Мэзэ IофшIэныр зэфахьысыжьыгъ

Шъолъыр гъэIорышIэнымкIэ Гупчэм шышъхьэIу мазэм Iоф зэришIагъэр зэфихьысыжьыгъ. Хэбзэ къулыкъухэр ягъусэхэу республикэм щыпсэухэрэм къаIэтыгъэ Iофыгъо 1929-мэ ащыщэу 1756-р зэхафыгъ, 173-у къэнагъэхэм адэлажьэх.

ЫпэкIэ зэрэщытыгъэу, анахьэу зыгъэгумэкIыхэрэр зэтегъэпсыхьан Iофхэр ары. Урамхэу Крестьянскэмрэ Кольцовымрэ зыщызэхахьэхэрэм остыгъэу тетыр зэрэмыблэрэм фэгъэхьыгъэу Мыекъуапэ щыпсэурэ хъулъфыгъэм зафигъэзагъ. «Госуслуги. Решаем вместе» зыфиIорэ порталымкIэ къыIэкIэхьэгъэ къэбарыр къэлэ гъэIорышIэнымкIэ гупчэм иIофышIэ къэлэ администрацием лъигъэIэсыгъ. Ащ ыуж электросетьхэм апылъ къулыкъум щыкIагъэр дигъэзыжьыгъ.

Красногвардейскэ районым щыIэ гупчэм иIофышIэ къыхэлажьэзэ джащ фэдэу зы Iофыгъо щызэшIуа­хыгъ. Хьатикъуае иурамхэу Суворовым ыцIэ зыхьырэмрэ Шэуджэнымрэ ащыпсэухэрэм къуаджэм ипащэ зыфагъэзагъ гидротехническэ псэуалъэм идэгъэлъадэ къызэрэкIэчъырэм фэгъэхьыгъэу. Ащ пэгъунэгъу унэхэм псыр къакIэлъэдэным ищынагъо щыIагъ. Ар къэмыгъэхъугъэным пае Хьатикъое къоджэ псэупIэм иадминистрацие лъэтемытэу Iофым фежьагъ ыкIи етIэ машинэ 80 фэдиз Iуагъэуагъ.

Мыекъуапэ щыщ хъулъфыгъэми порталэу «Госуслуги. Решаем вместе» зыфиIорэмкIэ зафигъэзагъ. Теуцожь районым ит къуаджэу ПчыхьалIыкъуае итемыр-къохьэпIэ лъэныкъо шIоилъэ зэрэхъугъэр ащ ариIуагъ. Iофым изэхэфын ыуж ихьагъ ПчыхьалIы- ­къое къоджэ псэупIэм иадминистрацие. Ар аукъэбзыгъ, хъулъфыгъэр администрацием иIофышIэхэм афэрэзагъ.

Аужырэ тхьамэфитIум шъолъыр гъэIорышIэнымкIэ Гупчэмрэ къэралыгъо къулыкъу IофышIэхэмрэ зэгъу­сэхэу цIыфхэм адэIэпыIэнхэм пае проект заулэ пхыращынэу аублагъ. Ахэм яз Гупчэмрэ псауныгъэм икъэухъумэнкIэ Министерствэмрэ агъэхьазырыгъэ къэбарлъыгъэIэс нэпэеплъыр. Вакцинацием епхыгъэу цIыфхэр анахьэу зыгъэгумэкIыхэрэ упчIэхэм ар афэгъэхьыгъ ыкIи район, чIыпIэ администрациехэм, еджа­пIэхэм, кIэлэцIыкIу IыгъыпIэхэм атырагощагъ. Узэрэзыфэсакъыжьын фэе шIыкIэхэр, вакцинэхэр зыфэдэхэр, ковидкIэ сымаджэхэм зыщяIазэхэрэ госпитальхэм ятелефонхэр ащ итых. Вакцинацием зызэрэхатхэщтыр нахь къызэрыкIо хъуным пае нэпэеплъым штрих-кодхэр тырашIыхьагъэх. Ахэм телефон камерэр атебгъахьэмэ, порталэу «Госуслуги» зыфиIорэм уращэщт, прививкэм ащ зыщыхэптхэн плъэкIыщт. Джащ фэдэу федэ хъущт къэбарыр онлайн шIыкIэкIэ Телеграмым щызэбгъэшIэшъущт – чат-ботэу Милэ @vakcina01bot къызфэбгъэфедэзэ, псауныгъэр къэухъумэгъэнымкIэ Министерствэм minzdrav_01 шъолъыр гъэIорышIэнымкIэ Гупчэм tsur01 я Телеграм-каналхэм уакIэтхэшъущт.

Джащ фэдэу Гупчэмрэ псауныгъэр къэухъумэгъэнымкIэ Министерствэмрэ джыри язы проект цIыфхэм ящыкIэгъэ шъыпкъэу хъугъэ – «Врачым еупчI» зыфиIорэр. «Госуслуги. Решаем вместе» ыкIи «Инцидент Менеджмент» зыфиIохэрэмкIэ къаIэкIэхьэгъэ упчIэхэр зызэфахьысыжьхэм фэдэ унашъор ашIыгъагъ. Къагъэ­хьыгъэ упчIэхэу псауныгъэм икъэухъумэн фэгъэхьыгъэхэм анахь шъхьаIэхэр къахахыхи, министерствэм иIофышIэ IэкIагъэхьагъэх. Апэ онлайн-упчIэжьэгъу хъугъэр Аулъэ ФатIимэт – гум еIэзэрэ врач, Адыгэ республикэ клиническэ сымэджэщым икардиологическэ диспансер ипащ. УпчIэ пэпчъкIэ видеоролик шъхьаф агъэхьазырыгъ, ахэм врачым джэуапхэр къащыретых анахьыбэу цIыфхэр зыгъэгумэкIыхэрэ упчIэхэм.

Джащ фэдэу джэуапхэр къагъэхьазырынхэу агъэ­нафэ нэмыкI медицинэ IофышIэхэми.