Санкт-Петербург, Хабаровск…

Хэгъэгум иныбжьыкIэхэм кушъхьэфэчъэ спор­тымкIэ язэнэкъокъу Адыгэ Республикэм игъогу­хэм ащыкIуагъ.

Илъэс 19 — 22-рэ зыныбжь пшъашъэхэм язэIукIэгъухэр Мые­къопэ районым щызэхащагъэх. Санкт-Петербург, Хабаровскэ кра­им, Адыгеим, нэмыкIхэм ащыщ­хэр зэнэкъокъугъэх.

Купым хэтхэу километрэ 80 пшъашъэхэм къызакIум, апэрэ чIыпIэр Анастасия Печерских къыдихыгъ. Санкт-Петербург ар щэпсэу, хэгъэгум изэнэкъокъухэм бэрэ ахэлажьэ.

Адыгэ Республикэм испорт еджапIэ зыщызыгъэсэрэ Гюнель Мехтиевам тыжьыныр къыфа­гъэшъошагъ.
Хабаровскэ краим къикIыгъэ Регина Жапаровам джэрзыр къыдихыгъ. ИIэпэIэсэныгъэкIэ къызэрахэщыгъэм фэшI итренер­хэм ар афэраз.

Зэнэкъокъур зезыщагъэхэм ащыщэу Александр Вороновыр Мыекъуапэ щэпсэу. Ащ зэрилъы­тэрэмкIэ, пшъашъэхэм яспорт ухьазырыныгъэ хагъэхъонымкIэ амалышIухэр яIагъэх. Зэнэкъо­къур тигъогухэм дэгъоу ащы­кIуагъ.

Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк хагъэунэфыкIырэ чIыпIэхэр къыдэзыхыгъэхэм афэгушIуагъ. Кушъхьэфэчъэ спортым тиреспубликэ зыщиушъомбгъугъэу ащ елъытэ. Зы мазэм къыкIоцI Урысыем изэнэкъокъу зэфэшъхьафхэр кушъхьэфэчъэ спортымкIэ Адыгеим щыкIуагъ.

Сурэтым итхэр: Анатолий Лелюк, Гюнель Мехтиевар, Анастасия Печерских, Регина Жапаровар, Александр Вороновыр.