Диспансерым иамалхэм ахагъахъо

Адыгэ республикэ клиническэ сымэджэщым хахьэу 2019-рэ илъэсым къызэIуахыгъ карди­ологи­ческэ диспансер. Ащ медицинэ IэпыIэгъу щарагъэгъоты, щалъэплъэх гу-лъынтфэ уз зиIэхэм.

2021-рэ илъэсым «рентгенэндоваскулярное вмешательство» зыфаIорэм фэдэ операцие зэфэшъхьафхэр гум фашIынэу зэрэхъугъэр 2020-м елъытыгъэ­мэ, проценти 8,7-кIэ нахьыбэ хъугъэ. Ащ фэдэу гум еIэзэнхэ амал зэрагъотыгъэм ишIуагъэкIэ гу-лъынтфэ узхэм апкъ къикIыкIэ сымэджэщым щылIэхэрэм япчъагъэ, 2020-рэ илъэсым егъэпшагъэмэ (процент 21,5-рэ), 2021-рэ илъэсым процент 19,4-м нэсэу къехыгъ.

Шъугу къэдгъэкIыжьын, лъэпкъ проектэу «Псауныгъэр къэухъу­мэгъэныр» зыфиIорэм къызэрэщыдэлъытагъэу, медицинэ организациехэм ящыкIэгъэ оборудованиемкIэ язэтегъэпсыхьан сомэ миллион 53,7-рэ пэIуагъэхьанэу агъэнэфагъ. Гу-лъынтфэ узхэм зыщяIэзэхэрэ тиреспубликэ имедицинэ учреждении 3-мэ язэтегъэпсыхьан ахэм ахэфэ.

Медицинэ оборудование зэфэшъхьафи 127-рэ зэрагъэгъотынэу щыт республикэ медицинэ организации 3-мэ апае:

— Мыекъопэ къэлэ клиническэ сымэджэщым пае – оборудовании 6;

— Адыгэ республикэ клиниче­скэ сымэджэщым пае — 109-рэ;

— Адыгэ межрайон сымэджэщэу К. М. Батмэным ыцIэ зыхьырэм пае – 12.

«Ащ фэдэ оборудованием ишIуагъэкIэ врачхэм нахь шIэхэу ыкIи нахь тэрэзэу узыр агъэунэфыщт, цIыфым ипсауныгъэ зэхъокIыныгъэу фэхъурэми лъып­лъэнхэ алъэкIыщт», — къыхигъэ­щыгъ Адыгэ Республикэм псауныгъэр къэухъумэгъэнымкIэ и Министерствэ Iэзэн-пэшIоры­гъэшъ IэпыIэгъумкIэ иотдел ипащэу Къушъхьэ Санят.