МэфэкIымкIэ сафэгушIо!

УкIэлэегъэджэным мэхьанэшхо зэриIэр егъэджэн Iофым упылъы зыхъукIэ къыбгурэIо: цIыфыгъэ, зэхэшIыкI, шэн-хэбзэ дахэхэр, гуфэбэныгъэ пхэлъынхэ, гулъытэшхо уиIэн, фае.

Джырэ уахътэм къыздихьыгъэ технологиякIэу, методикакIэу щыIэхэм хэ­шIыкI афыуиIэн къодыер армырэу, Iофышхо мафэ къэс, сыхьат къэс зыдэп­шIэныр ищыкIагъ, узынэсыгъэм укъыщымыуцоу, уапэ ебгъэхъун фае – джары непэрэ зэхъокIыныгъэу гъэсэныгъэ системэм иIэ хъугъэхэм тыкъызфаIэтырэр.

Щытхъур къэлэжьыгъуай, ау мыщ фэдэ гущыIэхэмкIэ уикIэлэеджакIохэм зыкъыпфагъэзэныр сыда зымыуасэр?!

«Адыгабзэр – къарэлыгъуабз,
ШIэныгъэ минмэ ар яIункIыбз.
ЗэкIэ еджакIохэр тыпшIыгъ о разэ,
Амалэу тиIэр зэкIэ ощ пай!»

Льытэныгъэшхо зыфэсшIырэ кIэлэегъаджэхэр! КъызгурэIо непэрэ мэфэкI мафэу Iоныгъом и 1-р шъоркIи, еджа­кIохэмкIи, ны-тыхэмкIи, тэ, кIэлэегъаджэу пенсием щыIэхэмкIи, зэрэмэфэкIышхор. УкIэлэегъэджэныр гъэшIэгъоны, ау псынкIэп, цIыфыкIэм ышъхьэ къырыкIощтыр шъоры зыIэ илъыр. Тхьэм щэIагъэ къышъухилъхьанэу, дахэкIэ егъэджэн уахътэм фэжъугъэзэжьынэу, ежь еджа­кIохэми гуетыныгъэ яIэнэу сышъуфэлъа­Iо. Уеджэныр Iофыгъо псынкIэп, ау шIуагъэу къыхьырэр бэ.

Тэ тезыгъэджэгъэ кIэлэегъаджэхэм ахъщэшхо къамыгъэхъагъэми, шIоу алэжьыгъэр мыкIодыжьынэу хъугъэ. Ахэм яцIыфышIугъэрэ яшIэныгъэрэ непи тщыгъупшэхэрэп, апсэ халъхьэу, шIэныгъэр тшъхьэ къыралъхьэ зэрашIоигъуагъэр непи илъэс 80-м сынэсыжьыгъэу сщыгъупшэрэп. Сэ сыкIэлэегъэджагъ, къызгурэIо ащ бэу зэрелъытыгъэр.

Непэрэ кIэлэегъэджэ ныбжьыкIэхэм акъылэу, гулъытэу, чаныгъэу ахэслъагъорэр бэ. ЕджакIохэр еджэным зэрэкIагъэгушIущтхэм лъэшэу пылъых. Егъэ­джэн-пIуныгъэ Iофыгъуабэм кIэлэегъэджэ ветеранхэр ахагъэлажьэх, кIэлэеджа­кIохэм гущыIэгъу афэхъух. ЦIыф гъэшIэгъон уIукIэнри тхылъ гъэшIэгъон уеджэнри зэфэдэ.

КIэлэегъаджэм игъэхъагъэ псынкIэу къэлъагъорэп, ау шIэныгъэу аритыгъэр егъэшIэрэ тынэу ныбжьыкIэхэм къахэнэ.

МэфэкIымкIэ тыгу къыддеIэу еджа­кIохэм тафэжъугъэлъаIу псауныгъэ пытэ яIэнэу, еджэныр афэукIочIынэу, якIэсэнэу, егугъунхэу ыкIи цIыфышIу хъунхэу.

Пщыкъэнэ Май.
КIэлэегъэджэ IофшIэным иветеран.