор къыди­дзагъ.

ЗэIукIэгъур Мыекъуапэ зыщырагъажьэм, текIоныгъэр «Лучым» зэрихьыщтыр ешIэгъум къыщылъа­гъощтыгъ. Пчъагъэр зэрэлъыкIуа­тэщтыгъэр: 1:4, 2:5, 4:7, 6:10, 7:11, 9:I4, 11:17.

Зэхэщэн Iофыгъохэр З. Коблым гупчэм щигъэцакIэщтыгъэх. И. Клименкэм, Д. Богдановам, А. Морозовам, М. Дмитриевам къэлапчъэм Iэгуаор дадзэнымкIэ щысэшIу къагъэлъагъощтыгъ. И. Клименкэр гупчэм псынкIэу щешIэщтыгъ, ухъумакIохэм апхырыкIыщтыгъ. ЕшIапIэм ыбгъухэм ащешIэхэрэр ошIэ-дэмышIэу апэкIэ илъынхэм, хъагъэм Iэгуаор радзэ­ным фэшI амалхэр къагъотынхэм «Адыифыр» фытегъэпсыхьагъэп.

– ЕшIэгъур «Лучым» зэрэтшIуи­хьыгъэр гухэкI тщыхъугъ, гандболыр зыгу рихьыхэу къытлъыплъэ­хэрэм къытфагъэгъунэу тялъэIу, – къытиIуагъ «Адыифым» итренер шъхьаIэу Александр Реввэ. – Къы­кIэлъыкIощт зэIукIэгъухэм на­хьышIоу зафэдгъэхьазырыщт.

«Адыифым» пенальтитIу хъа­гъэм ридзагъэп, гъогогъуи 4 къэлэпчъэпкъым Iэгуаор тиешIакIохэм тырагъэфагъ. А. Куцеваловам шъобж тещагъэу ешIэгъум хэлэ­жьагъ. Ахэри къыдэтлъытэхэзэ, «Адыифым» нахьыбэрэ тигъэгушIон фаеу тэлъытэ. ТикъэлэпчъэIутхэр цыхьэшIэгъоу ешIагъэхэп, щыкIагъэу афэтлъэгъурэр дагъэзыжьыщтэу тэгугъэ.

ЧIыпIэхэр

Суперлигэм хэт клубхэу купэу «А»-м щешIэхэрэр.

1. «Ростов-Дон» – 6
2. ЦСКА – 4
3. «Лада» – 3
4. «Звезда» – 3
5. «Кубань» – 2
6. «Астраханочка» – 0.
Купэу «Б»-р
1. «Динамо» – 4
2. «Университет» – 2
3. «Луч» – 2
4. «Ставрополье» – 2
5. «Адыиф» – 0
6. «Уфа» – 0.
ШъунаIэ тешъудз: клубхэм ешIэгъоу яIагъэр зэфэдизэп.
«Адыифым» иешIэгъухэр
19.09
«Уфа» – «Адыиф»
21.09
«Университет» – «Адыиф»
3.10
«Адыиф» – «Ставрополье».