Хьыкум приставхэм къаты

Мыекъуапэ щызэхащагъ

Хьыкум приставхэм я Мыекъопэ къэлэ отделрэ гъогурыкIоныр щынэгъончъэнымкIэ Къэралыгъо автоинспекциемрэ яIофышIэхэм видео тезыхырэ камерэхэр ыкIи транспортым тетхэгъэ тамыгъэхэр зы­гъэунэфырэ пкъыгъохэр къызфагъэфедэзэ рейд рагъэкIокIыгъ.


Ар окIофэ зэхафынэу аIэкIэлъыгъэ Iоф 20-м ехъум атефэрэ сомэ мини 180-р къызэкIагъэкIожьыгъ. ЧIыфэ зытелъ нэбгырэ 12-мэ яавтотранспортхэм арест атыралъхьагъ.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ шъугу къегъэкIыжьы, чIыфэ шъутелъымэ зэжъугъэшIэным е ар игъом къэшъупщыныжьын шъулъэкIыным пае сайтэу «r01.fssp.gov.ru-м» икъэбарлъыгъэIэс системэу «Банк данных исполнительных производств» зыфиIорэм къытырэ амалхэр къызфэжъугъэфедэнхэ шъулъэкIыщт.

ЧIыфэр къыпщыныжьыгъ

Хьыкум приставхэм я Красногвардейскэ район отдел икъулыкъушIэ ипшъэрылъхэр зэрифэшъуашэу зэригъэцэкIагъэхэм ишIуагъэкIэ, кIэлэпIупкIэр зымытырэ мы муниципалитетым щыпсэурэ хъулъфыгъэм чIыфэр къыпщыныжьыгъ.

Хьыкумым унашъоу ышIыгъэмкIэ, хъулъфыгъэм хахъоу къыIэкIахьэрэм ызыплIанэ зыныбжь имыкъугъэ исабый ритын фэягъ. Ау ипшъэрылъхэр зэримыгъэцакIэхэрэм къыхэкIэу чIыфэр сомэ мин 60-м ехъугъ.

Хьыкум приставым Iофыр зэхифызэ, чIыфэ зыте­лъым машинэ тетхагъэу ыгъэунэфыгъ. Хэбзэгъэуцугъэу щыIэм диштэу, охътэ гъэнэфагъэм автомобилыр зэрифэн фимытэу хэбзэухъумакIом унашъо ышIыгъ.

Ащ ыуж хъулъфыгъэм чIыфэр псынкIэу къыпщыныжьыгъ, ащкIэ Iофыр зэфэшIыжьыгъэ хъугъэ.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.

Тхьаркъохъо Адам.