Ленинград къэдзыхьагъэу зыщэтым ар къэзыухъумэгъэгъэ цIыф къызэрыкIохэм афэгъэхьыгъэ къэбархэм яугъоин фэгъэхьыгъэ Iофтхьабзэу «Медаль моей памяти» зыфиIорэр 2021-рэ илъэсым щылэ мазэм и 27-м къыщегъэжьагъэу макIо.
А мафэм тефэу зыкIаублагъэми ошIэ-дэмышIагъэ хэлъэу щытэп: щылэ мазэм и 27-м Ленинград блокадэр тырахыжьыгъагъ. Iофтхьабзэм изэхэщакIохэр Санкт-Петербург информатизациемкIэ ыкIи зэпхыныгъэхэмкIэ и Комитетрэ и Архив комитетрэ.
2021-рэ илъэсым Iоныгъом и 19-м нэс Iофтхьабзэр лъагъэкIотагъ. Интернет-порталэу «Медаль «За оборону Ленинграда» (https//medal.spbarchives.ru/) зыфиIорэр ары а лъэхъэнэ къиным Ленинград къэзыухъумэгъэ цIыфхэу ащ пае медаль къызфагъэшъошагъэхэм яхьылIэгъэ документхэр къызэрыхьащтхэр.
Интернет-порталым къехьэх Ленинград щыпсэущтыгъэхэм яспискэхэр, яунэе карточкэхэр, удостоверениехэу тыныр къэзыгъэшъыпкъэжьыхэрэр, нэмыкI архив къэбархэр. Архив документхэм мэхьанэшхо яIэу щыт, сыда пIомэ яIахьылхэм, къапэблагъэхэм афэгъэхьыгъэ къэбарыкIэ горэхэр къаIэкIэхьанхэмкIэ амалышIоу ар щыт. Джащ пае унашъо аштэгъагъ Ленинград къэзыухъумэгъэгъэ мамыр цIыфхэм афэгъэхьыгъэу щыIэр нахьыбэ шIыгъэнымкIэ, а мафэхэм псэущтыгъэ лIыхъужъхэр нахь икъоу тынэгу къыкIэуцонхэмкIэ, тщымыгъупшэнхэмкIэ. Архив документхэм къахэхъожьыщтых а хьазабыр зыпэкIэкIыгъагъэхэм е ахэм яIахьылхэм къаIотэжьыгъэхэр.
Iофтхьабзэм пшъэрылъ шъхьаIэу иIэр заом илъэхъэнэ анахь къинхэм зыкIэ ащыщым Ленинград щыпсэущтыгъэ цIыфхэм лIыхъужъныгъэу зэрахьагъэр ащымыгъупшэныр ары.
Джащ фэдэу Ленинград а лъэхъэнэ гузэжъогъум дэсыгъэхэм яIахьылхэм къаIотэжьыхэрэр социальнэ хъытыум инэкIубгъоу «ВКонтакте» зыфиIорэм ижъугъотэщтых. Проектым инэкIубгъо къалэм щыпсэущтыгъэ цIыфхэм анэмыкIэу фронтовикхэми афэгъэхьыгъэхэр ижъугъотэщтых. Непэ ехъулIэу лIыхъужъ-ухъумакIохэм афэгъэхьыгъэ тарихъ 200-м ехъу аугъоигъах.
Ленинград къэзыухъумагъэхэм афэгъэхьыгъэ къэбарэу къаугъоигъэр зэкIэ Санкт-Петербург и Гупчэ къэралыгъо архиврэ Ленинград икъэухъумэн фэгъэхьыгъэ Къэралыгъо мемориальнэ музеимрэ аIэкIагъэхьажьыщт. Ащ нэмыкIэу къаугъоигъэ къэбарыр зэкIэ электрон сборник ашIыжьынэу ары зыфаехэр.
Мы Iофтхьабзэм изэхэщакIохэм ащ къыхэлэжьэнхэу фаехэр зэкIэ рагъэблагъэх. ШъуиIахьылхэм ащыщхэу Ленинград икъэухъумэн зиIахь хэзышIыхьагъэхэм афэгъэхьыгъэ къэбарыр къыздэжъугъэхьы-щтыр:
— почтэмкIэ: medal@spbarchives.ru;
— социальнэ сетэу «ВКонтакте»: https://vk.com/mymory_medal;
— «ВКонтакте» зыфиIорэм игуадзэкIэ: https://vk.com/app 7643740.
Мы Iофтхьабзэм мэхьанэшхо иIэу щыт, сыда пIомэ УФ-м щыпсэурэ пстэуми типшъэрылъ ТекIоныгъэшхом фэгъэхьыгъэ тарихъыр къэухъумэгъэныр.